Aposel
Sios i salim Barnabas na Sol i go.
13
1Na long sios bilong taun Antiok i gat sampela profet na tisa i stap long em. Nem bilong ol i olsem, Barnabas, na Simeon narapela nem bilong em Niger, na Lusius bilong taun Sairini, na Manain poroman bilong gavana Herot, na Sol. 2Na taim ol i lotuim BIKPELA na i tambuim kaikai i stap, Holi Spirit i tokim ol, “Yupela makim Barnabas na Sol, bai tupela i mekim wok Mi bin singautim tupela long mekim.” 3Orait, ol i tambuim kaikai na i mekim prea, na taim ol i mekim pinis, ol i putim han bilong ol long tupela na salim tupela i go.
Barnabas na Sol i go long ailan Saiprus.
4Em olsem na Holi Spirit i salim tupela i go na tupela i go daun long taun Selusia. Long Selusia ol i kalap long sip na sip i kisim tupela i go long ailan Saiprus. 5Na taim tupela i kamap long taun Salamis, tupela i wok long autim tok bilong God long ol haus lotu bilong ol lain Juda. Na Jon i stap wantaim tupela bilong helpim tupela. 6Na taim tupela i bin raun long olgeta hap bilong Saiprus na i kamap long taun Pafos, tupela i mitim wanpela man bilong wokim mejik. Em i wanpela giaman profet bilong ol lain Juda, nem bilong em Bar-Jisas, 7 na em i stap wantaim gavana Sergius Paulus. Na dispela gavana, em i gat gutpela save, na em i singautim Barnabas na Sol. Long wanem, em i laik harim tok bilong God. 8Tasol dispela man bilong wokim mejik, narapela nem bilong em Elimas, em i wok long daunim tupela, bai gavana i no ken i kisim bilip. 9Tasol Sol, em i gat narapela nem Pol, Holi Spirit i pulap long em na em i lukluk strong long Elimas, 10 na em i tok, “Yu pikinini bilong Satan. Yu birua bilong olgeta stretpela pasin. Olgeta pasin bilong giaman na pasin nogut i pulap long yu. Yu no laik lusim dispela pasin we yu wok long brukim na tanim stretpela rot bilong BIKPELA. 11Harim. Han bilong BIKPELA i holim yu pinis na bai yu i stap aipas na longpela taim liklik yu no inap lukim san.” Na wantu ai bilong em i pas na tudak i kamap long em, na em i go nabaut na askim ol man long holim han bilong em bilong lidim em i go kam. 12Na taim gavana i lukim ol dispela samting, em i bilip. Long wanem, em i kirap nogut long tisim bilong BIKPELA.
Pol na Barnabas i go long Antiok bilong distrik Pisidia.
13Orait, Pol wantaim tupela pren bilong em, ol i lusim taun Pafos na sip i kisim ol i go long taun Perga long provins Pamfilia. Na Jon i lusim ol na em i go bek long Jerusalem. 14Tasol Pol na Barnabas i wokabaut i go moa na tupela i kamap long taun Antiok bilong distrik Pisidia. Na long de Sabat tupela i go sindaun insait long haus lotu bilong ol Juda. 15Wanpela man i ritim tok bilong Buk Lo na bilong Buk Profet, na taim em i ritim pinis ol hetman bilong haus lotu i salim tok i go long tupela na i tok, “Brata, sapos yupela i gat tok bilong strongim bel bilong ol manmeri, orait yupela ken i autim.” 16Em olsem na Pol i sanap na em i litimapim han na em i autim tok.
Na em i autim tok olsem, “Yupela ol man Israel na yupela ol narapela man i pret long God, yupela harim. 17God bilong lain Israel i bin makim ol tumbuna papa bilong mipela, na taim ol i stap long ples Isip Em i mekim ol i kamap bikpela lain manmeri. Na long bikpela strong bilong Em yet, God i lusim ol long ples Isip. 18Na long 40 yia samting, long ples i no gat man, Em i karim hevi bilong pasin nogut bilong ol. 19Na taim Em i distroim pinis ol 7-pela lain manmeri i sindaun long graun Kenan, orait Em i givim dispela graun long ol Israel, bai graun i ken i stap graun bilong ol yet. 20Ol dispela samting i kamap insait long 450 yia. Bihain long dispela God i givim ol jas long Israel na ol jas i stap i go i go inap long taim bilong profet Samuel i kamap. 21Long dispela taim ol i askim God long kamapim wanpela king bilong ol, na God i givim Sol long ol, em i pikinini bilong Kis, na em i man bilong lain Benjamin, na em i stap king 40 yia. 22Na taim God i rausim Sol pinis Em i kirapim Devit i stap king bilong ol. God i tokaut klia olsem, ‘Mi lukim Devit, pikinini bilong Jesi, em i man i laikim tru wei bilong Mi na em bai bihainim olgeta laik bilong Mi.’ 23Long lain bilong dispela man Devit, God i kisim Jisas, Man bilong Sevim manmeri, i kam long Israel olsem Em i bin promisim. 24Paslain long Jisas, Jon i autim tok long ol manmeri bilong Israel, na em i tok, ‘Yupela tanim bel na kisim baptais.’ 25Na taim Jon i klostu long pinisim wok bilong em, em i tok, ‘Yupela tingim mi husat? Mi no dispela man God i bin promisim. Nogat. Tasol harim. Bihain long mi wanpela man bai kam, na mi no fit bilong i stap wokboi bilong Em na lusim rop bilong su bilong Em.’
