Aposel

Timoti i go wantaim Pol na Sailas.

16

¹Na Pol i go kamap long taun Derbe na Listra. Long dispela ples wanpela disaipel i stap, nem bilong em Timoti. Mama bilong em i meri Juda na em i bilipmeri, tasol papa bilong em i man Grik. ²Ol brata bilong taun Listra na Aikoniam ol i tok Timoti em i wanpela gutpela man. ³Pol i laik Timoti i go wantaim em, na em i kisim em na katim skin bilong em. Long wanem, Pol i tingim ol man Juda, planti ol i stap long dispela hap, na ol i save papa bilong Timoti em i man Grik. ⁴Na taim ol i wokabaut i go long ol taun, ol i tokim ol sios long tok ol aposel na ol elda bilong Jerusalem i bin mekim, bai ol i bihainim dispela tok. ⁵Em olsem na ol sios i kamap strong long bilip, na long olgeta de namba bilong ol i kamap moa.

Man Masedonia i singautim Pol.

⁶Na ol i brukim distrik Frigia na Galesia na i go. Long wanem, Holi Spirit i tambuim ol long autim tok long provins Esia. ⁷Na taim ol i kamap klostu long distrik Misia, ol i laik i go insait long provins Bitinia, tasol Spirit bilong Jisas i stopim ol. ⁸Em olsem na ol i brukim distrik Misia na ol i go daun long taun Troas. ⁹Na long nait Pol i lukim visin. Em i lukim wanpela man bilong provins Masedonia i sanap i stap na em i singautim Pol olsem, “Plis, yu kam long Masedonia na helpim mipela.” ¹⁰Na taim Pol i lukim pinis dispela visin, orait wantu mipela i redim ol samting bilong mipela i go long Masedonia. Long wanem, mipela i tingim God i laik mipela i autim gutnius long ol manmeri Masedonia.

Lidia i tanim bel na i bilip.

¹¹Em olsem na mipela i kalap long sip na sip i kisim mipela i go stret long ailan Samotres, na long neks de i kisim mipela i go long taun Neapolis. ¹²Na mipela i lusim Neapolis na i go long taun Filipai. Filipai em i namba wan taun bilong dispela hap bilong provins Masedonia, na ol lain Rom i lukautim dispela taun. Na mipela i stap sampela de long Filipai. ¹³Na long de Sabat mipela i go autsait long banis bilong taun na mipela go daun long wanpela wara. Mipela tingim olsem, ol manmeri i gat ples bilong prea long dispela hap. Na sampela meri i bung i stap na mipela sindaun na autim tok long ol. ¹⁴Na wanpela meri bilong taun Taiataira i sindaun na i harim tok bilong mipela, nem bilong em Lidia. Em i wok bisnis long ol purpel laplap, na em save lotu long God. Na BIKPELA i opim bel bilong Lidia bilong Lidia i ken i kisim dispela tok Pol i autim. ¹⁵Na taim Lidia wantaim ol femili bilong em i kisim baptais, em i tokim mipela olsem, “Sapos yupela tingim olsem mi kisim trupela bilip long BIKPELA, orait plis yupela kam na i stap long haus bilong mi.” Na em i strong tumas na mipela i go stap wantaim em.

Ol i kalabusim Pol na Sailas.

¹⁶Wanpela de, taim mipela i wokabaut i go long ples bilong mekim prea, wanpela yangpela slevmeri i bungim mipela. Em i gat wanpela spirit i stap long em na i gat strong bilong kamapim ples klia ol samting i hait. Na oana bilong dispela yangpela slevmeri i save kamapim bikpela mani long dispela samting. ¹⁷Na dispela yangpela slevmeri i bihainim Pol na mipela na em i singaut olsem, “Ol dispela man ol i wokman bilong God Antap Tru na ol i tokaut long pasin God i mekim bilong sevim manmeri.” ¹⁸Long planti de em i mekim olsem na Pol i les tru. Na em i tanim na i tokim spirit, “Mi tokim yu, long nem bilong Jisas Krais yu lusim em.” Na wantu spirit i lusim em.

