Buk Song
Devit i Raitim Dispela Song. Em Bilong Man i Bosim Musik. Yusim Inap Long Mut-Laben.
1Bai mi tok tenkyu tru long Yu BIKPELA,
na bai mi tokaut long olgeta gutpela wok Yu bin mekim.
2Bai mi amamas moa long Yu,
na bai mi singim song bilong apim nem bilong Yu,
BIKPELA Antap Tru.
3Ol birua bilong mi i ranawe,
na long ai bilong Yu ol i pundaun na bagarap.
4Long wanem, Yu bin sapotim stretpela wok bilong mi;
Yu bin sindaun long sia bilong jas na Yu kamapim stretpela disisen.
5Yu bin kotim ol manmeri bilong ol kantri nabaut, na Yu bagarapim ol lain nogut.
Yu bin rausim nem bilong ol olgeta na i no stap moa.
6Ol birua ol i pinis na ol i no inap kirap gen;
Yu bin kapsaitim ol siti bilong ol,
na i no gat wanpela memori bilong ol i stap.
7Tasol BIKPELA Em i king oltaim oltaim;
Em i stap king bilong stretim ol samting i no stret.
8Long stretpela wei Em i skelim ol manmeri bilong dispela graun;
Em bai mekim fea na skelim ol lain manmeri.
9Ol man i kisim hevi long han bilong ol man nogut ol i ken i trastim BIKPELA long lukautim ol.
Ol i ken i trastim BIKPELA long lukautim ol taim trabel i kamap.
10Manmeri i save long nem bilong Yu, BIKPELA, ol bai trastim Yu.
Long wanem, Yu no save lusim manmeri i trastim Yu.
11Singim song bilong litimapim nem bilong BIKPELA, Em i stap king long Saion!
Namel long olgeta lain manmeri, tokaut long olgeta gutpela pasin bilong Em!
12Long wanem, Em i no inap lusim tingting long mekim save long ol man i bagarapim narapela man,
na Em i no inap givim baksait long kraiaut bilong ol man i karim hevi.
13BIKPELA, plis marimari long mi!
Lukim pen na hevi ol birua i givim mi,
Olgeta taim Yu save helpim mi na mi no dai.
14Plis helpim mi nau na mi ken i stap na litimapim nem bilong Yu,
na long Saion mi ken i stap
na amamas long Yu bin sevim mi.
15Ol manmeri bilong ol kantri nabaut ol i pundaun long hul ol yet i bin wokim;
lek bilong ol i stak long umben ol yet i bin haitim.
16BIKPELA i bin putim Em yet long ples klia; Em i stretim samting i no stret,
olsem na, ol manmeri nogut i bagarap long ol samting nogut ol yet i bin mekim.Higgaion. Sila
17Ol manmeri nogut, ol bai lus,
em olgeta manmeri bilong ol kantri nabaut i lusim tingting long God.
18Tasol God i no inap lusim tingting long ol rabisman,
na ol man i putim trastim bilong ol long God ol i no westim taim bilong ol.
19BIKPELA, plis kirap. Yu no ken i larim pasin bilong ol man i win.
Yu yet mas kotim ol manmeri bilong ol kantri nabaut.
20BIKPELA, plis mekim ol i pret nogut,
na mekim ol i save olsem ol i manmeri tasol.Sila
