Buk Song

DEVIT I RAITIM DISPELA SONG.

¹BIKPELA Em i lait bilong mi na Em i pawa bilong sevim mi,
bai mi pret long husat?
BIKPELA Em i strongpela banis bilong laip bilong mi,
bai mi guria long husat?
²Taim ol manmeri nogut i kam bilong paitim mi
bilong pinisim laip bilong mi,
taim ol i birua long mi na ol i egensim mi,
em ol yet i tanim lek na pundaun.
³Maski wanpela ami i kam bilong egensim mi,
bel bilong mi i no inap pret;
maski ol i karim pait i kam long mi,
mi bai sanap strong.

⁴Mi askim BIKPELA long wanpela samting,
wanpela samting tasol mi laikim –
mi laik sindaun long haus bilong BIKPELA
long olgeta de bilong laip bilong mi,
na mi lukim gutpela bilong BIKPELA
na mi harim tok bilong Em long tempel bilong Em.
⁵Long wanem, long taim bilong trabel,
Em bai lukautim mi insait long haus bilong Em;
Em bai haitim mi aninit long haus sel bilong Em;
Em bai litimapim mi i go antap long bikpela ston.
⁶Olsem na Em bai litimapim mi
bilong winim ol birua i raunim mi,
na long haus sel bilong Em mi bai bikmausim amamas bilong mi na wokim ol ofa;
bai mi singim ol song na mekim musik long BIKPELA.

⁷BIKPELA, taim mi krai na singaut long Yu plis harim;
mekim grasia long mi na bekim mi!
⁸Yu bin tok olsem,
“Kam long Mi.”
Long bel bilong mi, BIKPELA, mi laik kam long Yu.
⁹Plis, Yu no ken i hait long mi.
Plis, Yu no ken i belhat na rausim wokman bilong Yu;
planti taim Yu helpim bilong mi.
God bilong sevim mi,
plis, Yu no ken i givim baksait long mi,
plis, Yu no ken i lusim mi.
¹⁰Maski papa na mama bilong mi i lusim mi,
BIKPELA bai kisim na lukautim mi.
¹¹Skulim mi long olgeta samting bilong Yu, BIKPELA,
na lidim mi i go long rot i stret,
long wanem, ol birua bilong mi i stap.
¹²Plis, Yu no ken i lusim mi i go long laik bilong ol birua,
long wanem, ol giaman witnis i kirap bilong egensim mi,
na ol i laik bagarapim mi nogut tru.

¹³Tingting bilong mi i stap olsem,
bai mi lukim gutpela bilong BIKPELA
hia long dispela graun.
¹⁴Wetim BIKPELA;
sanap strong, na yu no ken i bel hevi i stap,
na yu wetim BIKPELA!