Moning.
Aposel Pita i mekim tok olsem, “Yupela tanim bel na kisim baptais long nem bilong Jisas Krais na bai God i fogivim sin bilong yupela.” Ating planti manmeri bilong ples bilong yumi i tingim olsem, ol i mas kisim baptais na God i ken i fogivim sin bilong ol na kisim bek ol. Na sapos ol i no kisim baptais, orait God i no inap fogivim sin bilong ol na Em i no inap kisim bek ol. Lukim tok bilong Pita long Aposel 2:37-41….
37Ol i harim pinis tok Pita i mekim na dispela tok i sutim tru bel bilong ol. Na ol i tokim Pita wantaim ol arapela aposel olsem, “Ol brata, bai mipela i mekim wanem nau?” 38Na Pita i tokim ol, “Yupela olgeta wanwan, yupela tanim bel na kisim baptais long nem bilong Jisas Krais na bai God i fogivim sin bilong yupela, na bai God i givim Holi Spirit long yupela. 39Long wanem, dispela promis em bilong yupela na bilong ol pikinini bilong yupela na bilong ol manmeri i stap longwe, na em bilong olgeta manmeri Bikpela, God bilong yumi, i singautim i kam long Em yet. 40Na Pita i autim planti tok moa long ol dispela samting, na em i tok strong moa long ol na em i tok, “Yupela tanim bel, nogut yupela i bagarap wantaim ol dispela jeneresen nogut.” 41Em olsem na ol manmeri i harim tru tok bilong Pita ol i kisim baptais. Na long dispela de God i joinim 3000 manmeri wantaim ol manmeri i bilip.
Tru, Pita i mekim tok olsem, “Yupela tanim bel na kisim baptais long nem bilong Jisas Krais na bai God i fogivim sin bilong yupela.” Tasol Pita i no minim olsem, baptais em i rot bilong God i fogivim sin na kisim bek sinmanmeri. Manmeri i kisim na bihainim dispela kain tingting, orait ol i kisim rong tingting na ol i paulim ol narapela tok insait long Baibel.
Tingim. Jisas i no tok olsem, “Mi wantaim baptais em i rot, na Mi wantaim baptais em i as bilong Tok i tru, na Mi wantaim baptais em i as bilong laip, na i no gat wanpela man inap i go long Papa long narapela rot. Nogat. Long Mi wantaim baptais tasol.” Nogat. Na Jisas i no tok olsem, “Man i bilip long Pikinini na baptais, em i gat laip i stap gut oltaim oltaim.” Nogat. Na Jisas i no tok olsem, “Tru tumas, Mi tokim yupela: Man i harim tok bilong Mi, na i bilip long God i bin salim Mi i kam, na i kisim baptais, em i gat laip i stap gut oltaim oltaim.” Nogat.
Harim tok bilong Jisas… “Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap long Em.” (Jon 3:36.) “Tru tumas, Mi tokim yupela: Man i harim tok bilong Mi, na i bilip long God i bin salim Mi i kam, em i gat laip i stap gut oltaim oltaim. Em bai i no gat kot. Nogat. Em i lusim sait bilong i dai na em i kamap insait long laip pinis.” (Jon 5:24.) “Mi yet Mi rot, na Mi as bilong Tok i tru, na Mi as bilong laip, na i no gat wanpela man inap i go long Papa long narapela rot. Nogat. Long Mi tasol.” (Jon 14:6.)
Skelim ol narapela narapela tok bilong Buk Aposel….
21…. Olgeta manmeri i singaut long BIKPELA, bai Em i kisim bek ol. (Aposel 2:21.)
11Dispela man Jisas, Em i ston yupela ol wokman i bin lusim, tasol nau Em i kamap as ston. 12Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em. (Aposel 4:11-12.)
43Olgeta profet i tokaut long Em (Jisas), na ol i tok olsem, ‘Olgeta manmeri i bilipim na trastim Em, bai God i fogivim sin bilong ol long nem bilong Em.’ (Aposel 10:43.)
38Ol brata, long dispela as tasol mipela ken i tokim yupela na yupela ken i save, long wok bilong dispela man Jisas God i ken i fogivim sin bilong yupela. (Aposel 13:38.)
