Moning.
Yumi i bilipim na trastim feitful wok bilong Jisas, yumi i bihainim Jisas, yumi i trastim God long kisim bek yumi long feitful wok bilong Jisas, orait, yumi save olsem, yumi bai fesim hevi pastaim na bihain yumi sindaun wantaim Jisas long heven. (Lukim Sande Baibel Toktok “Bai yumi kisim hevi. ”)
Tasol, sampela taim, taim yumi kisim ol sampela hevi, yumi tingim olsem, God i no kea long wanem kain hevi i kamap long yumi. Long Rom 8:26-27 God i strongim yumi na i olsem Em i tokim yumi olsem, “Yes, yupela pikinini bilong Mi, na yupela bai kisim hevi, tasol yupela no ken i tingim olsem yupela i stap wanpis na Mi no kea, nogat, Holi Spirit bilong Mi i stap wantaim yupela bilong helpim yupela.” God i pasim Holi Spirit long ol manmeri bilong Em bilong helpim ol. Em olsem na i olsem God i tok, “Yes, Mi kea.” (Lukim Sande Baibel Toktok “Yumi no i stap wanpis. ”)
Nau bai yumi skelim ol sampela samting moa na yumi save moa long gutpela kea na lukautim bilong God. Tru, God Em i kea long yumi na Em i kea long ol hevi yumi save kisim. Tok bilong aposel Pol long Rom 8:28-30 bai helpim yumi save moa long kea na lukautim bilong God.
28 Na yumi save pinis, God i save bosim olgeta samting bilong mekim gut long ol manmeri i lavim Em, em ol manmeri God i singautim long laik na plen bilong Em. 29 Bipo tru God i save tru long lain bilong Em, na Em i bin makim ol bilong mekim ol i kamap wankain olsem Pikinini bilong Em na bai dispela Pikinini i stap fesbon bilong planti brata. 30 Na ol lain God i bin makim, Em i singautim ol. Na ol lain God i singautim, Em i givim stretpela pasin long ol na kolim ol “stretpela man”. Na ol lain God i kolim “stretpela man”, Em i kisim ol i kam insait long glori bilong Em. Rom 8:28-30.
Long dispela tok yumi ken i save long 3-pela samting:
1. God i bosim na kontrolim olgeta samting bilong mekim gutpela long yumi.
God Em i no inap mekim save long yumi na Em i no inap mekim nogut long yumi i pas long feitful wok bilong Jisas. Nogat. God i yusim olgeta pawa na olgeta strong bilong Em na Em i bosim na kontrolim olgeta samting bilong mekim gutpela long yumi. God i bosim na kontrolim olgeta samting. Na Em i mekim olsem bilong wokim ol gutpela gutpela samting long yumi i pas long Em long rot bilong feitful wok bilong Jisas long diwai kros.
Em olsem na, yumi ken i save olsem, God Em i bosim na kontrolim olgeta kainkain hevi i kamap long yumi. Em i mekim olsem bilong wokim ol gutpela gutpela samting long yumi. Ol kainkain hevi i no kamap long narapela rot. Nogat. Long pawa na strong bilong God tasol. Na ol kainkain hevi i no kamap bilong mekim save long yumi o bilong daunim yumi. Nogat. God Em i bosim na kontrolim ol kainkain hevi bilong mekim ol gutpela gutpela samting long yumi.
2. God i bosim na kontrolim olgeta samting bilong mekim yumi kamap olsem Jisas.
Sampela taim yumi tingim olsem, God i bosim na kontrolim olgeta samting bai yumi ken i kisim ol kainkain gutpela samting olsem gutpela sindaun, na gutpela marit, na gutpela pikinini, na gutpela kopi, na gutpela kago, na ol kainkain gutpela samting olsem. Tasol nogat. God i bosim na kontrolim olgeta samting bilong senisim yumi, bai yumi save long Em na yumi kamap kain manmeri olsem Jisas.
Yu save, tingting bilong yumi i go long wanpela rot, na tingting bilong God i go long narapela rot. Tingting bilong yumi manmeri bilong dispela graun i go long ol kago samting bilong dispela graun. Em olsem na, taim yumi tingim ol samting bilong God, orait tingting bilong yumi i go long ol kago samting bilong God.
Tasol God i no bisi long ol kago samting bilong dispela graun na Em i no bisi long ol kago samting bilong heven. Nogat. God Em i bisi long senisim ol lain bilong Em. Em i laik ol i save long Em na ol i kamap olsem Jisas. Gutpela samting trutru i olsem, yumi save long God na yumi kamap kain man olsem Jisas long bel bilong yumi na long wokabaut bilong yumi na bilong sindaun bilong yumi.
3. God i bosim na kontrolim olgeta samting bilong karim yumi seif i go long heven.
Yumi save olsem, God i yusim olgeta pawa na olgeta strong bilong Em bilong bosim na kontrolim olgeta samting. Em i mekim olsem bilong mekim gutpela long yumi na senisim yumi na mekim yumi kamap kain manmeri olsem Jisas yet.
Na God i yusim olgeta pawa na olgeta strong bilong Em bilong bosim na kontrolim olgeta samting bilong karim yumi seif i go long heven. God i no laik wanpela manmeri bilong Em i lus o i pundaun long rot. Nogat. God i bosim na kontrolim olgeta samting bai ol lain bilong Em i kamap seif long heven.
Em olsem na, Holi Spirit i singautim yumi. Holi Spirit i opim ai na ia na bel bilong yumi na yumi tanim bel na bilipim na trastim feitful wok bilong Jisas na yumi bihainim Em.
Long wok bilong Jisas long diwai kros God i kamapim rot bilong rausim na fogivim olgeta sin bilong yumi na bilong kolim yumi “stretpela manmeri”. Yumi no stretpela manmeri. Nogat. Tasol wok bilong Jisas i mekim yumi kamap stretpela manmeri long ai bilong God. Em olsem na Holi Spirit i opim ai na ia na bel bilong yumi bilong kisim yumi i kam long rot bilong Jisas.
Na God i mekim ol dispela samting bilong kisim yumi i go long ples bilong Em. Em olsem na i no gat kwesten mak long yumi. Nogat. Bai yumi sindaun wantaim Jisas long glori bilong Em. Long wanem, God i bosim na kontrolim olgeta samting bai yumi sindaun wantaim Jisas long glori bilong Em.
Sapos yumi yet yumi mas yusim strong bilong yumi yet na yumi sindaun wantaim Jisas long glori bilong Em, orait yumi no inap sindaun wantaim Jisas long glori bilong Em. Long wanem, yumi no gat strong bilong opim ai na ia na bel bilong yumi yet na yumi bilipim na trastim Jisas. Nogat. Na tu, yumi feil manmeri na yumi inap pundaun long rot. Long wanem, yumi no gat pawa na yumi no gat strong.
Tasol, olgeta tenkyu i go long God. Long wanem, God yet i gat pawa na i gat strong na Em i yusim olgeta pawa na strong bilong Em bilong bosim na kontrolim olgeta samting bilong kisim yumi i kam insait long femili bilong Em na bilong sindaunim yumi wantaim Jisas long glori bilong Em long heven.
Tru tumas, God Em i kea long yumi na Em i lukautim yumi. Kea na lukautim bilong God i moa moa moa yet. Em olsem na, yumi ken i stap bel isi na givim olgeta tenkyu i go long gutpela gutpela God bilong yumi.
Glenn.
