Buk Song
DEVIT I RAITIM DISPELA SONG.
1Dispela graun em bilong BIKPELA,
em wantaim olgeta samting i pulap long en,
olgeta ples wantaim olgeta manmeri, olgeta i bilong BIKPELA.
2Long wanem, long namel long solwara BIKPELA i mekim graun i drai i kamap,
long namel long wara i dip tumas Em i mekim olgeta hap graun i kamap na i stap strong.
3Husat i ken i go antap long maunten bilong BIKPELA bilong lotuim Em?
Na husat i ken i sanap long holi ples bilong Em bilong lotuim Em?
4Man i gat klinpela han na klinpela bel,
man i no amamas long bihainim ol giaman,
man i no tok tru antap bilong giamanim narapela manmeri,
dispela kain man em i ken i go antap na sanap bilong lotuim BIKPELA.
5Em bai kisim blesim long han bilong BIKPELA
na God bilong sevim em bai givim stretpela pasin long em.
6Ol lain manmeri i bihainim BIKPELA ol i stap olsem,
em ol manmeri i laik lukim pes bilong God bilong Jekop. Sila.
7Yupela ol get, yupela op!
Na yupela ol dua bilong bipo bipo, yupela op,
bai King bilong glori i kam insait.
8Na King bilong glori Em i husat?
Em i BIKPELA, i gat strong na i gat pawa,
Em i BIKPELA, i gat pawa bilong winim olgeta pait.
9Yupela ol get, yupela op!
Na yupela ol dua bilong bipo bipo, yupela op,
bai King bilong glori i kam insait.
10Na King bilong glori Em i husat?
BIKPELA bilong bosim olgeta olgeta samting,
Em tasol Em i King bilong glori! Sila.
