Aposel

Pol na Sailas i wok long Tesalonaika.

17

¹Na taim tupela i abrusim taun Amfipolis na Apolonia, orait tupela i kamap long taun Tesalonaika. Long dispela taun i gat wanpela haus lotu bilong ol Juda i stap. ²Na Pol i bihainim pasin bilong em na em i go insait long dispela haus lotu bilong bungim ol manmeri. Long 3-pela de Sabat em i yusim tok bilong God na i mekim gutpela toktok bilong kliaim tingting bilong ol. ³Em i tokaut klia na i soim ol olsem, Krais i mas safa na kirap bek gen long dai. Pol i tokim ol, “Dispela Jisas, nau mi tokim yu long Em, Em i Krais.” ⁴Sampela bilong ol Juda i bilip na ol i bihainim Pol na Sailas. Na tu, planti bilong ol Grik i trupela manmeri bilong lotuim God, wantaim planti liklik bilong ol bikpela meri, ol i bilip na i bihainim Pol na Sailas. ⁵Tasol ol lain Juda i jelas. Ol i kisim ol man nogut i stap nabaut, na ol i bungim ol wantaim ol planti manmeri, na ol i kirapim tingting bilong ol na ol i raun na mekim bikpela trabel nabaut insait long taun. Na ol i banisim haus bilong Jeson. Long wanem, ol i wok long painim Pol na Sailas bilong kisim tupela i kam autsait long ol dispela bikpela lain manmeri. ⁶Tasol ol i no lukim tupela. Em olsem na ol i pulim Jeson wantaim ol sampela brata i kam long ol hetman bilong taun, na ol i bikmaus olsem, “Tupela man i save mekim trabel long olgeta hap, nau tupela i kam long hia tu, ⁷na Jeson i kisim tupela. Olgeta i sakim tok bilong Sisa, na ol i save tok, “Narapela king i stap, nem bilong em Jisas.” ⁸Na ol manmeri wantaim ol hetman bilong taun ol i harim dispela tok na ol i bel nogut. ⁹Na ol i fosim Jeson na ol brata i baim mani pastaim na ol i lusim ol i go.

Pol na Sailas i wok long Beria.

¹⁰Long nait ol brata i hariap na salim Pol na Sailas i go long taun Beria. Taim tupela i kamap pinis long Beria, orait tupela i go insait long haus lotu bilong ol Juda. ¹¹Na ol manmeri Juda i stap long dispela hap ol i gutpela na ol i no wankain olsem ol man Juda bilong taun Tesalonaika. Ol i harim tok gutpela, na long olgeta de ol i skelim Tok bilong God bilong ol i ken save, tok bilong tupela i tru o nogat. ¹²Long dispela as planti bilong ol i bilip. Na planti ol Grik meri i gat biknem, na ol man tu, ol i bilip. ¹³Tasol, taim ol man Juda bilong Tesalonaika i harim Pol na Sailas i autim tok bilong God long Beria tu, orait ol i kam long Beria na ol i sikrapim bel na tingting bilong ol planti manmeri. ¹⁴Em olsem na ol brata i hariap na salim Pol i go daun long nambis. Tasol Silas na Timoti tupela i stap long Beria. ¹⁵Na ol man i sikuriti long Pol, ol i go lusim em long taun Atens. Na Pol i tokim ol, “Tokim Sailas na Timoti na tupela i mas hariap na kam long mi.” Ol i kisim tok pinis na ol i lusim Pol na i go.

Pol i wok long Atens.

