God i blesim trupela bilip.

Bilong harim (Audio)

Moning.

Ol planti manmeri long olgeta hap bilong dispela graun ol i gat bikpela laik long lukim ol kainkain sain samting na ol kainkain mirakel samting. Yumi save pinis olsem, long P.N.G. i gat planti manmeri i gat bikpela laik long lukim ol dispela samting. Long Baibel i gat stori i stap long ol kainkain sain na ol kainkain mirakel na planti manmeri long ples bilong yumi ol i laik lukim ol dispela kain samting long ai bilong ol yet.

Na i no ol manmeri bilong P.N.G. tasol i gat bikpela laik long lukim ol dispela samting. Nogat. Planti manmeri bilong olgeta hap ol i laik lukim ol kainkain sain na ol kainkain mirakel. Na ol sampela misineri tu ol i laik lukim long ai bilong ol yet na ol i ken i raun long as sios bilong ol na stori long ol dispela samting. Bilong ol planti manmeri ol sain na mirakel em i bikpela samting long tingting bilong ol na ol i laik lukim.

Yumi bin skelim Aposel 4:29-30 na yumi ken i tingim olsem, ol bilip manmeri bilong Jerusalem ol tu ol i laik lukim ol kainkain sain na mirakel samting. Long Aposel 4:29-30 Luk (man i raitim buk Aposel) em i stori long ol bilip manmeri bilong Jerusalem ol i prea long BIKPELA na askim Em long wokim ol sain na mirakel.

Em olsem tasol taim yumi skelim Aposel 4:29-30 yumi ken i save olsem, ol sain na mirakel em i no bikpela samting long ol. Nogat. Bikpela samting long ol i olsem, ol i laik ol hauslain bilong ol i save olsem, Jisas i stap laip na Jisas Em i Man God i makim bilong kisim bek sinmanmeri. Long dispela as tasol ol i prea na askim BIKPELA long wokim ol sain na mirakel samting.

Ol sain na ol mirakel i soim olsem Jisas i stap laip. Pastaim Jisas i raun long ol wanwan ples na ol i lukim Em i wokim ol sain na ol mirakel. Na bihain, taim Jisas i dai pinis na Em i kirap pinis, orait ol i lukim ol sain na mirakel moa, na dispela i helpim ol i save olsem, trutru Jisas i kirap na Em i stap laip.

Ol bilip manmeri bilong Jerusalem ol i laik ol hauslain bilong ol i save long Jisas na ol i kisim laip long feitful wok bilong Jisas olsem ol. Ol i no laik lukim nating ol sain na mirakel tasol. Nogat. Ol i laik hauslain bilong ol i bilipim na trastim na bihainim na givim biknem long BIKPELA Jisas. Dispela em i bikpela tingting bilong ol. Dispela em i nambawan tingting bilong ol. Long dispela as tasol ol i prea na askim BIKPELA long wokim ol sain na mirakel samting.

Orait na, ol i kisim dispela kain tingting na ol i prea, na wanem samting i kamap? Yumi lukim Aposel 5:12-16….

¹²Na ol aposel i wokim ol planti sain na mirakel namel long ol manmeri. Na olgeta manmeri bilong sios ol i save bung wantaim long veranda bilong Solomon. ¹³Ol narapela manmeri ol i amamas long ol, tasol ol i pret tumas long kam bung wantaim ol. ¹⁴Na planti manmeri moa yet i bilip long BIKPELA. Ol planti man na ol planti meri ol i kam insait long lain bilong BIKPELA. ¹⁵Em olsem na ol manmeri i karim ol sikman i go autsait long rot na ol i slipim ol long ol kainkain bet na laplap, bai sado bilong Pita i ken i tasim ol. ¹⁶Na ol manmeri bilong olgeta taun nabaut long Jerusalem ol tu i kam bung, na ol i kisim sikman i kam wantaim ol man i gat spirit nogut, na olgeta i kamap orait.

Long lain 14 Luk em i tok klia olsem, ol “planti manmeri moa yet i bilip long BIKPELA. Ol planti man na ol planti meri ol i kam insait long lain bilong BIKPELA.”

