Moning.
Buk Efesus i klia olsem, God i kisim bek yumi long feitful wok bilong Jisas tasol. Long wok bilong Jisas tasol God i mekim yumi holi na stretpela long ai bilong Em – long dispela rot tasol God i kisim bek ol lain bilong Em – long dispela rot tasol God Em i adoptim ol na mekim ol i stap femili bilong Em yet.
Em olsem na Tok bilong God i skruim tok olsem, “Yupela no ken i wokabaut moa olsem ol haiden Jentail manmeri…..Nau tingting bilong yupela mas kamap nupela, na laip bilong yupela mas kamap nupela. Long wanem, God i bin mekim yupela kamap nupela lain manmeri bai yupela i stap olsem Em yet na laip bilong yupela bai i stap stretpela na holi olgeta.” (Efesus 4:17 na 23.)
Ol haiden pasin na ol pasin nogut bilong ples, ol dispela pasin em i no ol samting bilong dispela graun. Nogat. Ol dispela samting em i samting bilong Satan wantaim ol spirit nogut bilong tudak. Em olsem na long dispela as yumi mas sanap long bikpela bikpela strong bilong God. Yumi mas yusim strong God i givim yumi – yumi mas yusim ol tuls God i givim yumi bilong yusim na yumi wokabaut long nupela tingting na nupela pasin i stretpela. (Lukim Sande Baibel Toktok “Strongpela spirit bilong tudak.” (Efesus 6:10-13.) )
Orait, nau bai yumi skelim ol tuls God i givim yumi bilong yumi ken i sanap long strong bilong BIKPELA na yumi lusim ol haiden pasin na yumi wokabaut long nupela pasin bilong God. Lukim Efesus 6:14-24.
14Olsem na, yupela mas sanap strong. Yupela mas pasim tok i tru olgeta long yupela olsem soldia i pasim let. Na yupela mas putim na werim stretpela tingting na stretpela pasin olsem soldia i putim na werim siot ain bilong karamapim bros. 15Long gutnius God i tokaut long hau Em i kamapim pis na yupela mas redi long bihainim na autim dispela gutnius – dispela em i olsem su bilong yupela. 16Na wantaim ol dispela samting yupela mas holim bilip olsem soldia i holim hap plang na bai yupela stopim ol spia bilong Satan i sap tumas.
17Yupela mas holim tingting long wok God i bin mekim bilong kisim bek yupela, na dispela i mas i stap olsem hat ain bilong yupela. Long han bilong yupela, yupela mas holim sod bilong Holi Spirit – dispela em i Tok bilong God. 18Na long strong bilong Holi Spirit yupela mas prea olgeta taim. Yupela mas strong long mekim ol kainkain prea na askim God long helpim yupela. Em olsem na yupela mas ai klia olgeta taim na mekim prea na askim God long helpim olgeta manmeri bilong Em.
19Na prea long mi tu. Mi laik bai yupela prea olsem, taim mi laik autim tok bai God i givim toktok long mi, na bai mi daunim pret bilong mi na autim klia olgeta samting bilong gutnius. 20God i bin makim mi olsem mausman bilong dispela gutnius. Long dispela gutnius nau mi stap long kalabus. Olsem na, yupela mas prea long mi na bai mi autim strong dispela gutnius olsem God i makim mi long mekim.
21Tikikus em i brata tru bilong yumi na em i gutpela wokman tru bilong BIKPELA. Na em bai tokim yupela long olgeta samting na yupela bai klia gut long sindaun bilong mi na long wok mi bin mekim. 22Long dispela as mi salim em i go nau long yupela bai yupela i ken i save, mipela i stap olsem wanem, na bai em i ken i strongim yupela.
23God, Papa, wantaim BIKPELA Jisas Krais i ken i mekim isi bel bilong yupela olgeta brata, na Em i ken i strongim yupela long pasin bilong lavim na long bilip. 24Na grasia i ken i stap wantaim yupela ol manmeri i save lavim BIKPELA bilong yumi Jisas Krais long lavim i no save dai.
- Lain 14…. Yumi mas pasim tok i tru tasol – trupela toktok – na dispela samting i mas raunim yumi na holimpas olgeta samting bilong yumi olsem let i save raunim na holimpas klos bilong soldia.
