Galesia

Ol narapela aposel i pas wantaim Pol.

2

¹Na bihain long 14-pela yia mi bin i go bek gen long Jerusalem, na mi kisim Barnabas i go wantaim mi. Mi bin kisim Taitus tu na em i go wantaim mipela. ²God i bin soim mi olsem mi mas i go na long dispela as mi go. Em olsem na taim mi kamap long Jerusalem mi bin tokaut klia long gutnius mi save autim long ol Jentail manmeri. Long wanem, nogut ol i tingim wok mi bin mekim i no trupela wok. (Mi mekim dispela toktok long ai bilong ol lidaman tasol.) ³Na Taitus i stap wantaim mi, na yupela save Taitus em i man Grik, tasol ol i no fosim em long katim skin bilong em. ⁴Dispela toktok i bin kamap bikos long ples sampela giaman brata i bin hait i stap namel long mipela. Mipela i stap fri long lo bikos Krais Jisas i bin mekim wok bilong mipela. Ol dispela giaman brata i kam spai long mipela bikos ol i laik banisim mipela gen long lo. ⁵Tasol mipela no orait liklik long tok bilong ol, bai trupela tok bilong gutnius i ken i stap na yupela i ken i kisim.

⁶Na i luk olsem ol sampela lidaman i stap ol i gat namba. Namba bilong ol i olsem wanem mi no save tasol dispela i no bikpela samting long mi. Long wanem, God i no save skelim man long antap skin samting. Na ol dispela lidaman i gat namba ol i no skruim wanpela tok moa long toktok mi bin mekim. ⁷Nogat. Ol i luksave olsem God i bin givim wok long mi bilong autim gutnius long ol Jentail manmeri wankain olsem God i bin givim wok long Pita bilong autim gutnius long ol Juda. ⁸Long wanem, God i wok insait long wok aposel Pita i bin mekim namel long ol lain Juda, na ol i luksave olsem, God i wok insait long wok aposel mi bin mekim namel long ol Jentail manmeri. ⁹Long ai bilong ol manmeri Jems na Pita na Jon i olsem strongpela pos bilong sios, na taim ol i luksave olsem God i bin givim grasia long mi, orait ol i sekan long mi na Barnabas bilong soim olsem ol i wanbel olgeta long bilip bilong mitupela. Na mipela olgeta i pasim tok olsem, mitupela mas i go na mekim wok namel long ol Jentail manmeri na ol i mas i go na mekim wok namel long ol lain Juda. ¹⁰Ol i givim wanpela tok tasol long mipela. Ol i tok mipela mas holim tingting long ol manmeri i stap rabis, em dispela samting mi laik tru long mekim.

Pol i stretim Pita.

¹¹Taim Pita i bin i kam long Antiok mi bin stretim em long fes bilong em yet. Long wanem, i klia olsem em i gat rong. ¹²Pastaim em i save kaikai wantaim ol Jentail manmeri. Tasol, taim ol sampela man i bin kamap, em ol man Jems i bin salim ol i kam, orait em i lusim ol Jentail manmeri na em i stap separet long ol. Long wanem, em i pret long ol lain i pas long pasin bilong katim skin. ¹³Ol narapela Juda manmeri tu i bin mekim wankain pasin giaman Pita i bin mekim. Na long dispela pasin giaman bilong ol Barnabas tu i bin pundaun.

¹⁴Taim mi lukim pasin bilong ol i no pas tru long trupela toktok bilong gutnius, mi bin tokim Pita long ai bilong olgeta olsem, “Yu man Juda, tasol yu no bihainim ol pasin bilong ol Juda, nogat, yu save bihainim pasin bilong ol Jentail. Em olsem na long wanem as yu fosim ol Jentail long mekim pasin bilong ol Juda?”

Long wok Krais i mekim God i kolim yumi “stretpela man”.

¹⁵Yumi i bon insait long lain Juda, yumi no olsem ol Jentail sin manmeri, ¹⁶tasol yumi save olsem, God i no kolim wanpela man stretpela man long pasin bilong bihainim lo. Nogat. God i ken i kolim man stretpela man long feitful wok bilong Jisas Krais tasol. Em olsem na yumi bilipim na trastim Jisas Krais, bai God i ken i kolim yumi stretpela man long feitful wok Krais i bin mekim; i no long wok yumi i mekim long bihainim lo. Long wanem, wanpela man i no inap tru long kamap stretpela man long ai bilong God long wok bilong ol long bihainim lo.

¹⁷Tasol, sapos mipela i laik God i kolim mipela stretpela man long wok Krais i bin mekim, na i luk olsem mipela tu i stap olsem sin manmeri, orait dispela i minim olsem wei bilong Krais i sapotim sin, a? Nogat tru! ¹⁸Sapos mi kirapim gen samting mi bin lusim, orait dispela i soim olsem mi sakim lo. ¹⁹Long wanem, tok bilong lo yet i bin kilim mi i dai, bai mi ken i stap laip aninit long God. ²⁰Taim Krais i dai i olsem mi bin i dai wantaim Em. Olpela laip bilong mi i pinis na nau mi stap long nupela laip bilong Krais. Nau olgeta samting mi mekim long laip bilong mi, mi save mekim bikos Pikinini Man bilong God i bin feitful long mekim wok. Em i bin lavim mi na Em i givim Em yet bilong helpim mi. ²¹Mi no save mekim grasia bilong God i kamap samting nating. Long wanem, sapos lo em inap mekim yumi kamap stretpela man long ai bilong God, orait Krais Em i dai nating tasol.