Moning.
Birua pasin i no nupela samting long yumi bilong P.N.G. Yumi save pinis, manmeri bilong wanpela hauslain o wanpela klen i ken i birua long manmeri bilong narapela hauslain na narapela klen. Tok kros na jelas pasin na tok bilas na tok baksait na pasin bilong daunim ol narapela manmeri i pulap long komyuniti bilong yumi. Mi tok pinis, birua pasin em i no nupela samting long yumi.
Na birua pasin i no nupela samting long ol lain bilong God i stap long sios bilong taun Efesus. Planti bilong ol i Jentail manmeri – ol i no bon insait long ol lain Israel. Na long histori (bipo pasin) bilong dispela tupela lain – ol lain Jentail na ol lain Israel (Juda) – tupela i no sindaun gutpela wantaim. Nogat tru. Olgeta taim ol i save mekim pasin birua – ol i mekim jelas pasin na ol i tok bilas na ol i kros na ol i tok baksait. Em olsem na dispela birua pasin i stap namel long ol em i kamap olsem banis i separetim ol.
Ol lain Israel (Juda) ol i tingim olsem, ol i gutpela manmeri bilong God na ol Jentail manmeri i no gutpela olsem ol. Ol lain Israel i save tok olsem, “God i givim lo bilong Em long mipela na mipela i holim, olsem na, mipela gutpela na stretpela manmeri long ai bilong God – ol Jentail lain ol i no holim lo bilong God, olsem na, ol i no stretpela manmeri long ai bilong God na ol i lus lain tasol.” Ol dispela kain tingting i kamapim birua pasin namel long dispela tupela lain manmeri.
Tasol, long Efesus 2:13, Pol i tokim ol Jentail manmeri i stap long sios long taun Efesus, em i tokim ol olsem, “Wok bilong Krais i bin bringim yupela i kam long God. ” Wok bilong Krais i bin bringim ol sampela Jentail manmeri i kam long God. Olsem na, ol i no lus lain olsem ol lain Israel (Juda) i tok.
Yumi mas klia olsem, sin bilong ol manmeri tasol i separetim ol long God, na lo bilong God i save putim sin bilong olgeta manmeri long ples klia (Rom 3:19-20). Lo bilong God i save soimaut olsem, ol i sot long stretpela pasin. Lo i soimaut olsem, sin bilong ol i separetim ol long God na i stopim God long kisim bek ol. Long wanem, lo i tok, “Pe bilong sin em i dai.”
Wok bilong Jisas i pinisim banis i separetim sinmanmeri long God.
Tasol wok bilong Jisas i pinisim dispela banis i separetim ol long God. Lukim Efesus 2:14-18.
14Krais yet Em i pis bilong yumi. Em i kamapim pis namel long dispela tupela lain, ol Juda na ol Jentail, na Em i mekim tupela i kamap wanpela. Pasin birua i olsem banis i separetim tupela, tasol Krais i brukim na pinisim dispela banis. 15Long bodi bilong Em yet Krais i pinisim lo bilong Moses. Em i pinisim ol lo wantaim ol toktok bilong ol wan wan lo. Long dispela wei Em i brukim na pinisim dispela banis i separetim tupela. Krais i mekim olsem bilong bungim tupela na kamapim wanpela nupela lain manmeri i pas long Em yet. Long dispela wei Krais i kamapim pis namel long ol. 16Krais Em i bungim tupela na kamapim wanpela na dispela wanpela lain Krais i bringim ol i kam bek long God. Long wok bilong Krais long diwai kros Em i bringim ol i kam bek long God na Em i kilim i dai pasin birua bilong dispela tupela lain manmeri. 17Krais i bin kam na Em i autim tok bilong dispela pis long yupela i bin i stap longwe, na Em i autim tok bilong dispela pis long ol lain i stap klostu. 18Long wanem, yumi tupela lain manmeri yumi kam long Papa long wanpela rot tasol, na dispela rot em i wok bilong Krais. Na wanpela Holi Spirit tasol i pulim yumi i kam.
