Aposel
Bikpela bung bilong Jerusalem.
15
1Tasol sampela man bilong distrik Judia i kam long taun Antiok na ol i skulim ol brata olsem, “Sapos yupela no katim skin bilong yupela olsem Moses i bin skulim ol man long mekim, orait God i no inap kisim bek yupela.” 2Ol i tok olsem na Pol wantaim Barnabas i tok strong bilong daunim dispela tok na bikpela tok pait i kamap. Na ol brata ol i makim Pol na Barnabas wantaim ol sampela man na i salim ol i go long Jerusalem long ol aposel na elda, bilong askim ol long dispela samting. 3Em olsem na sios i salim ol i go, na taim ol i wokabaut long distrik Fonisia na Samaria ol i visitim ol wan wan sios, na ol i stori long ol Jentail manmeri i tanim bel na i bilip, na dispela tok i kamapim bikpela amamas long ol brata. 4Na taim ol i kamap long Jerusalem, orait sios wantaim ol aposel na ol elda i welkamim ol. Na Pol na Barnabas i stori long olgeta samting God i bin mekim long tupela. 5Tasol sampela bilipman bilong ol lain Farisi ol i sanap na i tok, “Ol Jentail ol i mas katim skin, na ol i mas bihainim lo bilong Moses.”
6Na ol aposel na ol elda i bung wantaim bilong skelim dispela toktok. 7Na taim ol i diskas i go kam planti, orait Pita em i sanap na i tokim ol, “Ol brata, yupela save olsem, pastaim God i bin makim mi long namel long yupela, bai ol Jentail i harim na bilipim tok bilong gutnius long maus bilong mi. 8God Em i save long bel bilong olgeta manmeri, na Em i witnisim bel bilong ol na i givim Holi Spirit long ol olsem Em i bin givim long mipela. 9Na Em i no mekim wanpela pasin long mipela na i mekim narapela pasin long ol. Nogat. Long rot bilong bilip tasol Em i mekim bel bilong ol i kamap klin. 10Em olsem na long wanem as yupela i laik traim God na i pasim hevipela samting long nek bilong ol disaipel? Ol papa bilong yumi i no gat strong bilong karim dispela samting na yumi tu i no gat strong bilong karim. 11Tasol mipela bilip olsem, God i sevim mipela long wok bilong grasia bilong BIKPELA Jisas, na God i sevim ol Jentail long wankain pasin.”
12Na olgeta man bilong bung i pasim maus na i no gat nois. Na ol i putim ia bilong ol i go long toktok bilong Barnabas na Pol na tupela i stori long olgeta sain na mirakel God i bin mekim long han bilong tupela namel long ol Jentail manmeri. 13Taim tupela i toktok pinis, orait Jems i tok, “Ol brata, harim tok bilong mi. 14Saimon i tokim yumi pinis long fes wok bilong God long ol Jentail, na God i makim sampela bilong ol, bilong kamapim lain bilong Em yet. 15Na tok bilong ol profet i wankain. Ol i raitim tok olsem,
16“ ‘Bihain bai Mi kam bek,
na haus sel bilong Devit i pundaun pinis, bai Mi wokim gen.
Ol samting i bagarap bai Mi sanapim,
na bai Mi mekim nupela gen.
17-18Mi bai mekim olsem, bai ol manmeri Mi makim,
na ol Jentail i kisim nem bilong Mi,
i ken i painim BIKPELA.
BIKPELA i mekim dispela toktok,
na long bipo tru Em save mekim dispela tok i stap ples klia.’
(Amos 9:11, 12)
19Em olsem na tingting bilong mi i olsem, mipela no ken i givim hevi long ol Jentail manmeri i tanim i kam long God. 20Tasol mipela ken i raitim wanpela pas long ol na tokim ol olsem, ‘Yupela no ken i kaikaim kaikai ol man i bin ofaim long ol aidol, na yupela lusim ol pasin i pamuk pasin, na yupela no ken i kaikaim abus ol man i pasim nek bilong kilim i dai, na yupela no ken i kaikaim blut.’ 21Long wanem, long bipo yet i kam long nau, long olgeta taun, i gat ol man i stap bilong autim tok bilong Moses. Long haus lotu bilong ol Juda, long olgeta de Sabat, ol i save ritim tok bilong Moses.”
