Aposel 3:17-26.
Bilong harim (Audio)
Taim yumi harim tok “blesim bilong God”, ating yumi tingting tasol long ol kainkain samting bilong dispela graun – ol kainkain samting olsem gutpela sindaun, o mani, o gutpela graun, o planti pikinini, o taim yumi no lukim trabel long rot, o yumi no kisim sik tumas, o kopi bilong yumi i karim hevi kopi. Ating yumi tingim olsem, ol dispela kainkain samting em i blesim bilong God.
Long Aposel 3:1-16 yumi bin lukim stori bilong Jisas i yusim Pita bilong stretim lek bilong wanpela lek nogut man. Pita na Jon tupela i go long tempel (tempel i stap long taun Jerusalem), na dispela lek nogut man i sindaun i stap long wanpela dua bilong tempel. Na Pita i wokim mirakel na lek bilong lek nogut man i orait, na em i kalap kalap i go insait long tempel wantaim Pita na Jon. Na ol planti manmeri i lukim lek nogut man i kalap kalap na ol i tingting planti. Na Pita i putim ples klia olsem, dispela mirakel i no kamap long strong bilong em o long strong bilong lotu bilong em, nogat, mirakel i kamap long nem (namba) bilong Jisas – long pawa na strong bilong Jisas lek bilong lek nogut man i kamap orait. Jisas i oraitim lek bilong lek nogut man.
Nambawan blesim bilong God.
Na long Aposel 3:17-26 Pita i skruim tok. Lukim lain 26. Pita i tokim ol manmeri olsem, “God i kirapim pinis wokman bilong Em, na Em i salim Em i kam pastaim long yupela, bilong blesim yupela….” Pastaim God i salim Jisas i kam long ol manmeri Juda, bilong blesim ol. Na dispela blesim i wanem kain samting? Ating yumi ken i tingim olsem, taim Jisas i stretim lek bilong lek nogut man, orait dispela em i blesim bilong God. Tasol toktok bilong Pita i no go long dispela samting. Nogat. Tok bilong em i go long narapela samting olgeta.
Ol lain Juda (em ol lain Israel) ol i bin kilim Jisas i dai, tasol God i bin kirapim Em long matmat na Em i stap laip. Na God i salim Jisas i kam gen long ol long rot bilong gutnius ol aposel i autim. God i mekim olsem bilong “tanim yupela olgeta wanwan, bai yupela i no bihainim moa pasin nogut bilong yupela.” Em olsem na dispela em i blesim Pita i tokaut long en. Taim God i givim gutnius bilong feitful wok bilong Jisas long ol, bilong givim sanis long ol bilong tanim bel na lusim pasin nogut na bihainim Jisas, orait God i blesim ol. Dispela em i blesim bilong God. Dispela em i nambawan blesim bilong God.
Na olsem wanem dispela em i nambawan blesim bilong God? Lukim lain 17-20. Pita i tokim ol olsem, “….yupela tanim bel na kam bek gen long God. Na Em bai rausim olgeta sin bilong yupela…” Taim yumi harim trupela tok i tokaut long God i kisim bek sin manmeri long feitful wok bilong Jisas long diwai kros, na yumi tanim bel na bilipim na trastim God long fogivim sin bilong yumi (kisim bek yumi) long feitful wok bilong Jisas tasol, orait God bai rausim olgeta sin bilong yumi! Long dispela as gutnius bilong feitful wok bilong Jisas tasol em i nambawan blesim bilong God.
Taim manmeri i lusim pasin bilong givim baksait long Jisas (dispela em i pasin nogut bilong ol), taim ol i tanim bel long pasin bilong givim baksait long Jisas, taim ol i lusim pasin bilong sindaun long laik bilong ol yet, orait God bai rausim olgeta sin bilong ol. Tru tumas, ol manmeri i kilim Jisas i dai, sapos ol i tanim bel long pasin nogut bilong ol, orait God bai rausim sin bilong ol!
