Moning.
Giaman, giaman, giaman. Long olgeta hap yumi save harim planti tok giaman. Long ples na long taun tok giaman i pulap nogut tru. Man i save mekim tok giaman long meri bilong em, na meri i save mekim tok giaman long man bilong em. Pikinini i save mekim tok giaman long papamama bilong em, na papamama i save mekim tok giaman long pikinini bilong ol. Bosman i mekim tok giaman long wokman bilong em, na wokman i save mekim tok giaman long bosman bilong em.
Na sampela taim yumi tu yumi save mekim tok giaman. Tok giaman i stap klostu long yumi olgeta manmeri bilong dispela graun. Na tok giaman i stap long bel na maus bilong yumi tu.
Em olsem na, mi lukim wanpela samting na dispela samting i olsem, planti manmeri i save bilipim na trastim tok bilong ol manmeri, na ol i tubel long tok bilong God.
Yumi tok pinis, tok giaman i pulap long planti manmeri, tasol God i no save mekim tok giaman. God i no save mekim wanpela tok giaman. Olgeta tok God i mekim i stret na tru olgeta. Mobeta yumi tubel long tok bilong ol manmeri na yumi wanbel olgeta long tok God i mekim long yumi na yumi bilipim na trastim na bihainim.
Skelim wanpela tok God i mekim long Rom 8:1-2. Planti manmeri ol i tubel tumas long dispela toktok bilong God na ol i tubel long ol narapela wankain tok i stap insait long Tok bilong God. Lukim na skelim dispela 2-pela Baibel ves long buk Rom.
1 Olsem na, nau God i no save daunim manmeri i pas long Krais Jisas. 2 Long wanem, Krais Jisas i bin mekim wok, na long dispela rot lo bilong Spirit bilong laip i mekim yumi fri long lo bilong sin na dai. Rom 8:1-2.
Bikpela tok na promis bilong God i olsem, God i no save daunim manmeri i pas long Krais Jisas. Na dispela tok i minim olsem,
- Yumi i pas long Jisas God i no inap kotim yumi long wanpela samting.
- Yumi i pas long Jisas God i no inap kotim na tilim pe nogut long yumi.
- Yumi i pas long Jisas yumi no inap lukim bel hat bilong God long sin bilong yumi.
- Yumi i pas long Jisas yumi no inap lus long paia long bihain.
- Yumi i pas long Jisas God i no inap mekim save long yumi long sin bilong yumi.
Tru tumas God i no inap daunim yumi manmeri i pas long Krais Jisas.
Na husat i pas long Krais Jisas? Manmeri i pas long Krais Jisas ol i save bilipim na trastim wok Jisas yet i bin mekim long diwai kros. Ol i bilipim na trastim God long kisim bek ol long wok bilong Jisas long diwai kros tasol. Ol i klia olsem God i no inap kisim bek ol long ol naispela wok bilong ol yet. Nogat. Ol i bilip olsem God i kisim bek sinmanmeri long feitful wok bilong Jisas long diwai kros tasol. Long dispela as ol i pas olgeta long Jisas na ol i bilipim na trastim wok bilong Em na ol i stap aninit long Em.
Ol dispela manmeri ol i save amamas. Long wanem, God i no inap daunim ol long sin bilong ol. Nogat. Ol i fri long pe bilong sin bikos Jisas i bin mekim wok long diwai kros bilong friim ol long pe bilong sin.
Tasol sori tumas, planti manmeri i tubel long dispela tok bilong God. Em olsem na ol i no trastim God long kisim bek ol long feitful wok bilong Jisas long diwai kros. Nogat. Ol i tingim olsem, “Sapos mi kisim baptais na mi bihainim misin pasin na mi lukautim Sande na mi lukautim Sabat na mi wokim ol gutpela gutpela pasin, orait God i no inap daunim mi long ol sin bilong mi.” Yu save, manmeri i bihainim dispela kain tingting na dispela kain bilip, orait ol i no pas long Krais Jisas. Ol i no trastim God long kisim bek ol long feitful wok bilong Jisas tasol. Ol i no trastim wok bilong Jisas. Olsem na ol i no pas long Jisas.
Manmeri i no pas long Jisas, orait God bai daunim ol. Tasol manmeri i pas long Jisas, orait God i no inap daunim ol na ol bai i stap seif aninit long feitful wok bilong Jisas.
Na bai yu trastim tok bilong husat? Bai yu trastim tok bilong God o bai yu trastim tok bilong ol manmeri?
Tingim. God i no inap giamanim yu long wanpela samting, tasol ol manmeri inap long giamanim yu long planti samting. Olsem wanem bai yu putim laip bilong yu long han bilong manmeri i save mekim tok giaman?
Yumi sinmanmeri yumi mas putim laip bilong yumi long han bilong God tasol na yumi trastim tok bilong God tasol, na trastim God long bihainim tok bilong Em yet na kisim bek yumi long feitful wok bilong Jisas long diwai kros tasol.
Glenn.
