Aposel
1“Ol brata na ol papa, mi laik yupela harim dispela tok nau mi mekim bilong difenim mi yet.”
2Na taim ol i harim Pol i toktok long tokples Hibru, orait ol i stap isi tru na i no gat nois. Na Pol i tok,
3“Mi man Juda. Mama i karim mi long taun Tarsus long provins Silisia. Tasol mi kamap bikpela long hia long dispela taun. Na mi sumatin bilong Gamaliel. Em i bin skulim mi gutpela tru long olgeta samting bilong lo bilong ol tumbuna papa bilong yumi. Na mi bin hatwok long bihainim ol samting bilong God, wankain olsem yupela i kam i stap nau long hia. 4Mi bin mekim wok bilong bagarapim ol manmeri i bihainim Rot, na mi i no wari long kilim ol i dai. Mi bin pasim han lek bilong ol na kalabusim ol, em ol man na ol meri tu. 5Namba wan het pris na olgeta bikman bilong kaunsil i ken i witnisim olsem mi tok tru. Ol i bin raitim pas na givim mi bilong karim i go long ol brata bilong ol i stap taun Damaskus. Long wanem, mi laik arestim ol manmeri bilong Rot na pasim ol na kisim ol i kam long Jerusalem bilong kisim stik.
6“Na taim mi wokabaut i go na mi kamap klostu long taun Damaskus, long 12 klok, wanpela bikpela lait bilong heven i sut i kam daun na i raunim mi. 7Na mi pundaun long graun na mi harim wanpela maus i tokim mi olsem, ‘Sol, Sol, long wanem as yu wok long bagarapim Mi?’ 8Na mi bekim olsem, ‘BIKPELA, yu husat?’ Na Em i tokim mi, ‘Mi Jisas bilong taun Nasaret, dispela Jisas yu wok long bagarapim.’ 9Na ol man i stap wantaim mi, ol i bin lukim bikpela lait, tasol ol i no klia long toktok dispela man i mekim long mi. 10Na mi tok, ‘BIKPELA, bai mi mekim wanem?’ Na BIKPELA i tokim mi, ‘Yu kirap na yu go insait long taun Damaskus, na wanpela man bai tokim yu long olgeta samting Mi bin makim bilong yu i mekim.’ 11Bikpela lait i bin sutim ai bilong mi na mi aipas, olsem na ol man i stap wantaim mi ol i holim han bilong mi na lidim mi i go insait long Damaskus.
12“Na wanpela man i stap, nem bilong em Ananaias, em i wanpela trupela man long bihainim lo, na olgeta manmeri Juda i stap long dispela hap ol i tok Ananaias em i wanpela gutpela man. 13Em i kam long mi, na em i sanap klostu long mi na em i tok, ‘Brata Sol, yu ken i lukluk gen.’ Na long dispela taim stret ai bilong mi i op na mi lukim em. 14Na em i tok, ‘God bilong ol tumbuna papa bilong yumi i bin makim yu, bai yu ken i save long plen bilong Em, na bai yu lukim Stretpela Man na harim tok bilong Em long maus bilong Em yet. 15Long wanem, yu bai i stap witnis bilong Em bilong tokim olgeta manmeri long olgeta samting yu bin lukim na harim. 16Na olsem wanem yu stap nating? Yu kirap na kisim baptais, na yu singaut long nem bilong Em na Em i ken i wasim na rausim sin bilong yu.
17Taim mi kam bek gen long Jerusalem na mi mekim prea insait long tempel, mi bin lukim visin. 18Long visin mi lukim BIKPELA na Em i tokim mi, ‘Yu hariap na yu lusim Jerusalem. Long wanem, taim yu tokaut long Mi, ol i no inap bilipim na trastim tok bilong yu.’ 19Na mi tok, ‘BIKPELA, ol i save pinis, mi bin raun long ol wan wan haus lotu bilong ol Juda na mi kalabusim na paitim nogut tru ol manmeri i bilipim na trastim Yu. 20Na taim blut bilong Stiven, witnis bilong Yu, i kapsait, mi yet i bin sanap klostu na mi wanbel na mi lukautim siot bilong ol man i kilim em i dai.’ 21Na BIKPELA i tok, ‘Yu go! Bai Mi salim yu i go longwe long ol Jentail.’ ”
Pol na komanda bilong ami Rom.
22Orait na ol i harim olgeta tok bilong Pol, tasol taim ol i harim dispela las tok bilong em ol i mekim bikmaus olsem, “Rausim em long dispela graun! I no gutpela dispela kain man i ken i stap laip.” 23Na ol i bikmaus na ol i seksekim siot bilong ol nabaut na ol tromoi graun i go antap. 24Em olsem na komanda i givim oda long kisim Pol i go insait long haus ami. Na em i tok, “Wipim em na yumi painimaut long wanem as ol i bikmaus na egensim em.” 25Tasol taim ol i pasim han lek bilong Pol na ol i redi long wipim em, orait wanpela kepten i stap klostu na Pol i tokim em olsem, “Mi sitisen bilong Rom na yupela no wokim kot yet, na lo i tok i orait long yupela i wipim mi nating, a?” 26Taim kepten i harim dispela tok, em i go long komanda na em i tokim em, “Dispela man em i sitisen bilong Rom. Olsem na, bai yu mekim wanem?” 27Na komanda i kamap long Pol na i askim em olsem, “Yu sitisen bilong Rom, a?” Na Pol i tok, “Yes.” 28Komanda i tok, “Mi baim bikpela mani na mi kamap sitisen bilong Rom.” Na Pol i tok, “Mi nogat. Taim mama i karim mi, mi sitisen bilong Rom pinis.” 29Em olsem na ol soldia i redi long wipim Pol ol i lusim em hariap. Na komanda tu em i pret. Long wanem, nau em i save olsem Pol em i sitisen bilong Rom na em i bin pasim han lek bilong Pol.
Ol i sanapim Pol long kaunsil.
30Tasol, long neks de, komanda i laik save long wanem as tru ol Juda i sutim tok long Pol. Olsem na, em i singautim ol hetpris na olgeta man bilong kaunsil na ol i bung. Em i lusim rop long han lek bilong Pol na em i kisim Pol i kam long ol.
