Moning.
Mi laik stori long wanpela pren bilong mi. Pren bilong mi i bin lusim lotu bilong em na em i laik pas long narapela lotu. Em olsem na, bihain, ol sampela lida bilong bipo lotu bilong em i kam long haus bilong em. Ol i sindaun long haus na ol lida i tokim pren bilong mi olsem, “Lukim. Mipela rausim nem bilong yu long buk bilong mipela, na dispela i minim olsem, mipela rausim nem bilong yu long Buk bilong Laip i stap long heven. Sapos yu kam bek long lotu bilong mipela, orait mipela ken i putim nem bilong yu i go bek gen. Tasol sapos yu no kam bek, orait yu bai lus olgeta.”
Yu save, planti pret toktok i stap olsem ol lotu lida i bin mekim long pren bilong mi. Ol i toktok planti na ol i toktok strong. Na yumi harim toktok bilong ol i go i go na long bel bilong yumi, yumi tingting planti na yumi pret. Yumi tingim olsem, “Nogut ol i tok tru na yumi lus.”
Tasol, ol i tok tru o nogat? Ol i gat strong bilong rausim nem bilong yumi long Buk bilong Laip o nogat? Ol i gat pawa bilong rausim yumi long han bilong Jisas o nogat? Sapos yumi bilipim na trastim feitful wok bilong Jisas, orait, wanpela samting i ken i rausim yumi long God na yumi lus gen o nogat?
Nau moning mi laik strongim yu na mi laik tokim yu olsem, God i save lavim ol manmeri Em i kisim bek, olsem na, wanpela samting i no inap separetim ol long Em. Lukim Rom 8:35-39.
35 Husat inap rausim yumi long lavim bilong Krais? Ol kain trabel nabaut i ken i kamap, na ol kain hevi i ken i kamap, na ol kain bagarap i ken i kamap, tasol ol dispela kain samting i no inap tru long rausim yumi long lavim bilong Krais. Nogat. Na kaikai i ken i sot na klos i ken i sot, na samting nogut i ken i kamap, na pait i ken i kamap, tasol ol dispela kainkain samting i no inap tru long rausim yumi long lavim bilong Krais long yumi. 36 Dispela kain tok i stap pinis long Buk bilong God, na i tok,
“Bilong Yu yet mipela i save kisim bagarap olgeta taim.
Ol i lukim mipela i olsem sipsip
bilong kilim i dai tasol.” (Buk Song 44:22)37 Maski wanem kain samting i kamap long yumi Krais i save lavim yumi tru na long dispela as yumi bai winim olgeta kainkain trabel. 38 Mi klia pinis long dispela. Wanpela samting i no inap tru long rausim yumi long lavim bilong Krais. Dai na laip i no inap. Ol ensel na ol spirit nogut i no inap. Ol samting bilong nau na ol samting bilong bihain i no inap. Na bikpela strong bilong wanpela samting i no inap. 39 Ol samting bilong antap na ol samting bilong daunbilo i no inap. God i save lavim yumi tru na Em i soim yumi lavim bilong Em long wok bilong Krais Jisas Bikpela bilong yumi. Olsem na, i no gat wanpela samting God i bin wokim inap tru long rausim yumi long dispela bikpela lavim bilong God. Rom 8:35-39.
Yumi mas klia olsem, ol manmeri God i kisim bek pinis, orait God i lavim ol. Pastaim God i lavim ol na long dispela as Em i wokim olgeta samting bilong kisim bek ol. God i lavim ol na Em i salim Jisas i kam na Jisas i dai long diwai kros bilong rausim na pinisim pe bilong sin bilong ol. God i lavim ol na Em i salim Holi Spirit i kam bilong opim ai na ia na bel bilong ol, bai ol i ken i tanim bel na bilipim na trastim feitful wok bilong Jisas, bai ol i bilipim na trastim God long kisim bek ol long feitful wok bilong Jisas tasol.
Long dispela rot God i stretim yumi long ai bilong Em yet, bai yumi i stap stretpela manmeri bilong Em long femili bilong Em. Yumi no stretpela manmeri long wokabaut na sindaun bilong yumi. Nogat. Tasol, Jisas i kisim na pinisim pe bilong sin bilong yumi pinis, na gutpela pasin bilong Jisas i karamapim nogut pasin bilong yumi, na long dispela as yumi i stap stretpela manmeri long ai bilong God.
God i lavim yumi pastaim na long dispela as God i wokim olgeta samting bilong kisim bek yumi. Na yumi mas save olsem, wanpela samting i no inap separetim yumi long lavim bilong God. Wanpela man i no inap, wanpela samting long dispela graun i no inap, wanpela samting bilong narapela hap i no inap, wanpela wokman bilong Seten i no inap, Seten i no inap. Tru tumas, wanpela samting i no inap tru long separetim ol manmeri God i lavim na i kisim bek long lavim bilong God.
Skelim tok bilong Jisas long Jon 10:27-30. Sipsip bilong Krais em i ol manmeri God i kisim bek long feitful wok bilong Jisas long diwai kros. Ol i bilipim na trastim feitful wok bilong Jisas na ol i pas long Jisas. Ol i stap long han bilong Jisas na Jisas i lukautim ol na karim ol i go seif long Papa bilong Em long heven. Feitful wok bilong Jisas i lukautim ol sin manmeri i bilipim na trastim feitful wok bilong Em.
27 Ol sipsip bilong Mi i save harim maus bilong Mi, na Mi save long ol, na ol i bihainim Mi. 28 Mi givim laip i stap gut oltaim oltaim long ol, na ol bai i no inap lus. Wanpela man i no inap tru long rausim ol long han bilong Mi. 29 Papa bilong Mi i bin givim ol long Mi, Em i winim olgeta samting, na wanpela man i no inap tru long rausim ol long han bilong Papa bilong Mi. 30 Mi na Papa bilong Mi, Mitupela i wanpela. Jon 10:27-30.
Em olsem na, yumi no ken i pret long ol pret toktok ol sampela lida bilong ol sampela lotu i mekim. Nogat. Ol i no inap tru long rausim nem bilong yumi i bilipim na trastim feitful wok bilong Jisas. Long wanem, God yet i lavim yumi, na Em i kisim bek yumi long feitful wok bilong Jisas long diwai kros, na Holi Spirit i opim ai na ia na bel bilong yumi, bai yumi save na yumi tanim bel na bilipim na trastim na bihainim Jisas. Em olsem na, husat inap winim God na rausim yumi long lavim bilong God? Wanpela samting i no inap tru. Yumi seif olgeta long lavim bilong God.
Glenn.
