Aposel

Pol i wok long Efesus.

19

¹Taim Apolos i stap long taun Korin, orait Pol i wokabaut long maunten rot na i kamap long taun Efesus. Long Efesus em i bungim ol sampela disaipel. ²Na Pol i tokim ol, “Taim yupela bilip, yupela bin kisim Holi Spirit o nogat?” Na ol i tok, “Nogat. Mipela no harim olsem Holi Spirit i stap.” ³Na Pol i tok, “Orait na yupela kisim wanem baptais?” Na ol i tok, “Mipela kisim baptais bilong Jon.” ⁴Na Pol i tok, Jon i baptaisim ol manmeri long baptais bilong tanim bel. Em i tokim ol manmeri, ol i mas bilip long man i kam bihain long em, na dispela man Em i Jisas.” ⁵Ol i harim dispela tok na ol i kisim baptais long nem bilong BIKPELA Jisas. ⁶Na taim Pol i putim han bilong em long ol, orait Holi Spirit i kam long ol na ol stat na mekim toktok long ol narapela tokples na ol i mekim tok profet. ⁷Na ol dispela lain i 12-pela man olgeta i stap.

⁸Na Pol i go long haus lotu bilong ol Juda. Long 3-pela mun olgeta em i strong long autim tok long ol. Em i mekim gutpela tok bilong kliaim tingting bilong ol na em i wok long stiaim tingting bilong ol long ol samting bilong kingdom bilong God. ⁹Tasol sampela bilong ol i pasim bel na i no laik bilip, na long ai bilong kongregesen ol i tok nogut long Rot. Em olsem na Pol i lusim ol na i kisim ol disaipel i go wantaim em. Na long olgeta de, long haus skul bilong Tiranus, em i mekim gutpela tok bilong kliaim tingting bilong ol manmeri. ¹⁰Long 2-pela yia Pol i mekim olsem. Em olsem na olgeta manmeri bilong provins Esia i harim tok bilong BIKPELA, ol manmeri Juda na ol Grik wantaim.

Ol pikinini man bilong Skeva.

¹¹Na God i wokim ol narapela kainkain mirakel long han bilong Pol. ¹²Em olsem na wanem hankisip o laplap i tasim skin bilong Pol, ol i karim i go long ol sikman na sik bilong ol i pinis na ol spirit nogut i lusim ol. ¹³Na ol sampela Juda, ol i save raun na wok bisnis long rausim ol spirit nogut, ol i traim na kolim nem bilong BIKPELA Jisas bilong rausim ol spirit nogut. Ol i tokim ol spirit nogut, “Pol i tokaut long Jisas, na long nem bilong dispela Jisas mipela tokim yupela, yupela lusim na i go.” ¹⁴Na 7-pela pikinini man bilong Skeva i bihainim dispela pasin. Skeva em i wanpela namba wan het pris bilong ol Juda. ¹⁵Tasol, spirit nogut i bekim tok bilong ol olsem, “Mi save long Jisas, na mi klia long Pol, tasol yupela husat?” ¹⁶Na man we spirit nogut i stap long em, em i kalap long ol na i paitim na winim ol tru. Em i mekim olsem na ol i bagarap nogut tru na ol i lusim haus na ranawe skin nating. ¹⁷Bihain, olgeta manmeri bilong taun Efesus, ol Juda na Grik wantaim, olgeta i harim tok long dispela samting na ol i pret. Na ol i rispektim moa nem bilong BIKPELA Jisas. ¹⁸Na ol planti bilip manmeri ol i kam na ol i konfesim na autim pasin nogut ol i bin mekim. ¹⁹Na sampela manmeri, ol manmeri bilong wokim ol mejik samting, ol i kisim ol buk mejik bilong ol i kam na ol i kukim long ai bilong olgeta manmeri. Ol i kauntim pe bilong ol dispela buk na em i kamap 50,000 silva mani. ²⁰Em olsem na tok bilong BIKPELA i ran i go moa na em i no lus liklik.

Bikpela trabel i kamap long Efesus.

²¹Bihain long ol dispela samting, Holi Spirit i givim tingting na Pol i wokim disisen olsem, “Bai mi raun i go long provins Masedonia na Akaia na mi go olgeta long Jerusalem. Na bihain long Jerusalem bai mi go long taun Rom.” ²²Na Pol i salim Timoti na Erastus, tupela helpim bilong em, i go long Masedonia, tasol em yet i stap sampela taim moa long provins Esia.

