Moning.
Husat i ken i prea? Ating mobeta yumi senisim dispela askim na yumi tok, “God i harim prea bilong husat?” Yumi skelim tok bilong God yet long dispela samting – lukim Ol Provep 15:8 na 15:29….
8BIKPELA i hetim tru ol ofa bilong ol man nogut,
Tasol Em i laikim prea bilong ol stretpela man.29BIKPELA i stap longwe tru long ol man bilong mekim pasin nogut,
tasol Em i harim prea bilong ol stretpela manmeri.
Long Ol Provep wantaim ol song na ol prea i stap insait long Buk Song, taim ol i tok “stretpela man” , orait ol i makim ol lain manmeri bilong God. God yet i save stretim ol lain manmeri bilong Em. Long wok bilong God yet God i stretim ol. Na ol dispela manmeri ol i bilipim na trastim God long stretim ol. Ol lain manmeri God yet i stretim, orait God i kolim ol “stretpela manmeri.” Na ol dispela manmeri ol i save tanim bel na ol i bihainim God.
Na taim Ol Provep na Buk Song i tok “ol man i mekim pasin nogut” , orait ol i makim ol manmeri God i no stretim, na ol dispela manmeri ol i no tanim bel na i no bilipim na trastim na bihainim God.
Na yumi i lukim na skelim Nupela Testamen, orait yumi save olsem, God i stretim ol lain bilong Em long feitful baim bek wok bilong Jisas long diwai kros. Ol manmeri God i stretim long feitful wok bilong Jisas, orait God i kolim ol “stretpela manmeri.” Rom 3:23-24 i tok olsem….
Olgeta manmeri ol i wankain tasol. 23Ol i manmeri bilong mekim sin, na ol i kamap sot long glori bilong God. 24Na God i ken i kolim ol “stretpela man” long wok Krais Jisas i bin mekim bilong baim bek manmeri. Dispela em i presen bilong God, na i kam long rot bilong grasia bilong God.
Na ol dispela manmeri ol i bilipim na trastim God long stretim ol long feitful wok bilong Jisas, na ol i tok tenkyu long God long stretim wok bilong Jisas, na ol i lavim Em na ol i bihainim Em.
Em olsem na, dispela 2-pela ves bilong Ol Provep 15:8 na 29 i tokaut klia olsem, God i laikim prea bilong ol lain bilong Em, na Em i stap longwe long ol manmeri i no lain bilong Em. God i harim prea bilong ol lain manmeri i tanim bel na i bilipim na trastim God long stretim ol, tasol Em i no save harim prea bilong ol manmeri i no laik tanim bel na ol i wok bilong stretim ol yet.
Lukim 1 Pita 3:12….
12…..BIKPELA i save lukautim ol stretpela lain bilong Em,
na Em i save harim prea bilong ol.
Tasol BIKPELA Em i egensim ol man i mekim pasin nogut.
Tok bilong Pita i klia. God i wanbel wantaim ol lain manmeri bilong Em (em ol lain manmeri God yet i stretim long feitful baim bek wok bilong Jisas) na Em i save lukautim ol na Em i save harim prea bilong ol. Tasol God i no wanbel long ol manmeri i no laik tanim bel na bilipim na trastim God long stretim ol long feitful wok bilong Jisas. Nogat. Em i egensim ol – Em i bel hat long ol. Na yu tingim na skelim – God i no inap harim prea bilong ol dispela manmeri. Nogat. Em i egensim ol tasol.
God i harim prea bilong ol lain bilong Em.
Yumi mas klia olsem, God i save harim prea bilong yumi i bilipim na trastim feitful wok bilong Jisas. God i save putim ia bilong Em long toktok yumi mekim long prea bilong yumi. Em save harim toktok yumi mekim long prea bilong yumi. Tasol God Em i egensim ol manmeri i no laik tanim bel na trastim Em long stretim ol. Em i no inap harim prea bilong ol.
Sampela stia toktok.
Manmeri i no tanim bel na i no bilipim na trastim God long kisim bek ol long feitful baim bek wok bilong Jisas, orait yumi no ken i makim ol long mekim prea long sios miting bilong yumi.
Sapos God i no save harim prea bilong manmeri i no bilipim na trastim God long stretim ol na kisim bek ol long feitful wok bilong Jisas long diwai kros, orait yumi tu yumi no ken i harim. Ol i no pas long rot yumi pas long en, olsem na prea bilong ol i no inap stiaim tingting bilong yumi long ol gutpela na trupela samting bilong God. Prea bilong ol i no inap helpim yumi tok tenkyu long God long feitful stretim wok bilong Jisas long diwai kros.
Mi laik mekim liklik tok long yupela manmeri bilong kongregesen….
- Sapos yu no tanim bel na yu no bilipim na trastim God long stretim yu long feitful wok bilong Jisas tasol, na mipela askim yu long mekim prea, orait yu mas tok klia olsem, “Mi no ken i prea.”
- Na sapos yu tanim bel pinis na yu bilipim na trastim God long stretim yu na kisim bek yu long feitful wok bilong Jisas long diwai kros, na yu laik prea na mipela no save askim yu, orait yu mas tokim mipela olsem, “Mi tanim bel pinis na mi bilipim na trastim feitful wok bilong Jisas.”
- Na sapos yu no tanim bel na mipela no save askim yu long mekim prea, orait yu no ken i bel hevi long mipela. Long wanem, mipela no abrusim yu nating, nogat. Mipela laik bihainim tok bilong God tasol na long dispela as mipela no askim yu. Plis yu mas rispektim dispela pasin bilong mipela.
Orait, nau yumi save pinis….
Husat i ken i prea? Manmeri i tanim bel na i bilipim na trastim Jisas tasol i ken i prea. God i save harim prea bilong ol lain bilong Em tasol.
Em olsem na, long ol sios femili i bilipim na trastim na bihainim feitful baim bek wok bilong Jisas long diwai kros, orait yumi bihainim dispela tok tasol.
Glenn.
