Buk Song

DEVIT I RAITIM DISPELA SONG.

¹BIKPELA, mi laik Yu tasol i skelim mi.
Long wanem, long laip bilong mi, mi bihainim Yu trutru;
mi save trastim BIKPELA na mi no tubel liklik.
²Skelim mi, BIKPELA, na traim mi;
lukim bel na tingting bilong mi.
³Long wanem, mi save holim tingting long feitful lavim bilong Yu,
na feitful pasin bilong Yu i stiaim wokabaut bilong mi.

⁴Mi no save sindaun wantaim ol manmeri bilong toktok nating,
na mi no save raun wantaim ol manmeri bilong giaman.
⁵Mi hetim bung bilong ol manmeri nogut,
na mi no inap sindaun wantaim ol manmeri i mekim pasin nogut.

⁶Long pasin i tru mi wasim han bilong mi
na mi kam sanap long alta bilong Yu, BIKPELA,
⁷na long bikmaus mi tok tenkyu long Yu
na mi tokaut long olgeta gutpela samting Yu save wokim.
⁸BIKPELA, mi amamas tru long haus Yu sindaun long en,
dispela ples we glori bilong Yu i stap long en.

⁹Plis, Yu no ken i mekim save long mi taim Yu mekim save long ol sinmanmeri,
na Yu no ken i rausim laip bilong mi wantaim ol manmeri i amamas long kilim ol man.
¹⁰Long han bilong ol, ol i holim ol plen bilong mekim pasin nogut,
na han sut bilong ol i pulap long ol samting bilong braibim ol man.

¹¹Tasol mi, mi bai wokabaut trutru;
plis sevim mi na mekim grasia long mi.

¹²Lek bilong mi i sanap long graun i stret olgeta;
long bikpela bung mi bai amamas na givim biknem long BIKPELA.