Tru tumas BIKPELA i harim prea bilong ol, na as tingting bilong prea bilong ol i kamap olsem ol i askim BIKPELA! Em i blesim trupela bilip bilong manmeri i bilipim na trastim Jisas trutru. Em i blesim ol na Em i wokim ol sain na mirakel, bai ol manmeri ol i ken i save olsem, Jisas Em i Man God i makim bilong kisim bek ol kainkain sinmanmeri. Na ol planti kainkain sinmanmeri ol i tanim bel na ol i bilipim na trastim na bihainim Jisas. Ol i kisim laip long feitful wok bilong Jisas. God i kisim bek ol long feitful wok bilong Jisas.

Yumi gat bikpela laik tumas long lukim nating ol sain na mirakel.

Ol brata na sista, ating planti manmeri long ples bilong yumi ol i gat bikpela laik tumas long lukim ol sain na mirakel, tasol ol i no kisim tingting long bel bilong ol olsem ol bilip manmeri long Jerusalem i kisim. Ol planti manmeri long ples bilong yumi ol i laik lukim ol sain na mirakel samting tasol, na ol i no tingting long helpim ol manmeri i save olsem Jisas Em i Man God i makim bilong kisim bek sinmanmeri. Ol i no tingting long putim olgeta gutpela wok bilong Jisas long ples klia bai ol manmeri ol i ken i tanim bel na bilipim na trastim feitful wok bilong Jisas. Ol i no tingting long witnisim Jisas bai ol manmeri ol i ken i save olsem, God i kisim bek sinmanmeri long feitful wok bilong Jisas tasol.

Na planti taim tumas ol sampela manmeri ol i gat bikpela laik long lukim ol sain na mirakel, tasol ol yet ol i les long Jisas na les long tanim bel na les long bilipim na trastim feitful wok bilong Jisas. Ol yet ol i les long kisim trupela save long feitful wok bilong Jisas na ol i les long ol narapela manmeri i kisim trupela save long feitful wok bilong Jisas. Ol i no opim maus bilong ol na tokaut long Jisas na tokaut long feitful wok bilong Jisas na tokaut long God i kisim bek sin manmeri long feitful wok bilong Jisas tasol. Nogat. Ol i laik lukim nating ol sain na mirakel tasol.

Bai yumi lukim ol sain na mirakel samting mi no save. Tasol wanpela samting mi save long en i olsem, i mobeta long yumi kisim wankain tingting olsem ol bilip manmeri bilong Jerusalem. Mobeta yumi tingim ol hauslain bilong yumi, na yumi askim God long givim strong long yumi bilong autim tok bilong feitful wok bilong Jisas, na long dispela rot ol wanwan manmeri long hauslain bilong yumi ol i ken i kisim trupela save long feitful wok bilong Jisas, na ol i tanim bel na bilipim na trastim na bihainim Jisas.

Trupela bilip em i blesim bilong God.

Harim tok bilong Jisas long Tomas long Jon 20:29….

²⁹Yu bin lukim Mi na long dispela as yu bilip; blesim i stap wantaim manmeri i no bin lukim Mi tasol ol i bilip.

Yumi tingim olsem ol manmeri i lukim ol kainkain sain na mirakel, orait God i blesim ol na ol i lukim. Jisas i tok olsem, ol manmeri i no bin lukim ol kainkain sain na mirakel, i no bin lukim Jisas i kirap long matmat na wokabaut, na ol i bilip, orait ol dispela manmeri God i blesim ol trutru. God i opim ai na ia na bel bilong ol na ol i bilipim na trastim na bihainim Jisas, ol i kisim nupela laip long feitful wok bilong Jisas, feitful wok bilong Jisas i kisim ol i kam insait long femili bilong God, orait ol dispela manmeri i lukim blesim trutru bilong God.

Yumi i no lukim ol sain na ol mirakel na God i givim bilip long yumi, orait yumi lukim trupela blesim bilong God.

Glenn.

Sapos yu laik save moa long dispela tok, orait yu lukim Aposel 5:12-16 long Autim Tok long pngbibleresources.org.