1 Korin
Aposel Pol i gat namba.
9
1Mi no gat fridom, a? Na mi no aposel, a? Na mi no bin lukim Jisas, BIKPELA bilong yumi, a? Na yupela no kaikai bilong wok bilong mi, wok mi mekim bilong BIKPELA, a? 2Sampela manmeri i tingim olsem, mi no aposel bilong ol, tasol maski, mi aposel bilong yupela, a? Long wanem, taim yupela bilip, orait yupela i olsem mak bilong soim olsem, mi trupela aposel bilong BIKPELA.
3Yu husat i laik skelim mi, orait nau bai mi mekim tok long yupela bilong difenim mi yet. 4Ating mi no gat rait bilong kisim kaikai na dring, a? 5Ating mi no gat rait bilong maritim meri i bilip na kisim em raun wantaim mi, a? Ol narapela aposel i mekim olsem, na ol brata bilong BIKPELA i mekim olsem, na Sifas tu i mekim olsem. 6O yupela tingim olsem, mi na Barnabas tasol i mas mekim wok bilong lukautim mitupela, na ol narapela aposel nogat, a?
7Tingim. Husat i mekim wok soldia na em yet i painim kaikai bilong em? Na husat i planim gaden wain na em i no kaikaim frut bilong em? Na husat i lukautim ol sipsip na meme na em i no dringim susu bilong ol? 8Na dispela toktok mi mekim em i samting bilong dispela graun tasol, a? Nogat. Lo i mekim dispela toktok. 9Lo bilong Moses i tok, “Yu no ken i banisim maus bilong bulmakau taim em i mekim wok bilong rausim skin bilong wit.” (Lo 25:4) Na yupela i gat wanem tingting, God i tingting long ol bulmakau tasol na Em i mekim dispela tok, a? 10Yupela tingim olsem, God i no mekim dispela tok bilong skulim yumi, a? Harim. God i mekim dispela tok bilong skulim yumi. Em olsem na taim ol wokman i wok bilong brukim graun, na taim ol wokman i wok bilong rausim skin bilong wit, orait ol i ken i tingting long serim haves bilong wok bilong ol. 11Mipela i bin planim ol gutpela samting bilong spirit namel long yupela. Em olsem na long wanem as mipela no ken i kisim kaikai bilong bodi bilong mipela long yupela? 12Sapos ol narapela man i gat rait bilong kisim helpim bilong yupela, ating mitupela i mas i gat rait moa bilong kisim helpim bilong yupela, a?
Tasol, mipela no yusim rait bilong mipela na kisim helpim long yupela. Nogat. Mipela sot long wanem samting, em i orait, mipela i karim dispela hevi tasol, bai wanpela samting i no ken i pasim rot bilong gutnius bilong Krais. 13Ating yupela no save, ol man i wok long tempel ol i kaikaim kaikai bilong tempel, na ol man i wok long alta ol i save serim kaikai ol i ofaim long alta. 14Na long wankain pasin, BIKPELA i bin tok, ol man i autim gutnius ol i ken i kisim ol samting ol i nidim bilong laip long dispela wok bilong gutnius.
15Tasol, mi no yusim dispela rait bilong mi na kisim ol samting long yupela. Na mi no raitim dispela tok bai yupela i givim helpim long mi. Nogat. Mobeta mi i dai pastaim. Nogut helpim bilong yupela i pasim rot long mi long kamapim biknem long gutnius. 16Taim mi mekim wok bilong autim gutnius, orait i no gat as long mi yet i kisim biknem long dispela wok bilong mi. Long wanem, God i bin kamapim mi bilong autim gutnius, olsem na mi mas autim tasol. Na sapos mi no mekim dispela wok, orait mi ken i bagarap tasol. 17Sapos mi fri na mi mekim wok, orait mi ken i kisim pe. Tasol sapos mi slev na mi mekim wok, orait mi mekim wok mi mas mekim tasol. 18Em olsem na mi ken i kisim pe olsem wanem? Mi gat rait long kisim helpim bilong yupela, tasol mi no laik rait bilong mi i spoilim gutnius. Em olsem na taim mi autim gutnius, orait mi autim fri tasol na mi no kisim wanpela samting long yupela. Long dispela pasin mi mekim gutnius i fri i fri olgeta. Dispela gutpela samting em i olsem pe bilong mi.
19Mi stap fri na mi no aninit long lek bilong wanpela man, tasol mi mekim mi yet i stap slev bilong olgeta manmeri, bai mi ken i kisim ol sampela manmeri moa i kam long gutnius. 20Em olsem na taim mi stap wantaim ol Juda, orait mi save bihainim pasin bilong ol Juda, bai mi ken i kisim ol i kam long gutnius. Na taim mi stap wantaim ol man i aninit long Lo, orait maski mi yet mi no aninit long Lo, mi save bihainim ol samting bilong Lo, bai mi ken i kisim ol i kam long gutnius. 21Na taim mi stap wantaim ol man i no gat Lo, orait mi save stap olsem ol man i no gat Lo, bai mi ken i kisim ol i kam long gutnius. (Tasol yupela no ken i tingim olsem mi man bilong abrusim lo bilong God, nogat, mi aninit long lo bilong Krais.) 22Na taim mi stap wantaim ol manmeri i wik, orait mi save bihainim pasin bilong ol manmeri i wik, bai mi ken i kisim ol i kam long gutnius. Maski mi stap wantaim husat, mi save kamap olsem ol, bai mi ken i yusim olgeta samting bilong sevim sampela bilong ol. 23Mi mekim ol dispela kain pasin bilong gutnius tasol, bai mi ken i serim blesim bilong gutnius.
24Ating yupela no save, taim ol man i ran long resis, olgeta i ran, tasol wanpela man tasol i save kisim prais. Em olsem na yupela mas ran bilong kisim prais. 25Olgeta manmeri i laik pilai long gems ol i save strik tru long trenim bodi bilong ol. Ol i mekim olsem bilong kisim kraun, em i kraun i no inap i stap longpela taim. Tasol yumi mekim olsem bilong kisim kraun i stap oltaim oltaim. 26Em olsem na mi no save ran nating, na mi no pait olsem man i paitim win. 27Nogat. Mi paitim bodi bilong mi na mi mekim em i stap slev bilong mi. Nogut mi autim gutnius long ol narapela manmeri na bihain mi yet i lus long prais.