Giaman tok em i raunim na pasim olgeta samting bilong Satan. Tasol trupela tok – tok i tru olgeta – i mas raunim na pasim olgeta samting bilong yumi. Wankain olsem let i raunim na holimpas olgeta klos bilong soldia, orait trupela tok i mas raunim na holimpas olgeta samting bilong laip bilong yumi. Sapos yumi giaman giaman olsem ol haiden manmeri, orait ol i gat rot bilong semim yumi – i olsem let bilong yumi i bruk na trausis i pundaun long ai bilong ol manmeri na yumi sem nogut tru. Em olsem na yumi mas raunim yumi long tok i tru tumas na ol birua bilong God i no gat rot bilong daunim na semim bilip bilong yumi long feitful wok bilong Jisas.
- Lain 14…. Yumi mas putim na “werim” stretpela tingting na stretpela pasin olsem ol soldia i putim na werim siot ain bilong karamapim bros.
Sapos yumi bihainim pasin i stret na i tru, orait wanpela man i no inap bagarapim yumi taim em i sutim tok nogut long yumi bilong daunim yumi. Yu save, spia i no inap go insait long bros bilong soldia i werim siot ain, orait na wankain olsem tok bilong ol i no inap painim mak bilong em long laip bilong yumi. Long wanem, yumi wokabaut long stretpela pasin na i no gat rong na i no gat asua long yumi bai ol i daunim yumi.
- Lain 15…. Gutnius bilong God mas strongim lek bilong yumi olsem su i strongim wokabaut bilong ol soldia na wanpela samting i no inap sutim lek bilong ol na bagarapim wokabaut bilong ol.
God i kisim bek yumi long feitful wok bilong Jisas long diwai kros, na em i dispela wok bilong God i kisim wanbel i kam long yumi na i pasim yumi wantaim long sios femili komyuniti bilong God – em i dispela samting i kisim pis i kam long yumi wantaim God na long yumi wanwan insait long sios femili bilong God. Olsem na yumi sanap long dispela toktok. Olsem ol ami i sanap long strongpela su bilong ol, orait strongpela su bilong yumi em i gutnius bilong feitful wok bilong Jisas, na long dispela toktok bai yumi sanap strong tasol na wanpela samting i no inap sutim sanap bilong yumi.
- Lain 16…. Yumi mas holim strong bilip bilong yumi long feitful wok bilong Jisas – dispela i olsem plang ain ol soldia i yusim bilong stopim ol spia i flai i kam bilong kilim ol i dai.
Yu save, Satan bai sutim tok long yumi bilong bagarapim bilip bilong yumi, bai yumi lusim trupela bilip na yumi bihainim ol giaman bilip na long dispela rot em bai kilim yumi i dai na yumi lus long God.
Taim Satan i sutim tok long yumi (olsem soldia i sutim spia), orait yumi ken i stopim tok (spia) bilong em long bilip bilong yumi – yumi ken i tok “Nogat!” long toktok em i mekim na yumi tok, “God i kisim bek mi pinis long feitful wok bilong Jisas – bai mi trastim feitful wok bilong Jisas tasol na mi no inap lusim na bihainim na trastim ol narapela samting.” Long dispela rot trupela bilip long feitful wok bilong Jisas i ken i rausim tok bilong ol man i laik grisim yumi i go bek gen long ol narapela narapela kain bilip – olsem bilip long Sabat na baptais na misin wok na ol kainkain samting ol man i tok yumi mas mekim na God bai kisim bek yumi – ol dispela kain bilip em i giaman bilong Satan.
- Lain 17…. Olgeta taim yumi mas tingim wok God i bin mekim bilong sevim yumi – na dispela bai i stap olsem hat ain ol soldia i yusim bilong lukautim het bilong ol.
