Aposel
Pita na Jon i sanap long kot.
4
1Tupela i toktok yet long ol manmeri, na ol pris wantaim bosman bilong ol sikuriti bilong tempel na ol Sadyusi ol i kam long tupela. 2Ol i gat bikpela kros, long wanem, Pita na Jon i skulim ol manmeri olsem, Jisas i kirap long matmat olsem na ol manmeri bai kirap tu. 3Em olsem na, em i apinun pinis na ol i arestim tupela na putim tupela long sel i stap bilong kotim tupela long moning. 4Tasol planti manmeri i harim tok bilong God na planti bilong ol i bilip. Em olsem na namba bilong ol man yet i bilip i klostu 5000 nau.
5Orait, long moning ol hetman na ol bikman na ol tisa bilong lo ol i bung long Jerusalem. 6Na namba wan hetpris Anas, na Kaiafas na Jon na Aleksander na olgeta pris bilong namba wan hetpris lain ol i bung wantaim ol. 7Ol i sanapim Pita na Jon long ai bilong ol na ol i askim tupela olsem, “Long wanem pawa na long wanem nem yutupela i bin mekim dispela samting?” 8Orait, Holi Spirit i pulap long Pita na em i tokim ol olsem, “Yupela hetman bilong ol Israel na yupela bikman,9yupela askim mitupela long dispela gutpela wok mitupela i bin mekim long lek nogut man na olsem wanem em i kamap gutpela. 10Orait, yupela olgeta wantaim olgeta lain bilong Israel, yupela mas save olsem, long nem bilong Jisas Krais bilong Nasaret, Em yupela i kilim i dai long diwai kros na God i kirapim Em long matmat, long strong bilong Em dispela lek nogut man i kamap gutpela na nau em i sanap long ai bilong yupela. 11Dispela man Jisas, Em i ston yupela ol wokman i bin lusim, tasol nau Em i kamap as ston. 12Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.”
13Na ol i kirap nogut long tupela. Long wanem, Pita na Jon i no pret long mekim toktok, na tupela i no bin skul na i man nating tasol. Ol i save tupela i bin i stap wantaim Jisas,14tasol ol i lukim lek nogut man i orait na i sanap wantaim tupela na ol i no gat wanpela toktok bilong egensim tupela. 15Em olsem tasol taim ol i putim tupela i go autsait long kaunsil, ol i toktok planti. 16Na ol i mekim tok olsem, “Yumi bai mekim wanem long dispela tupela man? Tupela i wokim wanpela bikpela sain na olgeta manmeri bilong Jerusalem ol i save pinis, na yumi no inap tok olsem dispela i no tru. 17Tasol, nogut dispela tok i go nabaut moa yet, olsem na yumi mas tok strong long tupela na tupela i no ken i yusim dispela nem Jisas moa na autim tok long ol manmeri.” 18Em olsem na ol i singautim tupela na ol i tok strong long tupela olsem, “Yutupela no ken i yusim dispela nem Jisas moa bilong tokim o skulim ol manmeri.” 19Tasol Pita na Jon i bekim tok bilong ol olsem, “Wanem pasin i gutpela long ai bilong God? Mitupela i harim tok bilong yupela o mitupela i harim tok bilong God? Yupela skelim. 20Long wanem, mitupela mas autim tok long olgeta samting mitupela i bin lukim na harim.” 21-22Em olsem na ol i tretim tupela moa na larim tupela i go. Dispela man we sain bilong stretim sik i bin kamap long em, em i winim 40-pela yia pinis, na ol manmeri i litimapim nem bilong God long dispela samting i kamap long em. Em olsem na ol i pret long ol manmeri na ol i no gat rot bilong givim trabel long tupela.
Ol manmeri i bilip ol i prea bilong kisim strong.
23Orait, ol i lusim tupela pinis na tupela i go long ol frens bilong ol. Na tupela i tokim ol long olgeta toktok ol hetpris na ol bikman i bin mekim long tupela. 24Na taim ol i harim pinis, ol i wanbel na ol i beten wantaim long God olsem, “BIKPELA Bilong Bosim Olgeta Samting, Yu bin wokim skai na graun na solwara na olgeta samting i stap long em. 25Long rot bilong Holi Spirit, long maus bilong Devit, papa bilong mipela na wokman bilong Yu, Yu bin tok,
“ ‘Long wanem as ol Jentail manmeri i belhat nogut tru?
Long wanem as ol i bung bilong kamapim plen i no gat strong?
26Ol king bilong dispela graun ol i sanap redi,
na ol hetman i bung wantaim,
na ol i egensim BIKPELA
na egensim dispela Man BIKPELA i bin makim.’
(Buk Song 2:1-2)
27I tru tumas, Herot na Pontius Pailat wantaim ol Jentail manmeri na ol manmeri bilong ol Israel, ol i bin bung wantaim, long dispela siti, na ol i egensim Jisas, holi wokman bilong Yu na dispela Man Yu bin makim. 28Na ol i mekim olgeta samting Yu bin makim na plenim i mas kamap. 29BIKPELA, tingting nau long tok ol i bin mekim bilong pretim mipela, na Yu strongim mipela wokman bilong Yu, bai mipela i no pret na mipela autim tok bilong Yu i go yet. 30Putim han bilong Yu long ol sikman na oraitim ol na wokim kainkain sain na mirakel long nem bilong Jisas, holi wokman bilong Yu.” 31Na ol i beten pinis na haus ol i bung long em i guria, na Holi Spirit i pulap long ol, na ol i no pret na ol i autim tok bilong God i go yet.
Samting bilong bilip manmeri i bilong olgeta wantaim.
32Olgeta manmeri i bilip ol i stap wanbel na ol i gat wanpela tingting tasol. Na i no gat wanpela man bilong ol i tok, “Samting bilong mi, em bilong mi tasol.” Nogat. Olgeta samting bilong ol, em i bilong olgeta wantaim. 33Olgeta taim ol aposel i tokaut long BIKPELA Jisas i kirap bek long matmat. Tok bilong ol i gat bikpela strong. Na grasia bilong God i pulap long ol olgeta. 34-35Sampela bilong ol, ol i gat graun na haus i stap, na wan wan taim ol i salim ol dispela samting na kisim mani. Na ol i karim dispela mani i kam long ol aposel, na ol aposel i skelim long husat manmeri i nidim sampela helpim. Long dispela as i no gat wanpela man o meri bilong ol i sot. 36Wanpela man, nem bilong em Josep, em i bilong ol lain Livai na em i bilong ples Saiprus. Ol aposel ol i givim narapela nem Barnabas long em. As bilong dispela nem i olsem, “Man bilong strongim bel bilong ol manmeri.” 37Em i salim wanpela hap graun bilong em na kisim mani, na em i karim dispela mani i kam long ol aposel.
