2 Timoti
Long las de planti pasin nogut bai kamap.
3
1Tasol yu mas save gut olsem, long taim bilong las de planti hevi bai kamap. 2Long wanem, planti manmeri bai lavim ol yet, na ol bai lavim mani, na ol bai hambak, na bikhet na apim ol yet, na kros na tok nogut long ol narapela manmeri. Na ol bai sakim tok bilong papamama bilong ol, na ol i no inap tingting long amamas na tok tenkyu, na ol i no inap i stap stret liklik. 3Na ol i no inap kea liklik long narapela manmeri, na kros bilong ol i no inap pinis, na ol bai tok giaman bilong daunim ol narapela manmeri, na ol i no inap kontrolim ol yet, na ol bai i stap man nogut, na ol i no inap laikim gutpela pasin. 4Na ol i no inap i stap feitful long wanpela samting, na ol i no inap kea long wanem pasin ol i mekim, na ol bai tingim olsem ol i bikpela samting stret, na ol bai lavim gutpela sindaun tasol na ol i no inap lavim God. 5Na long antap skin ol bai bihainim God, tasol ol i no save liklik long pawa bilong wei bilong God. Yu mas i stap longwe long ol dispela kain manmeri. 6Ol dispela kain lain ol i save painim rot bilong sindaun wantaim ol meri i no gat strongpela tingting, na ol i giamanim ol na bosim tingting bilong ol. Ol dispela meri ol i pilim tru sin bilong ol na ol i no gat strong bilong daunim laik nogut bilong ol, 7na ol i save kisim planti skul, tasol ol i no save long wanem toktok i tru. 8Na wankain olsem Janes wantaim Jambres i bin birua long Moses, orait ol dispela man i giamanim ol meri, ol i birua long trupela tok. Ol i bagarap long tingting bilong ol na ol i stap autsait long trupela bilip. 9Tasol wok bilong ol i no inap i stap strong. Long wanem, longlong bilong ol i stap ples klia, wankain olsem longlong bilong tupela man, Janes na Jambres, i stap ples klia.
Olgeta tok bilong Baibel em i tok bilong God yet.
10Tasol yu save pinis long mi. Yu save long tok mi autim, na pasin mi mekim, na as bilong wok bilong mi, na bilip bilong mi, na bel isi bilong mi maski wanem samting i distebim mi, na lavim bilong mi, na hatpela wok bilong mi bilong i stap olgeta long wei bilong God. 11Na yu save long hevi mi kisim long han bilong ol manmeri i egensim mi na long ol pen mi karim taim mi go long Antiok na Aikoniam na Listra. Yu save long ol hevi mi kisim long han bilong ol manmeri i egensim mi. Tasol BIKPELA i bin sevim mi long ol dispela samting. 12Na tru tumas, ol manmeri i laik bihainim wei bilong Krais Jisas long laip bilong ol, ol bai kisim hevi long han bilong ol manmeri i egensim Em. 13Tasol pasin bilong ol manmeri nogut na ol giaman tisa bai kamap nogut moa yet. Ol bai giamanim ol manmeri na ol manmeri bai giamanim ol. 14Tasol yu, yu mas bihainim yet ol samting yu bin lainim pinis na yu bilipim na trastim strong. Long wanem, yu save long husat i skulim yu long ol dispela samting, 15na yu save olsem, taim yu i stap liklik pikinini yet, yu bin kisim skul long tok i holi Tok bilong God, na em i dispela tok i givim gutpela save long yu long hau God i sevim manmeri long rot bilong bilipim na trastim Krais Jisas. 16Olgeta Tok bilong God i kamaut long maus bilong God olsem win, na i gutpela bilong skulim yumi, na bilong krosim yumi, na bilong stretim yumi, na bilong trenim yumi long olgeta samting i stretpela, 17bai ol man bilong God, ol inap tru na i gat olgeta samting ol i nidim bilong mekim olgeta gutpela wok.
