Aposel
Pol i difenim em yet long Agripa.
26
1Em olsem na Agripa i tokim Pol, “Yu ken i toktok.” Na Pol i apim han bilong em na em i mekim tok bilong difenim em yet.
2Na em i tok, “King Agripa, ol Juda i bin sutim planti toktok long mi, nau bai mi autim tok bilong difenim mi yet. Na mi tingim i gutpela tru yu bai harim dispela tok bilong mi. 3Long wanem, yu save pinis long ol kastem bilong ol lain Juda na yu save long ol toktok ol i save tok pait long em. Long dispela as mi askim yu, plis yu bel isi long mi na harim tok mi laik autim.
4“Olgeta manmeri Juda ol i save long pasin mi mekim long laip bilong mi. Ol i save long mi taim mi pikinini na mi stap wantaim ol lain bilong mi, na ol i save long mi taim mi kam i stap long Jerusalem tu. 5Longpela taim ol i save olsem mi bihainim pasin bilong Farisi, em wanpela strik lain tru bilong lotu bilong mipela. Ol i ken i tokim yu, sapos ol i laik. 6Bipo tru God i givim wanpela promis long ol tumbuna papa bilong mipela, na hop bilong mi i pas long dispela promis. Long dispela samting tasol, nau mi sanap long ai bilong yu na ol i kotim mi. 7Na olgeta 12-pela klen bilong mipela, ol i lotu tru long God long de na long nait na i wetim na trastim God long fulfilim dispela promis. Gutpela King, mi bihainim dispela hop tu, tasol ol Juda i laik kotim mi long dispela samting! 8Na olsem wanem wanpela bilong ol i ken i tingim olsem em i bikpela samting tumas long God i kirapim daiman?
9“Pastaim mi yet i bin tingim olsem mi mas wok strong long daunim nem bilong Jisas bilong Nasaret. 10Mi bin mekim olsem long Jerusalem. Pastaim mi kisim orait bilong ol hetpris na mi kalabusim ol planti manmeri i bihainim Jisas. Na tu, mi bin givim vot bilong mi bilong kilim ol i dai. 11Na planti taim mi raun long ol wan wan haus lotu bilong mipela ol Juda na mi mekim save long ol na mi fosim ol long tok bilas long Jisas. Bel hat bilong mi i bikpela tumas na mi go painim ol long ol longwe taun tu na mi bagarapim ol.
Pol i stori long em i tanim bel.
12“Na mi bin wokabaut i go long taun Damaskus bilong mekim ol dispela samting. Ol hetpris i bin givim namba long mi na i givim orait long mi bilong mekim olsem. 13Gutpela King, mi wokabaut yet long rot na long 12 klok wanpela bikpela lait bilong heven i winim lait bilong san i sut i kam daun na i raunim mi na i raunim ol man i wokabaut wantaim mi. 14Na taim mipela i pundaun pinis long graun, mi harim wanpela maus i tokim mi long tokples Hibru olsem, ‘Sol, Sol, long wanem as yu wok long bagarapim Mi? Yu no fit long egensim samting i sap tumas.’ 15Na mi tok, ‘BIKPELA, yu husat?’ Na BIKPELA i tok, ‘Mi Jisas, dispela Jisas yu wok long bagarapim. 16Tasol yu kirap na sanap stret. Mi kamap long yu bilong makim yu wokman bilong Mi. Yu bai i stap witnis bilong Mi bilong tokim olgeta manmeri long olgeta samting yu bin lukim long Mi na long olgeta samting Mi bai soim yu long Mi. 17Bai Mi lukautim yu na ol lain bilong yu na ol Jentail manmeri ol i no inap bagarapim yu. Nau Mi salim yu i go long ol Jentail manmeri 18 bilong opim ai bilong ol, bai ol i tanim na lusim tudak na i kam long lait, na bai ol i tanim na lusim pawa bilong Satan na i kam long God, na bai God i fogivim sin bilong ol na ol i kisim ples wantaim ol manmeri God i bin mekim holi long rot bilong bilip long Mi.’
19“Em olsem na, King Agripa, mi no sakim ol dispela tok mi bin kisim taim bikpela lait bilong heven i sut i kam daun na i raunim mi. 20Nogat. Pastaim mi tokim ol manmeri bilong taun Damaskus, na bihain mi tokim ol manmeri bilong Jerusalem na ol manmeri bilong olgeta hap bilong Judia, na ol Jentail manmeri tu. Mi tokim ol long tanim bel na kam long God, na mekim pasin i pas olgeta long tanim bel bilong ol. 21Long dispela samting tasol ol Juda i holim mi long tempel na ol i laik kilim mi i dai. 22Tasol God i bin helpim mi, na nau mi sanap long hia na mi autim tok long ol bikpela man na ol man i no bikpela tumas wantaim. Mi tokaut tasol long ol samting ol profet na Moses i bin tok bai kamap. Ol i tok, 23‘Krais i mas safa, na Em bai kamap fes man i kirap bek long dai, na Em bai toksave long lait, long ol lain Israel na long ol Jentail tu.’ ”
24Long dispela tok Pol i difenim em yet. Festus i harim na em i bikmaus, “Pol, yu longlong! Yu wokim bikpela skul tumas na i mekim yu longlong.” 25Tasol Pol i tok, “Gutpela Bikman Festus, mi no longlong. Mi mekim tok i tru na i klia tumas. 26King Agripa i save pinis long ol dispela samting na mi no pret long tokim em. Mi tingim olsem King i luksave pinis long ol dispela samting, long wanem, ol dispela samting i no kamap long ples hait. 27King Agripa, yu bilipim tok bilong ol profet o nogat? Yes, mi save yu bilipim.” 28Na King Agripa i tokim Pol, “Long liklik taim tasol yu laik tanim tingting bilong mi na mekim mi i kamap Kristen, a?” 29Na Pol i tok, “Liklik taim o longpela taim mi laik yu wantaim olgeta manmeri nau i harim tok bilong mi i kamap olsem mi, na mi prea long God long yupela i kamap olsem. Dispela sen tasol, mi no laik em i pasim yupela olsem em i pasim mi.”
30Orait na King em i sanap, na gavana Festus na Bernis wantaim olgeta manmeri i stap wantaim em, ol i sanap tu. 31Na taim ol i go pinis ol i toktok namel long ol yet na ol i tok, “Dispela man i no mekim wanpela rong bai lo i ken i makim em bilong i dai o makim em bilong kalabus.” 32Na Agripa i tokim Festus, “Sapos dispela man i no bin tok long Sisar i harim kot bilong em, em inap i go fri.”