God i bin makim yumi na pasim yumi long Jisas, na Jisas i dai bilong mekim yumi stretpela na holi long ai bilong Em, na long dispela rot tasol God i kolim yumi “stretpela man”, na Em i kisim bek yumi na mekim yumi wanpela bilong femili bilong Em. Tingim ol dispela wok bilong God na tingim hau yumi no gat laip na yumi no save long wanpela samting long wok bilong God, tasol Holi Spirit i bin kamapim laip long yumi – Em i bin opim ai na ia na bel bilong yumi, na Em i tanim bel bilong yumi, bilong yumi bilipim na trastim na bihainim na tok tenkyu long feitful wok bilong Jisas long diwai kros bilong sevim yumi.
Em olsem na sapos yumi pasim dispela toktok long het bilong yumi, orait dispela tok bai stopim yumi long bikhet na apim yumi yet. Satan i laik sutim yumi long “het” bai yumi apim yumi yet na yumi bikhet. Em olsem na yumi mas lukaut na yumi no ken i bagarap long het bilong yumi na yumi stat na yumi apim yumi yet na yumi bikhet.
Yumi mas lukautim dispela trupela wok bilong God long laip bilong yumi – dispela i save bosim na kontrolim olgeta tingting na lavim na bilip bilong yumi, olsem na, yumi mas pasim dispela samting long het bilong yumi na bai dispela samting i lukautim yumi – bai yumi no ken i bikhet na apim yumi yet. Sapos yumi bikhet na apim yumi yet, orait Satan i bagarapim yumi na em i winim yumi.
- Lain 17… Na taim yumi laik difenim trupela tok i tokaut long feitful wok bilong Jisas long diwai kros, orait yumi holim Tok bilong God long han bilong yumi olsem ol soldia i holim sod.
Wankain ol bipo soldia i holim sod long han bilong ol bilong difenim ol, orait yumi has holim Baibel long han bilong yumi na yumi yusim Tok bilong God bilong difenim bilip bilong yumi. Tok bilong God Em i strong bilong Holi Spirit – Baibel em i sod bilong Holi Spirit.
Olsem na yumi no ken i bikmaus na toktok planti long toktok bilong yumi yet. Nogat. Yumi kisim strong bilong Holi Spirit long Tok bilong God na yumi yusim dispela samting na yumi toktok na yumi difenim rot bilong God long feitful wok bilong Jisas.
Yumi mas prea long God olgeta taim.
Lukim lain 18-20. Yumi yet yumi no gat strong bilong holim ol dispela samting Pol i stori pinis long en. Nogat. Yumi nidim God long helpim yumi. Yumi feil manmeri na yumi nidim strong bilong God na bai yumi sanap na yumi lusim pasin haiden na yumi pas wantaim long olgeta gutpela bilong God wantaim ol brata na sista bilong yumi insait long sios femili komyuniti bilong God.
Na aposel Pol i no tingim olsem em i gat strong na em yet i ken i sanap strong na bihainim olgeta pasin bilong Jisas. Nogat. Em i klia olsem em i olsem yu na mi na em i wanpela man bilong feil feil. Em olsem na em tu em i nidim God long helpim em sanap strong na lusim ol haiden pasin na i pas wantaim olgeta pasin bilong Jisas na pas wantaim olgeta manmeri bilong Jisas long sios femili (lain 19-20).
Satan wantaim ol wokboi bilong em ol i birua long sios femili bilong God na ol i les long yumi sindaun gutpela wantaim na bihainim Jisas. Em olsem na ol i wok long pundaunim yumi. Tasol yumi no ken i larim ol i pundaunim yumi sios femili bilong God. Nogat. Yumi kisim na holim na yusim olgeta tuls God i givim yumi, na yumi prea long kisim helpim bilong God. Long dispela rot bai yumi i stap na yumi kisim na bihainim olgeta tingting na pasin bilong Jisas.
Lavim bilong BIKPELA long yumi i no save dai.
Lukim lain 21-24. BIKPELA i stap wantaim yumi ol sios femili bilong Em. Grasia na lavim bilong Em i pas long yumi na long dispela as yumi ken i stap isi. Birua bilong yumi i bikpela, tasol BIKPELA bilong yumi i bikpela bikpela moa tumas na wanpela samting i no inap winim Em. Em olsem na yumi ken i stap isi na yumi wok wantaim bilong kisim na bihainim olgeta gutpela tingting na pasin bilong gutpela BIKPELA bilong yumi.
Glenn.