Ol i salim pas long ol Jentail i bilip.
22Orait, ol aposel na ol elda wantaim olgeta manmeri bilong sios, ol i tingim i gutpela long makim ol sampela man bilong ol yet na salim ol i go long taun Antiok wantaim Pol na Barnabas. Ol i salim Judas narapela nem bilong em Barsabas, na Sailas. Tupela i gat nem namel long ol brata. 23Na long han bilong tupela ol i salim pas i go. Na pas i tok,
“Mipela ol brata, ol aposel wantaim ol elda, mipela i salim dispela pas long yupela ol brata bilong ol lain Jentail i stap long taun Antiok na long provins Siria na Silisia.
Mipela i tok gude long yupela.
24Mipela i harim pinis, sampela man bilong mipela i go long yupela, na toktok ol i mekim i givim hevi long yupela na yupela tingting planti. Mipela no tokim ol long mekim dispela kain tok. 25Na mipela i kamapim wanbel na mipela i tingim i gutpela long makim tupela man na salim tupela i go wantaim tupela brata mipela lavim tumas, Barnabas na Pol. 26Klostu Barnabas na Pol i bin lusim laip bilong tupela bilong mekim wok bilong Jisas Krais, Bikpela bilong yumi. 27Em olsem na mipela i salim Judas na Sailas i go long yupela, bai yupela i ken i harim tok bilong mipela long maus bilong tupela yet. 28Long wanem, Holi Spirit na mipela i tingim i gutpela long mipela no ken i givim planti toktok long yupela na yupela kisim hevi. Nogat. Mipela i givim dispela tok tasol long yupela, 29‘Yupela no ken i kaikaim kaikai ol man i bin ofaim long ol aidol, na yupela no ken i kaikaim blut, na yupela no ken i kaikaim abus ol man i pasim nek bilong kilim i dai, na yupela lusim ol pasin i pamuk pasin.’ Sapos yupela abrusim ol dispela samting, em i gutpela.
Em tasol.”
30Orait ol i salim ol na ol i go daun long taun Antiok. Na taim ol i bungim sios long Antiok, ol i givim pas long ol. 31Na sios i ritim pas na ol i kisim bikpela amamas. Long wanem, toktok bilong pas i strongim ol. 32Judas na Sailas, tupela i profet, na tupela i mekim planti toktok bilong sapotim na strongim ol brata. 33Na taim tupela i stap longpela taim liklik, orait ol brata i salim tupela i go bek gen, wantaim bel isi, long ol lain i bin salim ol i kam. 35Tasol Pol na Barnabas i stap yet long Antiok na tupela wantaim ol narapela man i tisim na autim tok bilong BIKPELA.
Pol na Barnabas tupela i bruk.
36Bihain, Pol i tokim Barnabas, “Yumi go bek na visitim ol brata i stap long ol taun we yumi bin autim tok bilong BIKPELA, na yumi sekim ol.” 37Na Barnabas i laik kisim Jon, narapela nem bilong em Mak, i go wantaim. 38Tasol Pol i tingim i no gutpela long kisim em i go wantaim. Long wanem, long Pamfilia em i bin lusim tupela na em i no go wantaim tupela long wok. 39Na tupela no wanbel liklik. Em olsem na tupela i bruk. Na Barnabas i kisim Mak na tupela i kisim sip i go long ailan Saiprus. 40Tasol Pol i makim Silas na em i go. Na ol brata i pasim em long grasia bilong God. 41Na em i wokabaut long provins Siria na Silisia na em i strongim ol sios.
