Buk Song

DEVIT I RAITIM DISPELA SONG BILONG SINGIM TAIM OL I WOKIM TEMPEL PINIS NA OL I LAIK MAKIM BILONG GOD YET.

¹Bai mi litimapim nem bilong Yu, BIKPELA,
long wanem, Yu bin sevim mi long bikpela hevi,
na Yu no larim ol birua bilong mi i amamas long mi bagarap.
²BIKPELA, God bilong mi, mi bin singaut long Yu bilong kisim helpim bilong Yu,
na Yu oraitim mi.
³Yu, BIKPELA, Yu bin kisim mi i kamaut long ples bilong ol daiman;
Yu givim laip long mi na mi no go daun long hul i dip tumas.

⁴Singim ol song bilong litimapim nem bilong BIKPELA;
yupela ol feitful manmeri bilong BIKPELA, yupela litimapim holi nem bilong Em.
⁵Long wanem, belhat bilong Em i stap liklik taim,
tasol belgut bilong Em long ol i stap oltaim long laip bilong ol;
sori na kraikrai i ken i stap long biknait,
tasol amamas i save kamap long moningtaim.

⁶Taim mi stap gutpela, orait mi bin apim mi yet na mi tok olsem,
“Wanpela samting i no inap pundaunim mi.”
⁷Long belgut bilong Yu, BIKPELA,
Yu bin mekim maunten bilong mi i sanap strong,
tasol taim Yu haitim pes bilong Yu long mi, pret i save daunim mi.

⁸Long Yu, BIKPELA, mi save singaut;
long BIKPELA mi singaut bilong kisim marimari bilong Em.
⁹Sapos mi dai, na mi go daun long matmat,
orait dispela i gutpela olsem wanem?
Graun i no inap litimapim nem bilong Yu,
na em i no inap tokaut long feitful pasin bilong Yu.
¹⁰BIKPELA, plis harim prea bilong mi na mekim marimari long mi;
BIKPELA, plis helpim mi.

¹¹Yu bin tanim kraikrai bilong mi na mekim em i kamap amamas;
Yu bin rausim klos bilong kraikrai bilong mi na Yu karamapim mi long klos bilong amamas,
¹²bai bel bilong mi i singim na litimapim nem bilong Yu na i no ken i stap kwait.
BIKPELA, God bilong mi, bai mi tok tenkyu long Yu oltaim oltaim.