Tasol i gat narapela samting moa. Sapos ol i tanim bel long pasin bilong givim baksait long feitful wok bilong Jisas, ol i tanim bel long givim baksait long Jisas, orait long De bilong BIKPELA, long De bilong bikpela kot bilong BIKPELA, orait ol i no inap lukim belhat bilong God, ol i no inap fesim pe bilong sin bilong ol. Nogat. Ol bai sindaun gutpela na kisim gutpela win, gutpela malolo!
Tasol i gat sampela samting moa! Lukim lain 21. Sapos ol i tanim bel long pasin bilong givim baksait long feitful wok bilong Jisas, ol i tanim bel long givim baksait long Jisas, orait ol bai sindaun wantaim Jisas long nupela heven na nupela graun!
God i salim Jisas i kam long ol Juda (ol lain Israel) pastaim, na bihain God i salim Jisas i kam long yumi ol narapela lain manmeri. Pastaim ol Israel ol i harim gutnius i tokaut long God i kisim bek sin manmeri long feitful wok bilong Jisas long diwai kros tasol, na bihain yumi tu yumi harim dispela gutnius i tokaut long God i kisim bek sin manmeri long feitful wok bilong Jisas long diwai kros tasol.
Na long wanem as God i blesim ol Israel na i blesim yumi na Em i salim gutnius bilong Jisas i kam long yumi? Em i blesim ol Israel na yumi tu bilong tanim yumi na yumi no bihainim moa pasin nogut bilong yumi. Em i blesim yumi bilong tanim bel bilong yumi na yumi bilipim na trastim God long kisim bek yumi long feitful wok bilong Jisas long diwai kros, na God i rausim na fogivim sin bilong yumi na yumi kisim gutpela sindaun na gutpela win long De bilong BIKPELA.
Pastaim ol aposel i autim tok bilong feitful wok bilong Jisas, ol i witnisim Jisas long ol lain Juda (ol lain Israel), na bihain ol i autim tok bilong feitful wok bilong Jisas, ol i witnisim Jisas long ol narapela lain manmeri. Na bihain, dispela gutnius bilong feitful wok bilong Jisas i kam long yumi tu. God i mekim dispela gutnius i kam long ol Israel na i kam long yumi tu, bai yumi tanim bel long pasin nogut bilong yumi na yumi bilipim na trastim God long kisim bek yumi long feitful wok bilong Jisas. Long dispela rot God bai fogivim na rausim sin bilong yumi na yumi kisim gutpela sindaun na gutpela win long De bilong BIKPELA, na yumi sindaun wantaim Em long nupela heven na nupela graun oltaim oltaim.
Ol brata na sista, ating blesim yumi laik kisim tumas em i ol samting bilong dispela graun tasol, na yumi no tingim olsem, gutnius i tokaut long God i kisim bek sinmanmeri long feitful wok bilong Jisas em i nambawan gutpela blesim bilong God. Yumi tingim olsem God i stap bilong givim ol kago samting long yumi na yumi sindaun gutpela long ples bilong yumi. Yumi tingim olsem ol kago samting em i blesim bilong God. Yumi tingim olsem gutnius bilong God i stap bilong kamapim ol kago samting long yumi na yumi sindaun gutpela long ples, na yumi no tingim olsem, gutnius i stap bilong tanim yumi wanwan na yumi no bihainim moa pasin nogut bilong yumi – i stap bilong givim laip long yumi.
Ol brata na sista, yumi mas save olsem, God i no bisi na Jisas i no bisi long tilim ol kago samting long yumi manmeri bilong dispela graun. Nogat. Tupela i bisi long tanim bel bilong ol planti manmeri, bai ol i no bihainim moa pasin nogut bilong ol, na ol i bilipim na trastim feitful wok bilong Jisas long diwai kros, na God i fogivim sin bilong ol, na long De bilong BIKPELA ol i no inap fesim belhat bilong God. Ol bai kisim gutpela win, gutpela malolo, na sindaun wantaim Jisas long heven, long nupela heven na nupela graun, oltaim oltaim.
Tru tumas, dispela em i nambawan blesim God i ken i givim yumi!
God Em i God bilong bihainim promis bilong Em.
