Moning.
Yu save, femili bilong yumi em i wanpela bikpela samting stret bilong yumi, a? Ating yumi ken i tok olsem, femili em i nambawan samting bilong yumi olgeta manmeri. Yumi save laikim femili bilong yumi tumas. Na dispela i gutpela.
Mi laik soim yupela wanpela toktok God i bin mekim long sait bilong femili. Lukim Efesus 1:4-6.
4Long bipo, taim God i no kamapim dispela graun yet, Em i bin makim yumi na pasim yumi long Krais bai yumi i stap holi na i no gat asua long ai bilong Em. Em i bin lavim yumi. 5Na long dispela as Em bin i makim yumi bilong adoptim yumi na mekim yumi kamap pikinini bilong Em long wok Jisas Krais i mekim. Na God i bihainim amamas na laik bilong Em yet na Em i mekim ol dispela samting. 6Na ol dispela samting i save givim biknem long grasia i bikpela na gutpela tumas bilong God. Na dispela grasia i fri olgeta na i kam long yumi long wok bilong dispela Man God i lavim tumas.
Aposel Pol i bin raitim dispela toktok na i salim i go long ol manmeri bilong God i stap long taun Efesus. Ol manmeri bilong God em ol manmeri i bin harim tok bilong feitful wok bilong Jisas long diwai kros (gutnius), na ol i tanim bel, na ol i bilipim na trastim God long fogivim sin bilong ol na kisim bek ol long feitful wok bilong Jisas tasol.
Na taim aposel Pol i tok “yumi”, orait pastaim em i tok long ol manmeri bilong God i stap long taun Efesus. Tasol, sapos yumi tanim bel na yumi bilipim na trastim God long fogivim olgeta sin bilong yumi na yumi trastim Em long kisim bek yumi long feitful wok bilong Jisas, orait yumi tu yumi manmeri bilong God na ol tok aposel Pol i mekim long ol manmeri bilong God long taun Efesus, orait em i mekim long yumi tu.
Em olsem na, sapos yumi i stap manmeri bilong God olsem, orait yumi ken i save olsem God Em i makim yumi bilong adoptim yumi. Em i adoptim yumi bilong kisim yumi i kam insait long femili bilong Em. Em i makim na pasim yumi long Jisas, bai Jisas i mekim yumi holi na i no gat asua long ai bilong God – Em i mekim olsem bilong adoptim yumi na mekim yumi pikinini bilong Em.
Na God i salim Holi Spirit i kam bilong opim ai na ia na bel bilong yumi, bai yumi ken i save na yumi bilipim na trastim God long kisim bek yumi – adoptim yumi – long feitful wok bilong Jisas, na yumi tanim bel na yumi amamas long lavim bilong Em na yumi bihainim Em.
Pasin bilong adoptim pikinini.
Yumi save long pasin bilong adoptim pikinini. Sapos yu adoptim wanpela pikinini, orait dispela i minim olsem yu kisim em i kam insait long femili bilong yu yet, na bai yu lukautim em olsem yu yet i karim em.
Long ples bilong mipela (ol wait) taim mipela laik adoptim pikinini mipela mas sainim ol pepa na adoptim pikinini. Na taim mipela sainim pepa pinis, orait nau pikinini em i pikinini bilong mipela stret, na wanpela manmeri i no inap kam kisim bek. Nogat. Pepa i tok pikinini i bilong mipela tasol.
Na wankain olsem yumi adoptim pikinini, orait God Em i adoptim yumi na Em i mekim yumi pikinini bilong Em. Tru tumas, God i bin adoptim yumi na mekim yumi pikinini bilong Em yet long femili bilong Em yet – i olsem God i sainim olgeta pepa na Em i adoptim yumi. Em i adoptim yumi na mekim yumi pikinini bilong Em. Em i no kolim yumi pikinini tasol. Nogat. Em i mekim yumi pikinini bilong Em. Em i mekim yumi pikinini bilong Em taim Em i adoptim yumi.
