Buk Song
Prea Bilong Devit.
1BIKPELA, plis harim singaut i stretpela;
plis harim krai bilong mi.
Plis putim ia bilong Yu long prea bilong mi, long maus i no gat giaman.
2Mi laik Yu wokim disisen long mi na ol manmeri i klia mi no gat rong.
Larim ai bilong Yu i lukim stretpela pasin.
3Yu traim bel bilong mi, na long nait Yu skelim mi.
Yu sekim mi, na Yu no inap painim samting nogut.
Mi bin wokim disisen olsem, maus bilong mi i no ken i mekim sin.
4Mi no bihainim pasin bilong ol manmeri bilong dispela graun;
mi bihainim tok bilong Yu
na mi abrusim pasin bilong ol man bilong mekim trabel.
5Lek bilong mi i pas olgeta long rot bilong Yu,
na wanpela taim lek bilong mi i no wel.
6Mi singaut long Yu, God, long wanem, Yu save harim singaut bilong mi;
tanim ia bilong Yu i kam long mi, na harim prea bilong mi.
7Plis soim gutpela feitful lavim bilong Yu,
Yu God bilong Sevim ol manmeri i trastim Yu long lukautim ol;
long han sut bilong Yu, Yu sevim ol long birua bilong ol.
8Holim mi long lavim tru bilong Yu;
haitim mi long sado bilong wing bilong Yu,
9bai ol man nogut i laik mekim trabel long mi
na ol birua i laik kilim mi i dai na i raunim mi, ol i no ken i lukim mi.
10Ol i pasim bel bilong ol na ol i no tingting long marimari;
long maus bilong ol, ol i mekim bikhet toktok.
11Ol i lukim lek mak bilong mi na ol i raunim mi;
long ai bilong ol, ol i was bilong pundaunim mi long graun.
12Ol i olsem wanpela laion i laik tumas long brukim skin;
i olsem wanpela yangpela laion i hait na i was i stap.
13BIKPELA, plis kirap. Kotim ol, na mekim ol i pundaun.
Yusim sod bilong Yu bilong sevim mi long ol man nogut.
14Bikpela, long han bilong Yu, plis sevim mi,
sevim mi long ol man bilong dispela graun, em ol man i no inap lukim gutpela samting long bihain.
Yu save pulimapim ol long ol planti gutpela samting,
na ol i karim planti pikinini bilong ol,
na bihain, ol bai lusim olgeta samting bilong ol long han bilong ol liklik pikinini bilong ol.
15Tasol mi, long stretpela rot bai mi lukluk yet long fes bilong Yu;
taim mi wekap, bai mi amamas long lukim Yu.