²³Na long dispela taim ol birua bilong Rot i kirapim bikpela trabel. ²⁴Wanpela man, nem bilong em Demitrius, em i save wokim ol samting long silva na em i save wokim ol imis samting long god Artemis. Olsem na, em i save givim planti wok long ol wokman bilong silva na ol i kisim bikpela mani. ²⁵Na em i singautim ol dispela wokman wantaim ol narapela wokman na ol i kam bung. Na em i tokim ol, “Yupela ol man, yupela save olsem, yumi save kisim mani bilong yumi long dispela wok bisnis. ²⁶Long taun Efesus na long planti hap bilong provins Esia dispela man Pol i pulim planti manmeri na em i paulim tingting bilong ol. Yupela lukim na harim pinis. Na em i tok, ‘Ol god ol man i wokim long han bilong ol, ol i no god trutru.’ ²⁷Dispela tok bilong Pol i ken i bagarapim gutpela nem bilong wok bisnis bilong yumi. Ol manmeri bilong Esia na bilong olgeta wol, ol i save lotu long bikpela meri god Artemis. Tasol tok bilong Pol i ken i mekim tempel bilong Artemis i kamap samting nating long tingting bilong ol manmeri, na biknem bilong em i ken i pinis olgeta.”

²⁸Ol i harim dispela tok na ol i belhat nogut tru. Na ol i mekim bikmaus olsem, “Artemis bilong mipela ol manmeri Efesus i nambawan tru!” ²⁹Em olsem na bikpela nois i kamap long taun. Na olgeta manmeri ol i ran i go na ol i holim Gaius wantaim Aristarkus na ol i pulim tupela i go long bikpela ples bung. Tupela i man bilong provins Masedonia na tupela i save wokabaut wantaim Pol. ³⁰Na Pol i laik go na toktok long ol manmeri long bikpela ples bung, tasol ol disaipel i stopim em. ³¹Na tu, ol sampela man bilong gavman bilong provins Esia, ol i frens bilong Pol, na ol i salim tok long em na ol i tok, “Plis, yu no ken i go insait long bikpela ples bung.” ³²Na long bikpela ples bung ol sampela manmeri i bikmaus long wanpela samting, na ol narapela manmeri i bikmaus long narapela samting. Long wanem, tingting bilong ol i paul na planti bilong ol i no save long wanem as ol i kam bung. ³³Na ol manmeri Juda i subim Aleksander i go sanap long ai bilong ol, na ol planti manmeri i tokim em, “Yu tok.” Aleksander i litimapim han na em i laik mekim tok bilong difenim ol lain bilong em. ³⁴Tasol, taim ol i luksave olsem Aleksander em i man Juda, orait ol i bikmaus na mekim wanpela tok tasol, “Artemis bilong mipela ol manmeri Efesus i nambawan tru!” Ol i mekim bikmaus olsem inap long 2-pela aua.

³⁵Orait, kuskus bilong taun Efesus i sarapim ol manmeri na em i tokim ol olsem, “Yupela ol man Efesus, olgeta manmeri i save pinis olsem, taun Efesus i save lukautim tempel bilong bikpela Artemis wantaim ston tambu i pundaun long skai. ³⁶I no gat kwesten mak long dispela samting. Olsem na, mobeta yupela sindaun isi na tingting gut pastaim. ³⁷Long wanem, dispela tupela man yupela i kisim i kam long hia, tupela i no bin bagarapim wanpela samting bilong tempel bilong meri god bilong yumi na tupela i no bin tok bilas long em. Nogat. ³⁸Sapos Demitrius na ol wanwok i stap wantaim em i gat komplen, orait kot i stap na ol gavana i stap na ol i ken i kot. ³⁹Tasol, sapos yupela i gat sampela tok moa, orait yupela mas bihainim lo na yupela bung na stretim. ⁴⁰Nau yumi bung nating na mekim bikmaus na i gat kot long dispela kain pasin. Sapos ol i askim yumi long as bilong dispela bung, em nau yumi no gat toktok.” ⁴¹Na em i tok pinis na em i salim ol manmeri i go.