Buk Song

¹BIKPELA, long wanem as Yu sanap longwe?
Long wanem as Yu hait taim trabel i kamap?

²Ol man nogut ol i save bikhet na ranim ol rabis manmeri;
mekim ol i pundaun long toktok ol yet i mekim bilong pundaunim ol narapela.
³Long wanem, man nogut em i save apim em yet long ol pasin nogut em i laik mekim,
na man i hangre long kisim planti kago em i save mekim tok nogut long BIKPELA na givim baksait long Em.
⁴Man nogut i save apim em yet, em i no tingim BIKPELA bai kotim em;
em i tingim olsem, “God i no stap.”
⁵Olgeta samting em i mekim i save kamap gutpela;
em i bikhet long dispela na em i no save tingim tok bilong Yu,
na em i save tok bilas long ol birua bilong em.
⁶Em i save mekim dispela kain tok, “Wanpela samting i no inap pundaunim mi;
amamas bai i stap wantaim mi olgeta taim na mi no inap painim wanpela trabel.”
⁷Maus bilong em i pulap long tok swea na tok giaman na tok bilong tretim ol narapela;
trabel na pasin nogut i pas long tang bilong em.
⁸Em i save hait nabaut long ples na wetim ol gutpela man;
long ples hait em i kilim i dai ol man i no gat helpim bilong ol i stap;
ai bilong em i was long ol manmeri i no gat strong.
⁹Em i save hait na was olsem laion i save mekim long ples hait;
em i hait na was bilong holim ol man i no gat helpim bilong ol i stap,
na em i holimpas ol na em i karim ol i go long umben bilong em.
¹⁰Em i holimpas ol na ol i pundaun na em i krungutim ol;
strong bilong man nogut i winim ol.
¹¹Em i save mekim dispela kain tok, “God i lusim tingting pinis;
Em i karamapim fes bilong Em na Em i no inap lukim pasin bilong mi.”

¹²BIKPELA plis kirap! God, plis mekim save long ol man nogut.
Yu no ken i lusim tingting long ol man i no gat helpim bilong ol i stap.
¹³Long wanem as ol man nogut i save tok bilas long Yu?
Long wanem as ol i mekim tok olsem, “God i no inap kotim mi.”
¹⁴Tasol, God, Yu save lukim, na Yu klia olgeta long trabel na hevi ol i save kamapim,
na bai Yu mekim save long ol.
Ol man i no gat helpim bilong ol i stap ol i save trastim Yu long lukautim ol;
long wanem, Yu save helpim ol pikinini i no gat papa bilong ol i stap.
¹⁵Brukim han bilong ol man nogut na ol man i mekim pasin nogut.
Kotim ol man nogut wantaim pasin nogut bilong ol;
long wanem, sapos Yu no kotim ol, orait husat bai kotim ol?

¹⁶BIKPELA Em i king bilong oltaim oltaim;
Em bai rausim olgeta lain nogut long graun bilong Em.
¹⁷BIKPELA, Yu save harim prea bilong ol lain bilong kisim hevi;
Yu save strongim ol, na Yu save harim krai bilong ol.
¹⁸Yu save difenim ol pikinini i no gat papa bilong ol i stap na ol manmeri i kisim bagarap long han bilong ol man nogut.
Yu save mekim olsem bai ol man nogut bilong dispela graun ol i no inap pretim ol moa.