1 Timoti 6
6
1Ol manmeri we ol i stap long hevi bilong wok slev, ol i mas rispektim bos bilong ol. Long wanem, nogut sampela manmeri i tok bilas long God na long trupela tok mipela i save autim. 2Na ol slev we bos bilong ol em i man i bilip, ol i no ken i tingim olsem, “Bos bilong mi i olsem brata bilong mi, olsem na mi ken i slek liklik long mekim wok bilong em.” Nogat. Ol i mas kisim gutpela tingting na mekim gutpela wok moa yet long bos bilong ol. Long wanem, ol i no mekim wok bilong helpim man nating. Nogat. Ol i mekim wok bilong helpim man i bilip, em man God i save lavim.
Ol giaman tisa.
Yu mas tisim dispela samting long sios na tok strong long ol, bai ol i bihainim dispela toktok. 3Sapos wanpela man i autim narapela kain tok bilong bilip na em i no wanbel olgeta long trupela tok bilong BIKPELA bilong yumi Jisas Krais na em i no wanbel olgeta long trupela tok bilong God, 4orait dispela man em i wanpela bikhet man na em i no gat save. Dispela kain man i save laikim pasin bilong tok pait na em i save kros na tok pait long minim bilong wan wan toktok. Na dispela kain pasin i save kamapim jelas pasin, na pasin bilong kros pait, na pasin bilong mekim toktok nogut long narapela manmeri, na pasin we ol i kisim tingting nogut long narapela manmeri, 5na olgeta taim ol i save sikrap long toktok. Tingting bilong ol i paul pinis na ol i no save liklik long trupela tok bilong God, na ol i tingim ol samting bilong wei bilong God em i samting bilong kamapim mani bilong ol. 6Sapos yumi bihainim ol gutpela wei bilong God na yumi bel isi i stap, orait yumi kisim gutpela samting pinis. 7Long wanem, yumi no bin kisim wanpela samting i kam long dispela graun taim mama i karim yumi, na yumi no inap kisim wanpela samting i go taim yumi lusim dispela graun. 8Tasol sapos yumi gat kaikai na klos, orait yumi ken i tingim olsem dispela samting em inap. 9Manmeri i laik kamap mani manmeri ol bai pundaun long aigris pasin, na ol bai pundaun long trik bilong ol man, na ol bai pundaun insait long ol paul pasin na ol kain pasin bilong bagarap. Ol dispela samting bai karim ol i go insait olgeta long bagarap na ol bai lus olgeta. 10Pasin bilong lavim mani em i samting i ken i kamapim ol kainkain pasin nogut. Sampela manmeri i hangre long kisim mani na ol i lusim pinis trupela bilip na ol i sutim ol yet long planti hevi na sori.
Wok hat long wok bilong God.
11Tasol yu, man bilong God, yu mas ranawe long ol dispela samting, na yu mas wok hat long bihainim stretpela tingting na stretpela pasin na ol gutpela wei bilong God. Yu mas wok hat long bihainim trupela bilip na pasin bilong lavim, na yu mas wok hat bilong i stap olgeta long wei bilong God, na yu mas wok hat long pasin bilong bel isi na mekim gutpela pasin long manmeri. 12Taitim bun na pait strong bilong gutpela pait bilong bilip. God i bin singautim yu bilong kisim laip i stap oltaim oltaim, na yu bin autim gutpela toktok bilong putim yu yet long ples klia, na yu bin mekim olsem long ai bilong planti witnis. Olsem na, holimpas dispela laip i stap oltaim oltaim. 13God Em i God bilong givim laip long olgeta samting, na Jisas i bin autim gutpela toktok bilong putim Em yet long ples klia long kot bilong Pontius Pailat. Na long ai bilong Tupela mi tok strong long yu olsem, 14yu mas bihainim ol dispela lo nau mi givim yu. Yu no ken i pundaun liklik long dispela lo na ol man i no ken i lukim wanpela asua bilong yu long dispela lo. Yu mas bihainim ol dispela lo i go i go inap long taim BIKPELA bilong yumi Jisas Krais i kamap ples klia. 15Na Em bai kamap long taim God yet i makim. God tasol i ken i kisim biknem na God tasol Em i Bos bilong olgeta samting. God Em i King bilong olgeta king na Em i BIKPELA bilong olgeta bikman. 16God tasol i stap oltaim oltaim, na Em i sindaun insait long bikpela lait we wanpela man i no inap i go klostu. Na wanpela man i no bin lukim God, na wanpela man i no inap lukim Em. Na long dispela God oana na pawa bai stap i go i go oltaim. Tru tumas.
17Na ol manmeri i gat planti samting nau long dispela graun, tokim ol olsem, ol i no ken i bikhet na ol i no ken i putim hop bilong ol long mani bilong ol na trastim dispela samting i save pinis hariap. Ol i mas trastim na putim hop bilong ol i go long God. Em i givim yumi planti gutpela samting bilong yumi ken i amamas. 18Tokim ol olsem, ol i mas mekim gutpela wok na ol i mas mekim gutpela pasin bilong helpim narapela manmeri, na ol i mas amamas na redi bilong yusim mani bilong ol bilong helpim narapela manmeri. 19Na long dispela wei ol i bungim ol gutpela samting bilong ol bilong sanap strong long taim i laik kamap bihain, na ol bai holimpas laip i trupela laip.
20Timoti, yu mas lukautim gut ol dispela samting yu bin kisim. Givim baksait long ol toktok i no pas long wei bilong God. Givim baksait long ol save na toktok i pait long trupela save na toktok. Sampela manmeri i kolim dispela save bilong ol trupela save. Tasol nogat. Em i giaman save tasol. 21Na sampela manmeri i bihainim dispela giaman save na long dispela wei ol bin popaia long trupela bilip.
Grasia i ken i stap wantaim yupela.
