Buk Song

Devit i Raitim Dispela Song. Em Bilong Man i Bosim Musik Na Ol i Ken i Yusim Ol Flut.

¹BIKPELA, plis harim prea bilong mi;
plis skelim tok mi mekim long Yu.
²King na God bilong mi, plis harim kraiaut bilong mi,
long wanem, long Yu tasol mi prea.
³BIKPELA, long olgeta moning Yu harim nek bilong mi;
long olgeta moning mi givim prea bilong mi long Yu na mi wet long kisim gutpela bekim bilong Yu.

⁴Long wanem, Yu no God i save amamas long pasin nogut;
ol manmeri i mekim pasin nogut ol i no inap i stap wantaim Yu.
⁵Yu no save larim ol bikhet manmeri i sanap long ai bilong Yu;
Yu save hetim ol manmeri i mekim pasin nogut.
⁶Yu save distroim ol manmeri i save mekim tok giaman;
ol manmeri i kilim narapela manmeri i dai na ol manmeri i save trikim narapela manmeri, BIKPELA Yu save hetim ol moa.

⁷Tasol, long rot bilong feitful lavim bilong Yu,
bai mi go insait long haus bilong Yu.
Mi bai daunim mi yet na brukim skru
na mi tanim fes bilong mi i go long holi tempel bilong Yu.
⁸BIKPELA, plis kisim mi i go long ol stretpela pasin bilong Yu,
long wanem, planti birua bilong mi i stap;
helpim mi long bihainim wei bilong Yu.

⁹Long wanem, ol birua bilong mi ol i no save mekim trupela tok liklik;
bel bilong ol i bagarap olgeta;
maus bilong ol i olsem matmat i op i stap;
ol i save yusim tang bilong ol bilong trikim ol manmeri.
¹⁰God, plis mekim ol i karim hevi bilong pasin nogut bilong ol;
larim ol i pundaun long toktok ol i save mekim.
Sin bilong ol i pulap, olsem na, rausim ol i go longwe long Yu,
long wanem, ol i bikhet na ol i egensim Yu.

¹¹Tasol, Yu save givim amamas long ol manmeri i trastim Yu long lukautim ol;
bai ol i singim song na amamas.
Karamapim ol long lukaut bilong Yu,
bai ol manmeri i lavim nem bilong Yu, ol i ken amamas long Yu.
¹²Long wanem, BIKPELA Yu save blesim ol stretpela manmeri bilong Yu,
Yu save raunim ol long bel gut bilong Yu na ol i stap seif olgeta.