1 Korin
Wok bilong aposel.
4
1Yupela mas bihainim tingting olsem, mipela wokman bilong Krais na long han bilong mipela God i putim hait toktok bilong Em. 2Na sapos bosman i putim samting long han bilong wokman, orait wokman i mas i stap feitful long dispela samting. 3Yupela i laik skelim mi o wanpela kot bilong dispela graun i laik skelim mi, dispela em i samting nating tumas long mi. Na mi no save skelim mi yet. 4Mi no tingim olsem mi gat rong, tasol dispela i no minim olsem mi no gat asua. Em i BIKPELA i save skelim mi. 5Long dispela as yupela no ken i skelim samting paslain long taim bilong em. Yupela wetim kambek bilong BIKPELA tasol. Ol samting i hait long tudak BIKPELA bai kisim i kam long tulait na Em bai putim ol tingting bilong bel bilong man long ples klia. Long dispela taim ol wanwan wokman i ken i lukim amamas bilong God.
6Ol brata, mi mekim dispela tok i holim mi wantaim Apolos. Mi mekim olsem bilong helpim yupela, bai yupela i ken i lainim long mitupela as bilong dispela toktok, “Yupela no ken i kalapim toktok God i bin raitim.” Em olsem na yupela no ken i bikhet na fevoritim wanpela man na daunim narapela. 7Yu husat na yu tingim olsem yu winim narapela manmeri? Yu kisim wanem samting na God i no bin givim dispela samting long yu? Na sapos God i givim dispela samting long yu, long wanem as yu apim yu yet olsem yu yet i kamapim dispela samting?
8Ating yupela i kisim pinis olgeta samting yupela i laik kisim, a? Ating yupela inap pinis, a? Ating yupela i kamap pinis long kingdom, na mipela nogat, a? Tru tumas, mi laik kingdom i kamap, bai mipela i sindaun long em wantaim yupela! 9Tasol mi tingim olsem, God i sanapim mipela ol aposel las tru long ai bilong ol manmeri, wankain olsem ol i sanapim ol man ol i laik kilim i dai long arina. God i mekim mipela i stap ples klia long ai bilong olgeta samting, bai ol ensel wantaim ol manmeri i lukim. 10Mipela i stap ol ful bilong Krais, tasol yupela i stap ol saveman long Krais. Mipela i wik, tasol yupela i gat strong. Yupela i gat biknem, tasol mipela i gat nem nogut. 11Nau yet mipela i stap hangre na mipela i drai long wara, na mipela i werim klos i bruk, na ol man i wok long paitim mipela, na mipela i no gat ples bilong sindaun gut. 12Mipela i mekim hatpela wok long han bilong mipela yet. Taim ol man i tok bilas long mipela, mipela i save blesim ol. Taim ol i wok long bagarapim mipela, mipela i karim dispela hevi. 13Taim ol i mekim tok nogut bilong daunim mipela, mipela i mekim gutpela tok bilong bekim ol. Nau yet mipela i stap pipia na rabis long ai bilong olgeta manmeri bilong dispela graun.
14Mi no raitim dispela tok bilong semim yupela. Nogat. Yupela pikinini bilong mi na mi lavim yupela tumas na mi laik stretim yupela tasol. 15Long wanem, ating planti manmeri tru i ken i bilipim na trastim Krais na ol i ken i stiaim yupela, tasol yupela no gat planti papa i stap. Long Krais mi bin kamap papa bilong yupela, taim mi autim gutnius long yupela. 16Em olsem na mi laik yupela lukim laip bilong mi na yupela bihainim. 17Long dispela as mi bin salim Timoti i kam long yupela. Em i pikinini bilong mi na mi lavim em, na em i feitful long bihainim BIKPELA. Mi salim em i kam bilong kirapim gen tingting bilong yupela long laip na tisim bilong mi long wei bilong Krais Jisas, wankain olsem mi skulim olgeta sios long olgeta hap.
18Sampela bilong yupela i bikhet, na ol i tingim olsem mi no inap i kam long yupela. 19Tasol, sapos BIKPELA i orait long mi i kam, orait i no longtaim na bai mi kam, tasol mi no inap skelim toktok bilong ol dispela bikhet man, nogat, bai mi painimaut olsem, pawa bilong ol i olsem wanem. 20Long wanem, kingdom bilong God i no samting bilong toktok. Nogat. Em i samting bilong pawa. 21Yupela laik wanem? Yupela laik mi kam stikim yupela, o yupela laik mi kam wantaim lavim na wantaim bel isi, a?