26“Ol brata, ol pikinini bilong femili bilong Abraham na yupela ol narapela man i pret long God, yupela harim. Dispela tok i tokaut long pasin God i mekim bilong sevim manmeri, God i salim dispela tok i kam long yumi. 27Ol manmeri bilong Jerusalem na ol hetman bilong ol, ol i no luksave long Jisas na ol i no kauntim gut toktok ol profet i bin mekim na ol i ritim long olgeta Sabat. Em olsem na taim ol i daunim Jisas na i laik kilim Em i dai, em nau ol i fulfilim tok bilong ol profet. 28Na maski ol i no lukim wanpela rong bilong kotim Em na kilim Em i dai, ol i go askim Pailat long kilim Em i dai. 29Em olsem na taim ol mekim pinis olgeta samting ol profet i bin tokaut long ol bai i mekim, ol i rausim Em long diwai na slipim Em long wanpela matmat. 30Tasol God i kirapim Em long matmat. 31Na ol man i bin lusim distrik Galili i go long Jerusalem wantaim Em, planti de ol i bin lukim Em. Nau ol i stap witnis bilong Em long ol manmeri. 32Na mipela i kisim gutnius i kam long yupela olsem, samting God i bin promisim ol tumbuna papa, 33Em i fulfilim long yumi ol pikinini bilong ol, taim Em i kirapim Jisas. Buk Song namba 2 i tokaut long dispela samting tu, na i tok olsem,
“ ‘Yu Pikinini Man bilong Mi.
Tude Mi karim Yu.’
(Buk Song 2:7)
34Em i kirapim Em long matmat na i no inap i dai gen. Long dispela samting God i bin tok olsem,
“ ‘Bai Mi givim Yu holi na trupela blesim bilong Devit.’
(Aisaia 55:3)
35Long dispela as God i mekim tok long narapela song bilong Buk Song, na Em i tok,
“ ‘Yu no inap larim Holi Man bilong Yu i sting long matmat.’
(Buk Song 16:10)
36Taim God i yusim Devit inap pinis bilong kamapim laik bilong Em long jeneresen bilong em, Devit em i slip na ol i planim em wantaim ol papa bilong em na em i sting long matmat. 37Tasol God i kirapim Jisas na bodi bilong Em i no sting. 38Ol brata, long dispela as tasol mipela ken i tokim yupela na yupela ken i save, long wok bilong dispela man Jisas God i ken i fogivim sin bilong yupela. Na husat manmeri i bilip, Jisas i friim ol long olgeta samting 39 lo bilong Moses i no inap friim ol long em. 40Yupela mas lukaut. Long wanem, nogut samting i kamap long yupela olsem ol profet i bin tok. Ol i bin tok,
41“ ‘Lukluk, yupela ol man i tok bilas long trupela tok,
yupela kirap nogut na yupela lus.
Long wanem, Mi mekim wok long taim bilong yupela yet,
na dispela wok yupela no save bilipim na trastim,
maski wanpela man i kam tokim yupela.’ ”
(Habakuk 1:5)
42Na taim tupela i go autsait, olgeta manmeri i askim tupela, “Plis, long neks wik Sabat yupela mas kam na autim dispela tok gen long mipela.” 43Na taim ol man i bung long haus lotu bilong ol Juda i go nabaut, orait ol planti manmeri Juda na ol planti narapela manmeri i trupela manmeri bilong lotuim God, ol i bihainim Pol na Barnabas. Taim tupela i toktok wantaim ol, tupela i strongim ol long bihainim grasia bilong God moa yet.
44Long neks wik Sabat klostu olgeta manmeri bilong taun i kam bung bilong harim tok bilong BIKPELA. 45Tasol taim ol man Juda i lukim planti manmeri i kam bung, ol i jelas na ol i tok pait wantaim Pol na ol i wok long daunim Pol. 46Na Pol na Barnabas tupela i no pret na tupela i tok, “Mitupela i mas autim tok bilong God long yupela pastaim. Tasol yupela i givim baksait long dispela tok na yupela no laik kisim laip i stap oltaim oltaim, na long dispela as, harim, mitupela bai i go long ol Jentail. 47Long wanem, BIKPELA i tokim mipela pinis olsem, na Em i tok,
“ ‘Mi mekim yupela i stap wanpela lait bilong ol Jentail,
bai yupela i tokaut long pasin God i mekim
bilong sevim manmeri,
na bai yupela i karim dispela tok i go
long olgeta 4-kona bilong dispela graun.’ ”
(Aisaia 49:6)
48Na taim ol Jentail manmeri i harim tok bilong tupela, ol i amamas na i tok, “Tok bilong Bikpela i gutpela tru.” Na ol manmeri God i bin makim bilong kisim laip i stap oltaim oltaim, ol dispela manmeri i bilip. 49Na tok bilong Bikpela i go nabaut long olgeta ples bilong dispela hap. 50Tasol ol man Juda i kirapim tingting bilong ol lotu meri i gat biknem wantaim ol hetman bilong taun, na ol i kirapim bikpela trabel long Pol na Barnabas, na ol i rausim tupela long distrik bilong ol. 51Tasol tupela i rausim das long lek bilong tupela bilong makim ol, na tupela i go long taun Aikoniam. 52Na ol disaipel bilong taun Antiok i amamas tru na Holi Spirit i pulap long ol.