¹⁶Na Pol i stap long taun Atens na em i wetim tupela. Na em i lukim taun i pulap long ol planti aidol, na bel bilong em i hevi tru long dispela samting. ¹⁷Em olsem na em i go long haus lotu bilong ol Juda na em i mekim gutpela toktok bilong kliaim tingting bilong ol Juda wantaim ol manmeri i trupela manmeri bilong lotuim God. Na olgeta de em i go long maket ples na em i mekim wankain long ol manmeri i stap long maket. ¹⁸Na sampela saveman bilong ol lain Epikurian na bilong ol lain Stoik ol i toktok wantaim Pol. Sampela bilong ol i tok, “Dispela man bilong toktok planti, em i tok wanem?” Na ol narapela i tok, “Ating em i autim tok bilong ol god bilong ol longwe lain.” Ol i tok olsem bikos Pol i autim tok i tokaut long Jisas na long kirap bek bilong Em. ¹⁹Na ol i kisim Pol i go long kaunsil bilong Areopagus. Ol i tok, “Mipela laik harim dispela nupela tok yu save autim. ²⁰Long wanem, samting yu tokaut long em, em i narapela kain samting olgeta, na mipela laik save long as na minim bilong dispela tok bilong yu.” ²¹Olgeta manmeri bilong Atens wantaim olgeta longwe manmeri i kam i stap long Atens, olgeta taim ol i laik mekim na harim nupela tok tasol.

Pol i autim tok long Areopagus.

²²Em olsem na Pol i sanap namel long ol kaunsil bilong Areopagus na em i tok, “Yupela ol man bilong Atens, mi save, yupela i strong moa long lotu. ²³Long wanem, taim mi wokabaut mi lukim ol samting yupela i save lotuim. Na mi lukim wanpela alta tu, na ol i bin raitim tok long em olsem, ‘Dispela em bilong wanpela god mipela no save long em.’ Orait, dispela samting yupela no save na yupela lotuim, nau mi bai tokim yupela. ²⁴God husat i bin wokim graun na olgeta samting i stap long em, Em i BIKPELA bilong heven na graun, na long dispela as Em i no save stap long ol haus lotu ol man i wokim. ²⁵Na Em i no sot long wanpela samting bai ol manmeri i lotuim Em na givim ol samting long Em. Nogat. Em tasol i save givim laip na win na olgeta samting long ol manmeri. ²⁶Long wanpela man tasol Em i bin kamapim olgeta lain manmeri na ol i sindaun long olgeta 4-kona bilong dispela graun. Em i bin makim taim bilong ol na Em i bin makim graun bilong ol i ken i sindaun i stap. ²⁷Em i mekim olsem bai ol i tingim Em, na bai ol i kam long Em na save long Em. Em i no stap longwe long yumi wan wan. ²⁸Long wanem,

“ ‘Long strong bilong Em tasol
yumi i kisim laip na i wokabaut na i stap.’

Ol sampela saveman bilong yupela i bin tok,

“ ‘I tru, yumi pikinini bilong Em.’

²⁹Yumi pikinini bilong Em, olsem na yumi no ken i tingim olsem God Em i gol samting o silva samting o ston samting. Em i no imis samting ol manmeri i wokim long tingting na save bilong ol. Nogat. ³⁰Pastaim God i larim ol manmeri i no gat save na i stap nating. Tasol nau, Em i tok strong long olgeta man long olgeta hap bilong dispela graun olsem, ‘Yupela i mas tanim bel.’ ³¹Long wanem, Em i bin makim wanpela de we Em bai kotim olgeta manmeri. Em bai mekim olsem long stretpela pasin bilong Em. Na Em i makim wanpela man na Em bai i stap jas bilong dispela kot. Na taim God i kirapim dispela man long matmat Em i soim olgeta manmeri dispela i tru tumas.”

³²Na taim ol kaunsil bilong Areopagus i harim dispela toktok long man i kirap long matmat, ol i rabisim tok bilong Pol. Tasol sampela bilong ol i tok, “Mipela ken i harim dispela tok gen.” ³³Em olsem na Pol i lusim ol i go. ³⁴Tasol ol sampela man i bihainim Pol na ol i bilip. Wanpela man bilong kaunsil bilong Areopagus, nem bilong em Dionisius, na wanpela meri, nem bilong em Damaris, wantaim ol narapela manmeri, ol i bilip.