Buk Song

DEVIT I RAITIM DISPELA SONG. EM BILONG MAN I BOSIM MUSIK.

¹King em i amamas long strong bilong Yu, BIKPELA. Yu givim win long em* long ol birua bilong em, na em i gat bikpela amamas long Yu.

²Yu kamapim olgeta samting king i bin tingting long mekim,
na olgeta samting em i askim Yu, Yu bin givim em. Sila.
³Yu bin kam long em na Yu blesim em long ol gutpela gutpela blesim,
na Yu putim kraun gol long het bilong em.
⁴Em i askim Yu long laip, na Yu givim laip long em;
Yu skruim laip bilong em i go oltaim oltaim.
⁵Em i kisim bikpela glori long ol win Yu bin givim em long ol birua bilong em;
Yu mekim em i stap naispela tru na i stap bikpela bikpela samting stret.
⁶Tru tumas Yu blesim em long blesim bilong oltaim oltaim;
Yu stap wantaim em na dispela i givim bikpela amamas tru long em.
⁷Long wanem, king em i trastim BIKPELA;
long rot bilong feitful lavim bilong God Antap king em i no inap lus.

⁸Han bilong yu, king, bai holimpas olgeta birua bilong yu;
han sut bilong yu bai holim strong ol manmeri i egensim yu.
⁹Taim yu soim pes bilong yu,
bai yu pinisim ol olsem hatpela paia i pinisim olgeta samting.
Belhat bilong BIKPELA bai pinisim ol,
na paia bilong Em bai kukim ol.
¹⁰Yu bai rausim ol lain pikinini bilong ol long dispela graun;
yu bai rausim ol na ol i no i stap hauslain moa.
¹¹Maski ol i wokim ol plen nogut bilong bagarapim yu,
na ol i pasim tok nogut bilong daunim yu,
ol dispela samting i no gat strong na ol i no inap winim yu.
¹²Long wanem, yu bai mekim ol i pret nogut tru na ranawe;
yu bai sanap na makim pes bilong ol long ol spia bilong yu.