Aposel
Pita i givim ripot long sios i stap long Jerusalem.
11
1Na ol aposel na ol brata i stap nabaut long olgeta hap bilong distrik Judia, ol i harim olsem ol Jentail i bin kisim tok bilong God. 2Em olsem na taim Pita i kamap long Jerusalem, ol man bilong katim skin ol i krosim em. 3Ol i tok, “Yu bin i go long haus bilong ol man i no katim skin na yu kaikai wantaim ol.” 4Tasol Pita i stat long stat bilong ol dispela samting na em i eksplenim long ol. 5Na Pita i tok, “Long taun Jopa mi prea i stap na mi lukim visin. Mi lukim samting olsem wanpela bikpela laplap i kam daun, i olsem samting i holim 4-pela kona na i slekim em i kam daun long mi. 6Na mi lukim gut na mi lukim laplap i gat ol kainkain animal na ol animal i save kaikaim mit, na ol kainkain palai na snek, na ol kainkain pisin i stap long em. 7Na wanpela maus i tokim mi olsem, “Pita, yu kirap na yu kilim na kaikai.” 8Tasol mi tok, “BIKPELA, nogat, mi no save kaikai samting i no holi na i no klin.” 9Tasol maus i toktok gen namba tu taim na i tok, “Samting God i mekim klinpela yu no ken i tok em i no holi.” 10Na 3-pela taim dispela samting i kamap olsem, na laplap i go antap olgeta long heven. 11Harim, long dispela taim stret 3-pela man i kamap long haus we mi i stap long em. Ol i kam long taun Sisaria, em ol man Kornilius i bin salim i kam long mi. 12Na Holi Spirit i tokim mi long mi mas i go wantaim ol maski long mi skelim ol. Dispela 6-pela brata hia ol i go wantaim mi, na mipela i go insait long haus bilong dispela man. 13Na em i tokim mipela long em i lukim wanpela ensel i sanap long haus bilong em na i tokim em olsem, ‘Yu salim sampela man i go long taun Jopa bilong singautim wanpela man, nem bilong em Saimon na i gat narapela nem Pita. 14Em bai autim wanpela toktok long yu, na dispela toktok bai sevim yu wantaim femili na wanhaus bilong yu.’ 15Na taim mi toktok, orait Holi Spirit i kam daun long ol wankain olsem bipo Em i bin kam daun long yumi. 16Na mi holim tingting long tok BIKPELA i bin mekim. Em i bin tok, ‘Jon i baptaisim ol manmeri long wara, tasol yupela bai kisim baptais long Holi Spirit.’ 17Na sapos God i givim wankain presen long ol olsem Em i bin givim long yumi taim yumi i bilipim na trastim BIKPELA Jisas Krais, orait mi husat na bai mi pasim wok bilong God?” 18Orait, taim ol i harim dispela toktok, ol i no gat toktok moa. Na ol i litimapim nem bilong God, na ol i tok, “Em nau, God i orait long ol Jentail tu i tanim bel na i kisim laip.”
Sios i kamap long Antiok.
19Taim ol i bin kilim Stiven i dai na ol i stat long bagarapim sios na ol manmeri bilong sios i ranawe nabaut, orait sampela bilong ol i go longwe long distrik Fonisia na ailan Saiprus na taun Antiok. Na ol i autim tok bilong God, tasol ol i autim long ol manmeri Juda tasol. 20Tasol sampela bilong ol, ol i man bilong Saiprus na Sairini, taim ol kamap long taun Antiok, ol i tokaut long BIKPELA Jisas long ol lain Grik tu. 21Na strong bilong BIKPELA i stap wantaim ol, na ol planti manmeri i bilip, na ol i putim ol yet aninit long BIKPELA. 22Na sios i stap long Jerusalem i harim tok bilong dispela samting, na ol i salim Barnabas i go long Antiok. 23Na taim em i kamap na em i lukim grasia bilong God, orait em i kisim amamas, na em i strongim ol long ol i mas i stap feitful long BIKPELA na ol i no ken i sait sait. 24Long wanem, Barnabas em i gutpela man na Holi Spirit i pulap long em na i gat strongpela bilip. Na planti manmeri i kam insait long lain bilong BIKPELA. 25Em olsem na Barnabas i go long taun Tarsus bilong painim Sol, 26na taim em i lukim em pinis, orait em i kisim Sol i kam long Antiok. Na long wanpela yia olgeta tupela i bung wantaim sios na i skulim planti manmeri. Long Antiok tasol ol i yusim nem Kristen fes taim bilong makim ol disaipel.
27Long dispela taim ol sampela profet i lusim Jerusalem na i kam long taun Antiok. 28Wanpela bilong ol, nem bilong em Agabus, em i sanap na long strong bilong Holi Spirit em i autim tok profet olsem, “Bai kaikai i sot long olgeta hap long dispela graun.” Orait na taim Klodius i stap king dispela hevi i kamap. 29Em olsem na ol disaipel i laik helpim ol brata i stap long distrik Judia, na ol i pasim toktok na long strong bilong wan wan ol i bungim mani bilong helpim ol. 30Ol i mekim olsem na Barnabas na Sol i karim dispela mani i go long ol elda bilong sios.