Tasol hau na bai yumi save olsem ol dispela samting i tru o nogat? Lukim lain 21-25. Long bipo tru God i bin promisim ol dispela samting. God i bin promisim Moses olsem, long lain bilong Moses yet, long ol lain Israel, Em bai kirapim wanpela profet olsem Moses. Na dispela profet bai winim Moses. Long wanem, dispela profet i gat pawa bilong givim laip na pawa bilong rausim laip – laip na dai bai i stap long han bilong Em. Profet God i bin promisim Moses em i Jisas.
Lukim lain 23. Sapos wanpela man i no harim na bihainim tok bilong dispela profet (Jisas), orait em bai lus long lain Israel. Ol lain Israel em ol lain manmeri bilong God. Em olsem na Pita i minim olsem, manmeri i no harim na bihainim tok bilong dispela profet Jisas, orait ol bai i stap autsait long lain manmeri bilong God, em ol manmeri bilong nupela heven na nupela graun. Manmeri i no harim na bihainim Jisas, orait Jisas bai rausim ol na ol i no inap lukim laip wantaim Em long heven.
Lukim lain 24. Pita i skruim tok na em i tokaut long profet Samuel wantaim olgeta profet i bin tokaut long dispela profet God i bin promisim – ol i tokaut long Jisas. Ol i tokaut long taim God bai salim Jisas i kam long dispela graun na Em bai mekim olgeta wok bilong fogivim sin na oraitim sinmanmeri long ai bilong God, bai ol i ken i kisim laip.
Long maus bilong ol profet bilong bipo God i bin tokaut na promisim olsem, BIKPELA Jisas bai kam na Em bai mekim wok bilong stretim sinmanmeri na givim laip long ol. Na ol manmeri i sanap long tempel na ol i lukim mirakel na ol i harim tok bilong Pita, ol i lukim pinis God i bihainim promis bilong Em, God i fulfilim promis bilong Em. Ol i bin lukim Jisas, na ol i bin givim baksait long Em, tasol nau ol i gat sanis bilong tanim bel na bilipim na trastim Jisas, na God i fogivim sin bilong ol na kisim bek ol long feitful wok bilong Jisas. Ol i gat sanis bilong kisim laip long feitful wok bilong Jisas.
Ol brata na sista, yumi mas save olsem, olgeta taim God i save bihainim ol promis bilong Em – olgeta taim God i save fulfilim ol promis bilong Em. God Em i God bilong bihainim promis bilong Em – God Em i God bilong fulfilim promis bilong Em. Long dispela as, taim God i tokim yumi long tanim bel na bilipim na trastim Jisas na bihainim Jisas, na long rot bilong feitful wok bilong Jisas God bai fogivim sin bilong yumi na givim laip long yumi, na yumi no inap lukim belhat bilong God long sin bilong yumi, orait yumi ken i trastim God long bihainim dispela tok bilong Em.
Pita i skruim tok long ol manmeri Juda na em i helpim ol holim tingting long ol samting ol tumbuna papa bilong ol i bin tokim ol. God i bin mekim kontrak promis long tumbuna papa Abraham na God i tokim Abraham olsem, “Long rot bilong ol lain pikinini bilong yu, ol lain manmeri bilong dispela graun bai kisim blesim” (lain 25). (Yu ken i lukim dispela bipo tok long Jenesis 12:3 na Jenesis 22:18 na Jenesis 26:4.) Lukim tok bilong Jisas long Jon 8:56….
56Tumbuna bilong yupela, Abraham, i kisim bikpela amamas tru taim em i tingim taim bilong Mi – em i bin lukim taim bilong Mi na em i amamas tru.
Abraham em i save long Jisas na em i save olsem, long rot bilong Jisas ol kainkain Juda (Israel) manmeri ol i ken i lukim blesim bilong God, na ol narapela kainkain manmeri bilong dispela graun ol i ken i lukim blesim bilong God tu.
Blesim bilong God long feitful wok bilong Jisas em i no nupela samting.
