1 Timoti
Stia tok long ol wan wan samting bilong sios.
5
1Taim yu laik stretim wanpela man i bikpela pinis, orait yu no ken i hatim em. Yu mas tok isi na stretim em wankain olsem yu tok isi long papa bilong yu yet. Na long ol yangpela man, orait yu mas mekim wankain olsem yu mekim long ol brata bilong yu yet. 2Na long ol meri i bikpela pinis, orait yu mas mekim wankain olsem yu mekim long mama bilong yu yet. Na long ol yangpela meri, orait yu mas mekim wankain olsem yu mekim long ol susa bilong yu yet, na yu mas lukaut gut na mekim pasin i stret olgeta tasol long ol.
3Na sapos wanpela wido meri i stap na em i no gat manmeri bilong lukautim em, orait sios i mas rispektim em na lukautim em. 4Tasol sapos wanpela wido meri i stap na em i gat pikinini i stap na pikinini i gat pikinini i stap, orait ol i mas mekim lotu bilong ol i karim kaikai na ol i mas lukautim femili memba bilong ol yet. Long dispela wei ol i ken i bekim hat wok bilong papamama. God i amamas tumas long dispela kain pasin. 5Na wido meri i no gat manmeri bilong lukautim em na sios i ken i helpim em, orait em i meri i trastim God na i no lusim pasin bilong mekim prea long nait na de. 6Tasol, wido meri i tingting tasol long mekim amamas bilong bodi, orait i olsem em i dai pinis taim em i stap laip yet. 7Yu mas givim dispela toktok long olgeta manmeri bilong sios. Long wanem, ol i ken i mekim pasin i stret na wanpela man i no ken i lukim asua namel long ol. 8Harim. Sapos wanpela man i no lukautim femili bilong em yet, na em i no lukautim wanblut bilong em yet, orait em i givim baksait long trupela bilip na pasin nogut bilong em i winim pasin nogut bilong ol haiden manmeri.
9-10Na sapos wanpela wido meri i winim 60 krismas pinis, na em i bin i stap meri bilong wanpela man tasol, na em i bin mekim ol gutpela wok, orait yu ken i putim nem bilong em long lista bilong ol wido meri sios i ken i lukautim. Meri i mekim gutpela wok em i meri i bin lukautim gut ol pikinini bilong em, na em i bin amamas na mekim gutpela long ol manmeri, na em i bin mekim pasin bilong wasim lek bilong manmeri i bilip, na em i bin helpim manmeri i gat hevi, na em i bin pas olgeta long mekim ol kainkain gutpela pasin. 11Tasol yu no ken i putim nem bilong ol yangpela wido meri long lista bilong ol wido meri sios i ken i lukautim. Long wanem, taim bel bilong ol i kirap long laikim wanpela man gen, orait ol bai lusim wok bilong Krais na marit gen. 12Olsem na, ol bai kisim sem i kam long ol yet. Long wanem, ol i lusim promis ol i bin mekim pastaim. 13Na narapela samting tu. Ol bai les long mekim wok na ol bai raunraun long haus bilong ol narapela manmeri. Ol bai les long wok na ol bai raun na stori nating long ol samting bilong ol narapela manmeri na ol bai mekim toktok i no gutpela long mekim. 14Em olsem na mi save tokim ol yangpela wido meri olsem, mobeta yupela marit gen na yupela karim pikinini na yupela i wok long lukautim femili bilong yupela, na yupela no ken i mekim pasin ol birua i ken i yusim bilong tok baksait long yupela. 15Long wanem, sampela yangpela wido meri i lusim gutpela wei pinis na ol i bihainim wei bilong Satan. 16Sapos wanpela bilipmeri i gat sampela wido meri i stap long femili bilong em, orait em i mas lukautim ol na em i no ken i larim sios i karim hevi bilong lukautim ol. Long wanem, sios i mas fri long lukautim ol wido meri i no gat femili bilong lukautim ol.
17Sios i mas rispektim na baim gut ol elda i save bosim gut ol samting bilong sios. Na moa yet, sios i mas rispektim na baim gut ol elda i mekim hat wok bilong autim na skulim ol manmeri long tok bilong God. 18Long wanem, Tok bilong God i tok olsem, “Yu no ken i banisim maus bilong bulmakau taim em i mekim wok bilong rausim skin bilong wit.” (Lo 25:4) Na tu Tok bilong God i tok olsem, “Man i mekim wok em i mas kisim pe.” (Luk 10:7) 19Na sapos wanpela man i sutim tok long wanpela elda, orait yu no ken i harim tok bilong em. Tasol sapos 2-pela o 3-pela man i pilim olsem ol i bin witnisim rong bilong wanpela elda, na ol i sutim tok long em, orait yu ken i harim tok bilong ol. 20Na sapos elda i bin mekim sin pasin, orait yu mas stretim em long ai bilong sios, na long dispela pasin olgeta manmeri bilong sios i ken i pret long mekim sin pasin. 21Long ai bilong God na long Krais Jisas na long ol ensel God i bin makim, mi laik tok strong long yu olsem, yu mas bihainim ol dispela stia tok mi givim yu, na yu no ken i wan sait long wanpela man, na yu no ken i bihainim wantok sistem. 22Yu no ken i hariap na makim wanpela man bilong mekim wok bilong God na putim han long em. Nogut yu pas long sin bilong narapela man. Yu mas lukaut gut na i stap klin. 23Yu no ken i dringim wara tasol. Sampela taim yu ken i dringim wain bilong helpim bel bilong yu na bilong helpim sik yu save kisim planti taim. 24Sin bilong sampela man i ples klia pinis, na ripot bilong sin bilong ol i go paslain long ol long ples bilong kot. Na sin bilong sampela man bai kamap ples klia long bihain tasol. 25Na wankain olsem, gutpela wok bilong sampela man i ples klia pinis. Na gutpela wok bilong sampela man i hait, tasol i no inap hait olgeta.
