Moning.
Ating planti manmeri ol i tingim olsem ol i mas wokim ol gutpela pasin na God i ken i kisim bek ol. Em olsem na ol i wok long stretim laip bilong ol na ol i wok long mekim misin pasin na mekim lotu pasin na mekim ol kainkain gutpela pasin long komyuniti, na ol i tingim olsem God i ken i lukim na amamas na kisim bek ol long ol dispela samting.
Long Efesus 2:1-9 aposel Pol em i stori long manmeri bilong God long taun Efesus, em ol manmeri God i kisim bek pinis. Pastaim ol i stap insait long sin na dai na sin i karamapim ol na spirit bilong ol i no gat laip long ol samting long sait bilong God na ol i stap aninit long bel hat bilong God. Tasol, taim ol i stap yet insait long ol kainkain pasin nogut na spirit bilong ol i no gat laip long God, orait God i bin mekim wok bilong kamautim ol long sin na dai bilong ol, na Em i givim nupela laip long ol, na nau tasol ol i gat laip long ol samting long sait bilong God – nau tasol ol i gat laip bilong mekim ol kainkain gutpela wok God i redim long ol i ken i mekim.
Lukim Efesus 2:10….
10God i mekim yumi kamap nupela manmeri long wok bilong Krais Jisas. Em i mekim olsem bilong yumi ken i mekim ol kainkain gutpela wok God i bin redim long bipo bilong yumi ken i mekim.
Tingim. God Em i mekim ol i kamap nupela manmeri long wok bilong Krais Jisas tasol – God i kisim bek ol long wok bilong Krais Jisas tasol – i no long wok bilong ol. God i kisim bek ol na ol i kamap nupela manmeri pastaim, na bihain, taim God i kisim bek ol pinis na ol i kamap nupela manmeri pinis, orait ol i mekim ol kainkain gutpela wok God i redim bilong ol i ken i mekim.
God i mekim olgeta wok pinis bilong kisim bek ol – bilong kisim ol i kamaut long sin na dai na bilong givim nupela laip long ol. Em i mekim olsem, bai ol i ken i mekim ol kainkain gutpela wok. Taim God i kisim bek ol lain bilong Em pinis – taim God i kisim ol i kamaut pinis long sin na dai – taim God i givim nupela laip pinis long ol – orait God i givim ol kainkain gutpela wok long ol na ol i ken i mekim.
Gutpela wok God i redim bilong ol manmeri bilong Em.
Na God i redim wanem kain gutpela wok long ol lain bilong Em na ol i ken i mekim? Dispela gutpela wok em i wanem samting? Gutpela wok God i redim bilong ol lain bilong Em i olsem, ol i bihainim laik bilong Jisas long olgeta samting long laip na sindaun bilong ol. Sapos God i opim ai na ia na bel bilong yu na yu bilipim na trastim God long kisim bek yu long feitful wok bilong Jisas, orait maski yu meri i wokim gaden o yu bisnis man o yu mejistret o yu wokman insait long sios o yu waitman o yu blekskin man – maski yu husat, yu bihainim laik bilong Jisas long olgeta samting long laip na sindaun bilong yu.
Em olsem na….
Sapos yu wanpela papa….yu ken i lavim meri bilong yu na lukautim em gut, na yu ken i bihainim tok bilong Jisas na soim gutpela rot long ol pikinini, na yu i ken i skulim ol long tok bilong God. Na sapos pikinini bilong yu i bikpela pinis, orait yu helpim ol sindaun gut long marit bilong ol. Tisim ol long wei bilong Krais long marit.
Sapos yu wanpela marit meri….yu ken i lavim man bilong yu na lukautim em gut, na yu ken i bihainim tok bilong Jisas na soim gutpela rot long ol pikinini, na yu ken i skulim ol long tok bilong God. Na sapos yu i stap long marit nogut, orait yu no ken i larim pasin nogut bilong man bilong yu i pundaunim yu long Tok bilong God – yu holim strong na bihainim strong Tok bilong God. Na yu ken i tok isi long man bilong yu na helpim em klia long Tok bilong God na soim em wei bilong tanim bel.
Sapos yu wanpela yangpela man….yu no ken i bihainim wei bilong ples na slip nabaut wantaim ol yangpela meri. Nogat. Yu stap tasol na wetim taim bilong marit bilong yu. Na yu ken i mekim wok – maski hambak nabaut olsem sampela yangpela man i save mekim. Yu bihainim gutpela pasin na long dispela wei bai yu i stap gutpela eksempel long ol narapela bois long ples.
Tupela tingting yumi no ken i kisim.
- Sampela manmeri i tingim olsem, “Jisas i mekim gutpela wok pinis bilong helpim yumi, tasol yumi mekim ol kainkain gutpela wok bilong sapotim wok Jisas i bin mekim, na long dispela 2-pela samting God i ken kisim bek yumi.”
- Sampela manmeri i tingim olsem, “God i givim nupela laip long yumi, na long dispela as nau yumi ken i mekim pasin God i save laikim na God i ken i kisim bek yumi long dispela gutpela pasin yumi yet i mekim.”
Dispela tupela tingting i no stret. Yumi klia olsem, God i kisim bek yumi long wok Jisas i bin mekim. Em i no save kisim bek yumi long gutpela wok yumi mekim.
Yumi harim gut dispela tok i stap long Efesus 2:10. God i kamautim ol lain bilong Em long sin na dai pastaim. Em i givim ol nupela laip pastaim. Em i kisim bek ol pastaim. Em i mekim olsem, bai ol i mekim gutpela wok Em i bin redim bilong ol i ken i mekim. Ol i no mekim gutpela wok bai God i ken i laikim ol na kisim bek ol. Nogat. Ol i mekim gutpela wok bikos God i bin kisim bek ol pinis. Em i kisim ol i kam insait pinis long femili bilong Em na nau tasol ol i amamas long mekim ol gutpela wok God i redim bilong ol i ken i mekim.
Soim tenkyu bilong yumi.
Olsem na, yumi manmeri God i kamautim long sin na dai – yumi manmeri God i givim nupela laip – yumi manmeri i bilipim na trastim God long kisim bek yumi long feitful baim bek wok bilong Jisas long diwai kros – orait yumi amamas long ol dispela gutpela wok bilong God bilong kisim bek yumi. Na bilong soim tenkyu bilong yumi, orait yumi stat nau na mekim ol gutpela wok God i redim bilong yumi long mekim.
Glenn.
