Buk Song

DEVIT I RAITIM DISPELA SONG.

¹BIKPELA, mi singaut long Yu;
Ston bilong mi, plis Yu no ken pasim ia bilong Yu.
Nogut Yu i stap kwait tasol
na mi stap olsem ol manmeri i go daun long hul i dip tumas.
²Taim mi singaut bilong kisim marimari,
taim mi krai long Yu bilong kisim helpim,
taim mi litimapim han bilong mi long Holi Holi Ples bilong Yu,
plis harim nek bilong mi.

³Plis, Yu no ken i pulim mi i go wantaim ol manmeri nogut,*
wantaim ol manmeri i wokim ol pasin i no stret.
Plis, Yu no ken i pulim mi i go wantaim manmeri i mekim switpela tok long ol narapela manmeri na long seim taim
ol i tingting long mekim pasin nogut long ol.
⁴Bekim ol inap long wok bilong ol,
inap long ol pasin nogut bilong ol.
Bekim ol inap long ol samting ol i wokim long han bilong ol,
na givim pe long ol inap long pasin ol i mekim.
⁵Ol i no save tingim ol wok bilong BIKPELA,
na ol i no tingim ol wok bilong han bilong Em;
long dispela as Em bai kapsaitim ol
na Em i no inap kirapim ol gen.

⁶Litimapim nem bilong BIKPELA!
Long wanem, Em i harim nek bilong mi taim mi singaut bilong kisim marimari.
⁷BIKPELA Em i strong bilong mi na Em i difens bilong mi;
bel bilong mi i trastim Em, na Em bai helpim mi;
bel bilong mi i amamas tru,
na mi bai tok tenkyu long Em long song bilong mi.

⁸BIKPELA Em i strong bilong ol lain bilong Em;
Em i strongpela banis bilong sevim man Em i bin makim.
⁹Sevim ol manmeri bilong Yu, blesim ol manmeri Yu bin makim bilong Yu yet.
Yu wasman bilong sipsip, plis was long ol na karim ol oltaim oltaim.

* Devit i tok long God i pulim ol i go bilong mekim save long ol.