Na long wanem as God Em i adoptim yumi?
Lukim lain 5. God Em i adoptim yumi na mekim yumi pikinini bilong Em bikos Em i laik mekim olsem. Em i bihainim amamas bilong Em yet na Em i adoptim yumi. Em i bihainim laik bilong Em yet na Em i adoptim yumi. God Em i adoptim yumi bikos Em i amamas long adoptim yumi. Em i adoptim yumi bikos Em i laik adoptim yumi.
Harim. Em i no adoptim yumi bikos yumi tanim bel na bilip. Nogat. Em i no adoptim yumi bikos yumi naispela na gutpela manmeri. Nogat. God Em i makim yumi bilong adoptim yumi bikos Em i laik adoptim yumi. As bilong dispela samting i stap long tingting na bel bilong God tasol. God yet i bihainim amamas na laik bilong Em yet na Em i makim yumi na Em i adoptim yumi na Em i mekim yumi kamap pikinini bilong Em.
God em i soim yumi grasia bilong Em.
Lukim lain 6. Grasia em i no olsem marimari. Nogat. Marimari em i pasin we God i pilim sori long manmeri. Tasol grasia em i narapela samting. Grasia em i pasin we God Em i wokim disisen bilong mekim gutpela pasin long manmeri i no gutpela manmeri na i no naispela manmeri.
Yu save long pasin bilong yumi yet. Yumi ken i mekim gutpela pasin long manmeri i mekim gutpela pasin long yumi. Sapos wanpela man i mekim gutpela pasin long yumi, orait bai yumi bekim bek dispela gutpela pasin na bai yumi mekim gutpela pasin long em. Na manmeri i no mekim gutpela long yumi, orait yumi no inap mekim gutpela pasin long ol.
Tasol God i no mekim olsem long yumi. Nogat. Yu tingim. Yumi bin givim baksait long God. Yumi bin sakim tok bilong God. Yumi bin mekim pasin God i no save laikim. Yumi klia long tok bilong God tasol yumi no bihainim tok bilong Em. Yumi no lavim Em. Yumi no trastim Em. Yumi amamas long kisim na yusim ol gutpela samting bilong Em, tasol yumi no tok tenkyu long Em na yumi no tingting long bihainim Em. Yumi bikhet long Em na yumi les tru long i stap aninit long lek bilong Em.
Na dispela kain pasin Em inap kirapim belhat bilong God. Dispela kain pasin Em inap mekim God i givim baksait long yumi. Dispela kain pasin em inap mekim God i les tru long helpim yumi. Dispela kain pasin em inap rausim amamas bilong God na mekim God i mekim save long yumi. Dispela kain pasin em inap mekim God i larim yumi i kisim hevi insait long hel.
Tasol God i mekim wanem long yumi? Em i mekim gutpela pasin long yumi. Em i adoptim yumi na mekim yumi pikinini bilong Em na mekim yumi kamap femili bilong Em. Em i no aipas long pasin nogut bilong yumi. Nogat. Em i lukim. Tasol, Em i wokim disisen olsem, “Bai Mi mekim gutpela pasin long ol. Bai Mi adoptim ol na kisim ol i kam insait long femili bilong Mi yet. Bai Mi givim femili nem bilong Mi long ol. Bai ol i kamap femili bilong Mi stret na bai ol i kisim olgeta gutpela gutpela samting bilong Mi.”
Dispela pasin em i grasia pasin. Olsem na, taim God Em i makim yumi na Em i adoptim yumi, orait grasia bilong Em i kamap ples klia. Yumi mas klia olsem, long grasia bilong God tasol bai yumi sanap long heven long bihain. Yumi mas skelim gut grasia bilong God, na yumi tok tenkyu moa moa yet long God. Yumi lavim Em, yumi tok tenkyu long Em, na yumi amamas long bihainim Em olsem pikinini i bihainim paps bilong em.
Glenn.
