2 Timoti
Gutpela soldia bilong Krais Jisas.
2
1Em olsem na, pikinini bilong mi, larim grasia bilong Krais Jisas i strongim yu. 2Na toktok yu bin kisim long maus bilong mi long ai bilong planti witnis, yu givim long ol man i feitful na i gat strong bilong skulim ol narapela manmeri. 3Na yu karim hevi olsem gutpela soldia bilong Krais Jisas i karim. 4Wanpela soldia i no inap bisi long ol samting ol man nating i bisi long em. Nogat. Em bai bisi long wok soldia bilong amamasim komanda bilong em. 5Na man i ran long resis, na em i no bihainim lo bilong resis, orait em i no inap winim prais. 6Na fama i bin hatwok long planim kaikai, em i ken i kisim fes kaikai i mau. 7Skelim dispela toktok mi mekim, na BIKPELA bai givim save long yu.
8Holim tingting long Jisas Krais, Em i kirap pinis long matmat, na Em i bin kamap insait long lain bilong Devit, olsem mi autim taim mi autim gutnius bilong mi. 9Em i dispela gutnius nau mi safa long em na ol i kalabusim mi long sen olsem mi wanpela raskol. Tasol tok bilong God i no inap kalabus! 10Long dispela as mi save karim olgeta hevi i kamap long mi, bilong helpim ol manmeri God i bin makim bilong kisim bek, bai ol i kam kisim laip long wok bilong Krais Jisas wantaim glori i stap oltaim oltaim. 11Wanpela tok i stap, na dispela tok yu ken i trastim. Na dispela tok i olsem,
Sapos yumi i dai wantaim Em, orait yumi bai i stap laip wantaim Em.
12Sapos yumi i karim olgeta hevi, orait bai yumi sindaun long kingdom wantaim Em.
Sapos yumi lusim Em, orait Em bai lusim yumi.
13Sapos yumi no feitful, orait Em bai i stap feitful.
Long wanem, Em i no inap givim baksait long Em yet.
Gutpela wokman long ai bilong God.
14Yu mas tokim ol manmeri, bai ol i tingim ol dispela toktok. Na long ai bilong God yu mas tok strong long ol olsem, “Yupela no ken i tok pait long ol liklik toktok.” Long wanem, dispela samting i no inap kamapim gutpela samting. Nogat. Ol dispela samting bai bagarapim ol manmeri i harim. 15Yu mas wok hat long yusim tok bilong God long stretpela we, na bai yu no gat sem na God i orait long wok bilong yu. 16Na yu mas givim baksait long ol toktok i no pas long wei bilong God. Long wanem, ol toktok i no pas long wei bilong God bai stiaim manmeri i go longwe long God. 17Na tok bilong ol bai kalap kalap olsem wanpela sik. Tupela bilong ol, Himeneus na Filetus, 18tupela i popaia pinis long trupela tok, na tupela i mekim tok olsem, “Kirap bek bilong ol manmeri i kamap pinis.” Na tok bilong tupela i paulim bilip bilong sampela manmeri. 19Tasol, strongpela as ston bilong God i stap yet. Tok i stap olsem, “BIKPELA i save pinis long olgeta manmeri i bilong Em.” Na narapela tok i stap olsem, “Olgeta manmeri i pas long nem bilong BIKPELA ol i mas lusim pasin nogut.”
20Insait long bikpela haus i gat ol dis i stap. Sampela dis ol i bin wokim long gol na sampela ol i wokim long silva. Tasol sampela dis ol i bin wokim long diwai na sampela ol i wokim long graun. Na sampela dis i stap bilong yusim long gutpela samting, na sampela dis i stap bilong yusim long nogut samting. 21Em olsem na sapos wanpela man i rausim ol nogut samting long laip bilong em, orait em bai i stap olsem dis bilong yusim long gutpela samting. Ol bai makim em bilong mekim wok i holi, na em i gutpela man bilong mekim wok bilong papa bilong haus, na em i redi bilong mekim olgeta gutpela wok.
22Em olsem na yu mas ranawe long olgeta kainkain tingting ol yangpela man i save mekim, na yu mas wok hat long bihainim stretpela tingting na stretpela pasin, na bihainim trupela bilip, na bihainim pasin bilong lavim, na bihainim pasin bilong bel isi. Yu mas mekim olsem wantaim olgeta manmeri i gat stretpela tingting long bel bilong ol na ol i singaut long nem bilong BIKPELA. 23Yu mas givim baksait long tok pait bilong ol man i no gat save na long ol toktok i no gat as bilong em i stap. Yu save, ol dispela kain tok i save kamapim kros tasol. 24Na wokman bilong BIKPELA em i no ken i stap man bilong kros. Nogat. Em i mas i stap bel isi na mekim gutpela long ol manmeri, na em i mas tisim ol gut, na em i mas strong na bel isi long karim hevi ol manmeri nogut i mekim long em, 25na em i mas bel isi na stretim toktok bilong man i egensim em. God i ken i yusim dispela gutpela pasin bilong senisim bel na tingting bilong ol na bilong kisim ol i kam long trupela tok, 26na bai ol i lusim kalabus bilong Satan. Satan i bin holimpas ol, bai ol i bihainim laik bilong em.