Lo i tok, “Pe bilong sin em i dai.” Em olsem tasol Jisas i bin kisim dispela pe – Jisas i kisim dai bilong ol dispela Jentail manmeri i stap insait long sios long taun Efesus. Na lo i tok, “Yupela sot long stretpela pasin God i save laikim.” Tasol Jisas i bihainim olgeta lo bilong God olsem God i laikim – Jisas i bin mekim stretpela pasin olsem God i save laikim – na Em i givim dispela stretpela pasin long ol dispela Jentail manmeri i stap insait long sios long taun Efesus.
Long dispela rot wok bilong Jisas i pinisim dispela lo i separetim ol long God. Wok bilong Jisas i pinisim banis i separetim ol long God. Olsem na, feitful wok bilong Jisas i bin bringim ol i kam long God.
Wok bilong Jisas i pasim tupela lain long wanpela nupela lain.
Long Efesus 2:14-18 Pol i tokim yumi olsem, wok bilong Krais i pasim ol lain Jentail wantaim ol lain Israel (Juda) na i pinisim birua pasin bilong tupela. Wok bilong Jisas i bin bringim ol lain Jentail i kam long God. Na tu, dispela seim wok bilong Jisas i pasim ol lain Jentail wantaim ol lain Israel.
Yumi tok pinis olsem, ol lain Israel i tingim olsem, ol i gutpela manmeri bilong God na ol Jentail manmeri nogat. Ol i tok olsem, “Mipela i holim lo bilong God, olsem na, mipela stretpela long ai bilong God. Ol Jentail lain i no holim lo bilong God, olsem na, ol i no stretpela long ai bilong God.”
Tasol, ol lain Israel (Juda) i lusim tingting long wanpela samting. Ol lain Israel i bin holim lo bilong God, em i lo God i bin givim Moses, tasol, ol i no bihainim stret – ol i no bihainim olsem God i tokim ol long bihainim – ol i bin sakim na brukim lo bilong God – olsem na, dispela lo i daunim ol lain Israel na separetim ol tu long God. (Lukim Rom 3:9.)
Olsem na, ol lain Israel ol tu ol i stap separet long God! Na wankain olsem wok bilong Jisas i bringim ol wanwan Jentail manmeri i kam long God, orait wok bilong Jisas i bringim ol wanwan Israel manmeri i kam long God. Dispela tupela lain manmeri i save kam long God long wanpela rot tasol – long seim rot. Em olsem na wok bilong Jisas i kisim wanwan manmeri bilong dispela tupela lain manmeri i kam long God na God i pasim tupela long wanpela nupela lain, na dispela nupela lain manmeri em i sios bilong God.
Long sios bilong God ol olpela hauslain samting i pinis olgeta.
Yumi i bilipim na trastim God long kisim bek yumi long feitful wok bilong Jisas na yumi pas long Jisas na yumi bihainim Em, orait yumi ken i save olsem, God i kisim yumi i kam long blut bilong Jisas tasol. Nau yumi no bilong ol wanwan lain manmeri bilong dispela graun moa. Nogat. Yumi sitisen bilong nupela hauslain bilong God tasol. Krais i bin bringim yumi i kam – i kam long God na i kam long sios femili bilong God.
Em olsem na, i no gat as long yumi mekim birua pasin long ol narapela manmeri God i bringim i kam long Em yet na i bringim i kam insait long femili bilong Em – sios bilong Em. Holim tingting olsem, bipo yumi stap longwe, tasol nau, wok bilong Krais i bringim yumi i kam long God – na i bringim yumi i kam insait long nupela komyuniti bilong God wantaim ol nupela brata na susa. Em olsem na yumi sindaun gutpela wantaim na wanbel wantaim na wantaim yumi amamas long God i kisim yumi wantaim i kam – i kisim yumi i kam long seim rot, na dispela rot em i rot bilong feitful wok bilong Jisas.
Glenn.
