Buk Song

DEVIT I RAITIM DISPELA SONG. EM BILONG MAN I BOSIM MUSIK.

¹Ol skai antap i tokaut long glori bilong God,
na ol samting bilong skai i toksave long wok God i mekim long han bilong Em.
²Long olgeta nupela de dispela toktok i kapsait,
na long olgeta nait dispela save i kamap ples klia moa.
³Na i no gat wanpela hap na i no gat wanpela tokples we ol dispela
toktok i no kamap na ol manmeri i no harim. Nogat.
⁴Nek bilong ol dispela samting i ron i go long olgeta hap bilong dispela graun,
ol wanwan toktok bilong dispela samting i go pinis long olgeta 4-pela kona.
Long skai antap God i sanapim haus sel bilong san,
⁵na san i kam ausait olsem man i laik marit na em i redi na i lusim rum bilong em i kam ausait,
na i olsem man i laik ran na em i kam ausait na i amamas long ranim resis bilong em.
⁶Long skai antap san i kamap arere na em i wokabaut i go long hapsait,
na i no gat wanpela samting i no pilim hot bilong em.

⁷Lo bilong BIKPELA em i stret na tru
na i kirapim gen strong long laip bilong manmeri.
Tok bilong BIKPELA em i tru olgeta
na i givim trupela save long manmeri i no gat save.
⁸Tisim bilong BIKPELA em i rait olgeta
na i givim amamas long bel bilong manmeri.
Wanwan lo bilong BIKPELA em i lait olgeta
na i givim lait long ai bilong manmeri.
⁹Pasin bilong pret long BIKPELA em i klin olgeta
na i stap oltaim oltaim.
Toksave bilong BIKPELA em i strong
na i stretpela na gutpela olgeta.
¹⁰Olgeta Tok bilong BIKPELA i winim gol
na i winim ol planti gol i gutpela tru.
Olgeta Tok bilong BIKPELA i swit moa na i winim hani
na i winim ol naispela hani i switpela tumas.
¹¹Na tu, Tok bilong BIKPELA i save givim woning long wokboi bilong Yu;
manmeri i bihainim Tok bilong BIKPELA ol i lukim gutpela samting tru.

¹²Husat inap skelim na save long olgeta rong bilong em?
Ol rong mi mekim na i hait long ai bilong mi, plis fogivim mi.
¹³Plis stopim mi, wokboi bilong Yu, long bikhet na mi pasim ai na mi mekim sin,
plis, mi no laik ol dispela sin i bosim laip bilong mi.
Mi laik i stap stret na i no gat asua,
mi laik i stap stret na mi no wokim ol planti sin.

¹⁴Mi laik olgeta tok bilong maus bilong mi na olgeta tingting bilong bel bilong mi i stap stret long ai bilong Yu, BIKPELA,
Ston bilong mi na God Bilong Baim Bek mi.