¹⁹Tasol, taim oana bilong dispela meri i klia olsem ol i no inap kisim mani moa long em, orait ol i holim Pol na Silas na ol i pulim tupela i go long maket ples na sanapim tupela long ai bilong ol hetman. ²⁰Ol i putim tupela i kam long mejistret na ol i tok, “Dispela tupela man, tupela i man Juda, na tupela i distebim mipela ol manmeri bilong taun. ²¹Tupela i skulim mipela long ol kastem pasin i tambu long mipela ol Rom i kisim na bihainim.” ²²Ol planti manmeri i kam i stap na ol tu i sutim tok long tupela. Na ol mejistret i brukim na rausim klos bilong tupela na i givim oda, “Paitim tupela long stik.” ²³Na taim ol i paitim tupela nogut tru, orait ol i tromoi tupela long kalabus na ol i tokim sikuriti long em i mas was gut long tupela. ²⁴Orait sikuriti i harim tok na em i putim tupela long sel i stap insait tru long kalabus na em i pasim lek bilong tupela long diwai.

Sikuriti i tanim bel na i bilip.

²⁵Long biknait Pol na Sailas i mekim prea na i singim song i givim biknem long God, na ol kalabusman i harim i stap. ²⁶Na wantu bikpela guria i kamap na i sekim olgeta as ston bilong kalabus. Na wantu olgeta dua i op na sen bilong olgeta kalabusman i lus. ²⁷Na taim sikuriti i kirap long slip bilong em na em i lukim dua bilong olgeta sel i op, orait em i kisim sod bilong em na em i laik pinisim laip bilong em yet. Long wanem, em i tingim olsem ol kalabusman i ranawe pinis. ²⁸Tasol Pol i bikmaus, “Mipela olgeta i stap, olsem na yu no ken bagarapim yu yet.” ²⁹Na sikuriti i singaut long lam, na em i ran i kam insait long sel, na em i pret na seksek na em i pundaun klostu long Pol na Sailas. ³⁰Na em i kisim tupela i go autsait na em i tok, “Tupela bikman, mi mas mekim wanem samting na bai God i sevim mi?” ³¹Na tupela i tok, “Bilip long BIKPELA Jisas na bai God i sevim yu, wantaim ol wanhaus bilong yu.” ³²Na tupela i autim tok bilong BIKPELA long em na long olgeta manmeri i stap long haus bilong em. ³³Em i biknait na dispela sikuriti man i kisim tupela na i wasim sua bilong tupela. Na em i kisim baptais, em wantaim ol femili bilong em. ³⁴Na em i kisim tupela i go long haus bilong em na em i givim kaikai long tupela. Na em i mekim bikpela amamas wantaim olgeta manmeri i stap long haus bilong em, long wanem, em i bilip long God.

³⁵Tasol, taim san i kamap, ol mejistret i salim polis i kam long kalabus na ol i tok, “Lusim dispela tupela man i go fri.” ³⁶Na sikuriti bilong kalabus i tokim Pol long toktok bilong ol mejistret na em i tok, “Ol mejistret i laik mi lusim yupela long kalabus. Em olsem na yupela kam autsait na yupela bel isi na i go.” ³⁷Tasol Pol i tokim ol olsem, “Mitupela i sitisen bilong Rom. Tasol ol i no kotim mitupela na kamapim wanpela rong bilong mitupela. Nogat. Ol i paitim mitupela nating long ai bilong ol manmeri na ol i putim mitupela long kalabus. Nau ol i laik lusim mitupela long rot hait. Tasol nogat! Ol yet i mas kam na kisim mitupela i go autsait.” ³⁸Ol polis i go bek na tokim ol mejistret long toktok bilong Pol. Na taim ol i harim olsem tupela i sitisen bilong Rom, orait ol i pret. ³⁹Em olsem na ol i kam na tok sori long tupela. Na ol i kisim tupela i kam autsait na ol i askim tupela long lusim taun na i go. ⁴⁰Em olsem na tupela i lusim kalabus na tupela i go long haus bilong Lidia. Na tupela i bungim ol brata pastaim na strongim ol na tupela i lusim ol na i go.