Aposel
Feliks i harim kot bilong Pol.
24
1Orait na 5-pela de i go pinis na namba wan hetpris, Ananaias, i kam daun wantaim ol sampela bikman na wanpela mausman, nem bilong em Tertulus. Na long gavana ol i putim ples klia olgeta toktok bilong ol bilong kotim Pol. 2Taim ol i kisim Pol i kam long kot, orait Tertulus i autim toktok.
Na em i tok, “Gutpela Bikman Feliks, long strong bilong yu mipela i kisim gutpela sindaun. Yu bin tingting gut na yu stretim planti samting long kantri bilong mipela. 3Long olgeta samting yu mekim na long olgeta hap mipela i wanbel na mipela i gat bikpela amamas long yu. 4Tasol nogut mi mekim planti toktok na yu les. Mi laik askim yu long mekim bel isi long mipela na harim liklik tok bilong mipela. 5Long wanem, dispela man Pol em i wanpela trabelmeka. Long olgeta hap em i save kirapim kros pait namel long ol Juda. Na em i lidaman bilong wanpela bruk lain ol i kolim lain Nasaret. 6Na em i bin traim tu long bringim pasin nogut i kam insait long tempel. Tasol mipela i holim em. 8Sapos yu yet i skelim em, orait bai yu klia long olgeta toktok mipela i mekim long em.”
9Na ol Juda tu ol i sutim tok long Pol. Na ol i tok, “Olgeta dispela tok i tru.”
10Na gavana i lukluk long Pol na i givim orait long Pol i mekim toktok. Na Pol i autim tok.
Na em i tok, “Mi save olsem, planti yia yu i stap jas bilong ol lain bilong mipela. Em olsem na mi amamas long mekim tok bilong difenim mi yet long ai bilong yu. 11Yu ken i sekim na yu bai yu save olsem, long 12-pela de bipo tasol mi bin i go long Jerusalem bilong mekim lotu. 12Na ol i no lukim mi tok pait long wanpela man. Na ol i no lukim mi bungim ol planti manmeri na sikrapim bel bilong ol. Nogat. Mi no mekim dispela pasin. Mi no mekim insait long tempel o insait long haus lotu bilong ol Juda o insait long taun. 13Ol dispela tok nau ol i mekim bilong kotim mi, i no tru. Na ol i no inap kamapim wanpela samting bilong soim yu dispela tok bilong ol i tru. 14Tasol, mi ken i tok klia olsem, mi save bihainim Rot, em ol man i kolim bruk lain. Mi save lotu long God bilong tumbuna papa bilong mipela, na mi bilipim na trastim olgeta tok i stap long Buk Lo na olgeta tok ol i raitim long Buk Profet. 15Na mi holim wankain bilip long God ol dispela man i sutim tok long mi i holim. Na dispela bilip i olsem, God bai kirapim ol daiman i stretpela na ol daiman i no stretpela tu. 16Em olsem na mi wok strong long mekim pasin i gutpela, long ai bilong God na long ai bilong manmeri tu. 17Planti yia mi no i stap long Jerusalem, nau tasol mi kam bilong givim mani long ol lain bilong mi bilong helpim ol rabisman bilong ol na bilong kisim ofa i kam. 18Mi bisi long ol dispela samting na ol i lukim mi long tempel. Mi bihainim pasin bilong mekim mi klin. Na mi no bungim ol planti manmeri na mi no kamapim wanpela trabel. Tasol ol sampela Juda bilong provins Esia i holim mi. 19Na sapos ol i tingim mi gat rong, orait ol i mas kam sanap long ai bilong yu na autim wari bilong ol. 20Sapos nogat, orait ol dispela man i kam pinis ol i mas tokaut klia, taim ol i sanapim mi long kaunsil bilong ol, ol i painim wanem rong long mi. 21Ating ol i gat wanpela tok tasol. Taim mi sanap namel long ol, mi mekim bikmaus olsem, ‘Mi bilip ol man i dai pinis bai kirap bek, na long dispela samting tasol nau yupela i kotim mi.’ ”
Pol i stap long kalabus.
22Tasol Feliks i gat gutpela save long Rot na em i stopim toktok. Na em i tokim ol, “Taim komanda Lisias i kam daun pinis, orait bai mi wokim disisen bilong mi long dispela samting.” 23Na em i givim oda long kepten bilong 100 soldia, “Holim Pol i stap long kalabus. Tasol larim em i stap fri liklik, na larim ol frens bilong em i kam lukautim em.”
24Na sampela taim i go pinis na Feliks wantaim meri bilong em, Drusila, em i meri Juda, tupela i kam i stap. Na Feliks i salim tok long kisim Pol i kam. Na Pol i tokim Feliks long ol samting bilong bilip long Krais Jisas. 25Na taim Pol i tokaut long ol samting bilong stretpela pasin na long man i mas kontrolim gut laip bilong em yet na long bikpela kot bai i kamap long bihain, orait Feliks i pret na em i tok, “Yu go nau. Sapos bihain mi gat taim, orait mi ken i singautim yu.” 26Na Feliks i gat laik long Pol i givim mani long em. Em olsem na em i singautim Pol planti taim na tupela i toktok wantaim. 27Taim tupela yia i go pinis, Porsius Festus i kisim ples bilong Feliks. Na Feliks i larim Pol i stap long kalabus. Long wanem, em laik ol Juda i amamas long em.
