Galesia

Ol pikinini bilong God.

4

¹Tok mi mekim em i olsem: Olgeta samting bilong papa em bilong pikinini man bilong em, tasol taim pikinini i stap liklik yet em i no kisim ol samting bilong papa na em i stap olsem em i wanpela wokboi nating. ²Em mas i stap aninit long ol waspapa na aninit long ol man bilong lukautim olgeta samting i go inap long taim papa bilong em i bin makim. ³Na wankain olsem, yumi bin i stap olsem liklik pikinini na yumi kalabus i stap aninit long lo i bosim dispela graun. ⁴Tasol, long taim God i bin makim, God i salim Pikinini Man bilong Em i kam. Wanpela meri i karim Em, na Em i bon aninit long lo. ⁵God i salim Em i kam bilong baim bek manmeri i stap aninit long lo, bai God i ken adoptim mipela na mekim mipela i stap pikinini man i kamap bikpela pinis. ⁶Nau yupela i stap bikpela pikinini bilong God, na long dispela as God i salim Spirit bilong Pikinini Man bilong Em i kam na i stap insait long laip bilong yupela, na dispela Spirit i save tokaut, “Aba, Papa.” ⁷Olsem na, yu no i stap moa olsem yu wanpela wokboi nating. Nogat. Nau yu i stap bikpela pikinini man bilong God. God tasol i mekim yu kamap olsem na long dispela as olgeta samting bilong Papa em bilong yu.

Pol i sori tumas long ol Galesia.

⁸Bipo, taim yupela no save long God, yupela i stap wokboi nating bilong ol god i no god tru. ⁹Tasol nau yupela i kisim save long God. Ating mobeta mi tok, God i save long yupela. Em olsem na, long wanem as yupela i tanim i go bek gen long lo i bosim dispela graun, ol lo i no gat strong na i no gat kaikai bilong em i stap, a? Ating yupela i laik kalabus gen long dispela samting, a? ¹⁰Yupela save lukautim ol spesol de na ol spesol mun na ol spesol taim na ol spesol yia. ¹¹Mi sori tumas long yupela. I luk olsem mi bin westim taim bilong mi long mekim wok namel long yupela.

¹²Plis ol brata, plis mi laik yupela i kamap olsem mi, long wanem mi bin kamap olsem yupela. Yupela no bin wokim wanpela rong long mi. ¹³Yupela save pinis, mi bin kisim sik na long dispela as mi bin kam long yupela na mi autim gutnius long yupela fes taim. ¹⁴Sik bilong mi i bin givim hatwok long yupela, tasol yupela no tok baksait long mi na daunim mi. Nogat. Yupela i bin welkamim mi olsem mi wanpela ensel bilong God na olsem mi Krais Jisas yet. ¹⁵Na dispela amamas bilong yupela nau em i stap we? Tru tumas, long dispela taim, yupela i gat bikpela amamas long mi, na sapos yupela inap, yupela inap kamautim ai bilong yupela bilong givim mi bilong oraitim mi. ¹⁶Tasol nau yupela i tingim olsem mi birua bilong yupela bikos mi autim trupela gutnius long yupela.

¹⁷Ol dispela man i strong long pulim yupela, ol i no gat gutpela tingting bilong mekim gutpela long yupela. Nogat. Ol i laik birua i kamap namel long yupela na mipela, bai yupela i strong long bihainim ol tasol. ¹⁸Ol i strong long pulim yupela, na dispela pasin em i gutpela sapos ol i gat gutpela tingting na ol i pulim yupela i go long gutpela samting na ol i mekim olsem olgeta taim maski mi stap wantaim yupela o nogat. ¹⁹Ol liklik pikinini bilong mi, mi kisim pen gen long yupela, olsem mama i kisim pen taim em i laik karim pikinini. Bai mi karim dispela pen i go inap long taim we trupela wei bilong Krais i kamap pinis long laip bilong yupela. ²⁰Bikpela laik bilong mi i olsem, mi laik i stap wantaim yupela nau na toktok isi wantaim yupela, long wanem mi paul long pasin bilong yupela.

Hagar na Sara i olsem wanpela tok bokis.

²¹Yupela ol man i laik i stap aninit long lo, yupela tokim mi, yupela save long toktok lo i mekim o nogat? ²²Buk bilong God i mekim tok olsem, Abraham i gat 2-pela pikinini man. Slevmeri bilong em i karim wanpela, na frimeri bilong em i karim wanpela. ²³Pikinini bilong slevmeri, em i bin kamap long wei olgeta pikinini i save kamap. Tasol pikinini bilong frimeri, God i bin mekim promis na em i kamap.

²⁴Yumi ken i yusim dispela stori olsem wanpela tok bokis. Dispela tupela meri i makim tupela kontrak. Hagar i makim kontrak bilong maunten Sainai, na ol pikinini em i karim ol i stap slev olsem Hagar. ²⁵Hagar i makim maunten Sainai bilong kantri Arebia, na dispela i olsem Jerusalem bilong nau bikos Jerusalem bilong nau wantaim ol pikinini bilong em i stap olsem ol slev. ²⁶Tasol Jerusalem bilong antap em i fri, na em i olsem mama bilong mipela. ²⁷Long wanem, buk bilong God i mekim tok olsem,

Yu meri we bel bilong yu i drai pinis,
na yu i no save karim pikinini,
yu ken i amamas.
Yu meri i no bin pilim pen bilong karim pikinini,
mekim singaut bilong amamas.
Long wanem, bai yu i gat planti pikinini moa long meri i gat man.

(Aisaia 54:1)

²⁸Na yupela, ol brata, yupela wankain olsem Aisak na yupela i stap pikinini bilong promis. ²⁹Long taim bilong Aisak, pikinini man i kamap long wei olgeta pikinini i save kamap em i bin mekim nogut long pikinini man i bin kamap long strong bilong Holi Spirit. Na dispela kain pasin i stap yet. ³⁰Tasol buk bilong God i tok wanem? Em i tok, “Rausim slevmeri wantaim pikinini man bilong em. Long wanem, pikinini man bilong slevmeri i no inap tru long serim olgeta gutpela samting wantaim pikinini bilong frimeri.” (Jenesis 21:10) ³¹Em olsem na, ol brata, mipela no pikinini bilong slevmeri. Nogat. Mipela pikinini bilong frimeri tasol.