9…. Long rot bilong bilip tasol Em i mekim bel bilong ol i kamap klin. (Aposel 15:9.)
30…. “Mi mas mekim wanem samting na bai God i sevim mi?” 31Na tupela i tok, “Bilip long BIKPELA Jisas na bai God i sevim yu, wantaim ol wanhaus bilong yu. (Aposel 16:30-31.)
Tok bilong God i klia olsem, God i fogivim sin na kisim bek (sevim) sinmanmeri long feitful wok bilong Jisas tasol, na Em i no inap fogivim sin na kisim bek (sevim) sinmanmeri long rot bilong baptais. Nogat. Long rot bilong feitful wok bilong Jisas tasol.
Em olsem tasol long wanem as Pita i tokim ol manmeri olsem, “Yupela kisim baptais”?
Pita em i no minim olsem, baptais em i rot na sapos ol i no kisim baptais, orait God i no inap fogivim sin bilong ol. Nogat. Pita i minim olsem, ol i mas kam pas long Jisas. Pastaim ol i givim baksait long Jisas, na ol i pas wantaim ol manmeri i kilim Jisas i dai long diwai kros. Tasol nau, ol i mas lusim ol dispela lain manmeri, na ol i mas lusim pasin bilong givim baksait long Jisas, na ol i mas kam long sait bilong Jisas, na ol i bilipim na trastim Jisas, na ol i bilipim na trastim tok bilong Jisas.
Long ai bilong olgeta manmeri ol i bin givim baksait long Jisas na ol i givim baksait long tok bilong Jisas, na sapos ol i laik tanim bel na kam long Jisas na bilipim Em na trastim Em, orait ol i mas mekim olsem long ai bilong olgeta manmeri. Pasin bilong kisim baptais long nem bilong Jisas i soim olgeta manmeri olsem, ol i lusim pasin bilong givim baksait long Jisas, na ol i lusim pasin bilong givim baksait long tok bilong Jisas, na ol i no pas moa wantaim ol manmeri i bin lusim Jisas, na ol i kam pas long Jisas na pas long tok bilong Jisas.
Na baptais bilong yumi i wankain samting. Baptais i putim ples klia olsem, yumi lusim ol narapela narapela rot yumi yet i bin makim bilong God i kisim bek yumi, na yumi bilipim na trastim rot God i makim, yumi bilipim na trastim God long fogivim sin bilong yumi na kisim bek yumi long feitful wok bilong Jisas long diwai kros tasol, na yumi bihainim Jisas.
Baptais em i no rot bilong God i fogivim yumi. Nogat. Baptais i putim yumi long ples klia tasol. Long baptais yumi soim olsem, yumi bilipim na trastim Jisas tasol, yumi bilipim na trastim tok bilong Jisas, na yumi bilipim na trastim olsem, Jisas wanpela em i rot, na i no gat narapela rot bilong God i kisim bek yumi.
God i fogivim sin bilong 3000 manmeri na Em i kisim bek ol long feitful wok bilong Jisas tasol.
Ol planti manmeri ol i bin givim baksait long Jisas, na ol i givim baksait long tok bilong Jisas, na ol i pas wantaim ol manmeri na ol i kilim Jisas i dai long diwai kros. Tasol, God i fogivim 3000 manmeri bilong ol. Holi Spirit i sutim bel bilong ol na ol i tanim bel na ol i kam long sait bilong Jisas, na ol i kam i stap long fogivim bilong God. God i fogivim sin bilong ol na kisim bek ol.
Fogivim bilong God i gutpela tumas! Maski wanem kain sin yumi bin mekim, fogivim bilong God i stap. Sin bilong kilim Jisas i dai i winim olgeta sin, na God i fogivim dispela sin. Em olsem na, i gutpela tru long yumi tanim bel. Yumi tanim na kam long sait bilong Jisas. Yumi tanim na yumi bilipim na trastim rot God yet i makim bilong fogivim na kisim bek sinmanmeri. Yumi tanim na yumi bilipim na trastim God long kisim bek yumi na fogivim yumi long wok bilong Jisas tasol. Yumi amamas na tok tenkyu long fogivim bilong God.
Glenn.
Sapos yu laik save moa long dispela tok, orait yu lukim Aposel 2:37-41 long Autim Tok long pngbibleresources.org.