Pita em i no tokim ol manmeri long ol nupela samting. Nogat. Ol i lukim pinis ol dispela samting long Tok bilong God, tasol ol i no save na ol i no klia long as na minim bilong ol dispela toktok. Na bilong yumi dispela blesim bilong God long feitful wok bilong Jisas em i no nupela samting – yumi ken i lukim long Olpela Testamen – Olpela Testamen i pulap long stori bilong blesim bilong God long feitful wok bilong Jisas.
Ol brata na sista, blesim bilong God long feitful wok bilong Jisas em i no nupela samting. (Ol tok i tokaut long God i kisim bek sinmanmeri long rot bilong baptais o long rot bilong Sabat o long rot bilong gutpela pasin o long rot bilong misin pasin, ol dispela toktok i nupela tok!). Tok Pita i autim na tok mi autim long yupela (long God i kisim bek sinmanmeri long feitful wok bilong Jisas tasol) em i no nupela tok.
Nambawan blesim bilong God em i no ol kago samting. Nogat. God i salim Jisas i kam long yupela, long yumi, long rot bilong gutnius bilong feitful wok bilong Jisas, “bilong blesim yupela olsem, long tanim yupela olgeta wanwan, bai yupela i no bihainim moa pasin nogut bilong yupela” – bai yupela, yumi, no bihainim moa ol pasin bilong tumbuna bilong yumi na yumi no bihainim moa ol pasin bilong ples.
God i salim Jisas i kam long yumi long rot bilong gutnius, bai yumi bilipim na trastim Em, bai yumi bilipim na trastim God long fogivim olgeta sin bilong yumi (kisim bek yumi), long feitful wok bilong Jisas long diwai kros tasol. Dispela em i nambawan blesim bilong God, long wanem, long dispela rot tasol bai yumi no inap lukim belhat bilong God long sin bilong yumi, God bai fogivim sin bilong yumi, na yumi kisim gutpela win na malolo, na yumi sindaun wantaim Jisas long nupela heven na nupela graun.
Ol brata na sista, yumi no ken i tingting tasol long ol kago samting long hia bilong dispela graun. Nogat. Yumi tingim blesim bilong God long feitful wok bilong Jisas na yumi amamas na tok tenkyu long God long blesim bilong Em.
Sapos misineri bilong yu o pasta bilong yu i autim trupela gutnius i tokaut long God i kisim bek sinmanmeri long feitful wok bilong Jisas long diwai kros tasol, orait yu no ken i krosim em long em i no givim ol kago long yupela na em i no kamapim ol sevis long ples bilong yupela. Nogat. Taim em i tokim yu long feitful wok bilong Jisas, orait em i givim nambawan blesim bilong God long yupela. Taim em i tokim yu long lusim pasin bilong ol tumbuna bilong yu na yu lusim pasin bilong ples, orait em i givim nambawan blesim bilong God long yupela. Ol kago samting em i liklik samting, tasol blesim bilong God long feitful wok bilong Jisas em i bikpela bikpela samting stret – em i nambawan blesim bilong God long yupela.
Em olsem na, maski yu tok baksait na yu daunim man i karim tok bilong feitful wok bilong Jisas i kam long yu. Yu tok tenkyu long God i salim Jisas i kam long yupela long rot bilong gutnius i tokaut long God i kisim bek sinmanmeri long feitful wok bilong Jisas tasol. Tok tenkyu na litimapim nem bilong God! Amamas na tok tenkyu long God! Kalap kalap na tok tenkyu long God!
Yupela i kisim blesim bilong God na yupela i tanim bel pinis na yupela bilipim na trastim Jisas, yupela bilipim na trastim God long kisim bek yupela long feitful wok bilong Jisas tasol, orait yupela wantaim yupela litimapim nem bilong God na yupela wantaim tok tenkyu long God long blesim bilong Em long feitful wok bilong Jisas. Maski yumi kros long brata na sista bilong yumi. Wantaim yumi litimapim nem bilong God na tok tenkyu long Em long blesim bilong Em long gutnius i tokaut long God i kisim bek yumi long feitful wok bilong Jisas long diwai kros tasol.
Em tasol.
