Habakuk

¹Mi bai sanap long wanpela hap we em i hat tru long ol birua i ken i kam insait.
Na mi bai sanap na was gut.
Orait, mi bai wetim BIKPELA na Em bai bekim toktok bilong mi.

BIKPELA i bekim tok bilong Habakuk.

²Orait, BIKPELA i bekim tok bilong Habakuk.

“Yu mas raitim dispela tok nau Mi bai tokim yu.
Yu mas raitim gut long strongpela samting na em i mas klia olgeta.
Olsem na, man i laik autim dispela tok em i ken i ritim hariap.
³Mi bin makim taim pinis we ol dispela samting nau Mi bai tokim yu em i ken i kamap bihain.
Em i no samting bilong nau, nogat, em i samting bilong bihain.
Na dispela tok em i no giaman tok, nogat.
Dispela samting em i no inap kamap long nau, olsem na yu mas wetim taim we em i ken i kamap bihain.
Tru tumas ol dispela samting bai kamap. Em bai kamap long taim Mi bin makim pinis.

⁴“Harim. Manmeri i stretpela long rot bilong bilipim God bai stap laip.
Tasol, dispela lain Babilon ol i bikhet manmeri stret, na tingting bilong ol i no gutpela.
⁵Tru tumas, pasin bilong spak i putim ol long ples klia,
na ol i bikhet manmeri stret na ol i no save stap bel isi.
Ol i manmeri bilong mangalim olgeta kain samting,
na ol i laik kisim olgeta samting olsem dai pasin i save kisim ol manmeri.
Olsem na, ol i laik winim na banisim olgeta manmeri bilong olgeta kantri,
na ol i laik putim ol manmeri aninit long lek bilong ol yet.

⁶“Tasol, ol dispela manmeri i kisim bagarap ol bai tok bilas long dispela lain Babilon na ol i ken i sem. Na ol manmeri i kisim bagarap ol bai tok,

“ ‘Yupela bai kisim bikpela hevi stret. Yupela save stilim na bungim planti kago.
Na yupela i bin tok strong na giamanim ol manmeri na long dispela rot yupela kamap mani manmeri.
Na yupela no save tingting long pinisim dispela pasin.’
⁷Harim. Wanpela de ol dispela lain yupela i bin bagarapim, ol bai kirap.
Na ol bai kirap bilong bekim bek long yupela na yupela bai skin guria.
Long dispela taim ol bai kam long yupela na bagarapim yupela.
⁸Yupela i bin sakim ol na bagarapim planti manmeri bilong planti kantri nabaut.
Na yupela i bin kapsaitim blut bilong planti lain manmeri.
Na yupela i bin bagarapim ol ples na ol siti na olgeta manmeri i stap long em.
Na long dispela as ol bai sakim yupela na bagarapim yupela olgeta.

⁹“Yupela bai kisim bikpela hevi stret. Yupela save mekim pasin i no stret long ol na yupela save kisim planti samting bilong kamapim ples bilong yupela.
Na yupela i bin mekim olsem bilong yupela i ken i sindaun gutpela na yupela no ken i kisim bagarap.
¹⁰Yupela i bin hait na pasim tok bilong bagarapim planti manmeri.
Na dispela pasin bilong yupela em i ken i givim sem long ol lain bilong yupela, na yupela i ken i lusim laip bilong yupela.
¹¹Ol ston bilong ol haus na banis ol i olsem wanpela witnis.
Ol diwai bilong ol haus ol tu ol i olsem wanpela witnis na ol bai mekim wankain toktok.

¹²“Yupela bai kisim bikpela hevi stret. Yupela save kapsaitim blut bilong ol manmeri na yupela wokim siti bilong yupela i kamap.
Na yupela save mekim raskol pasin bilong strongim taun bilong yupela yet.
¹³Na BIKPELA i gat Strong na Em yet Em i tok,
‘Ol dispela kain lain ol i wok nating. Long wanem, wok bilong ol bai paia tasol.
Ol i sot win tru bilong mekim wok bilong ol, tasol ol i westim taim yet.’
¹⁴Olsem na, olgeta man bilong olgeta hap ol bai save gut long bikpela na gutpela samting bilong BIKPELA.
Na dispela save bai pulap tru kain olsem solwara em i pulap tru.

¹⁵“Yupela bai kisim bikpela hevi stret. Yupela save givim dring wain long ol narapela haus lain i stap klostu long yupela.
Yupela save givim dring wain i go i go inap ol lain i ken i spak.
Na yupela mekim olsem bilong lukim sem bilong ol.
¹⁶Yupela laik kisim biknem, tasol yupela no inap. Yupela bai kisim sem tasol.
Nau taim bilong yupela em i kamap pinis. Yupela i bin givim sem long ol narapela lain, orait nau yupela bai kisim sem.
Nau em i taim bilong yupela bilong lukim bel hat na strong bilong BIKPELA.
Na sem tasol bai karamapim biknem bilong yupela.
¹⁷Yupela i bin bagarapim ol Lebanon,
na yupela i bin bagarapim ol animal nabaut.
Yupela i bin kapsaitim blut bilong ol manmeri.
Na yupela i bin bagarapim ol ples na ol siti na olgeta manmeri i stap long em.
Orait, nau yupela i ken i pret. Long wanem, dispela rong bilong yupela bai tanim na kaikaim yupela.

¹⁸“Ol aidol, ol i gutpela bilong mekim wanem? Ol i no inap helpim yupela. Long wanem, ol man tasol ol i bin wokim dispela samting.
Ol piksa i save giamanim ol man, ol i gutpela bilong mekim wanem? Ol i no inap helpim yupela. Long wanem, ol man tasol ol i kamapim ol piksa.
Ol dispela kain samting em i no inap opim maus na mekim wanpela toktok, nogat.
Olsem na, man i kamapim kain samting olsem em i bihainim strong bilong em yet.
¹⁹Yupela bai kisim bikpela hevi stret. Yupela save kisim diwai na ston na wokim ol giaman god.
Na yupela save tok, “Em nau, dispela samting mipela i bin wokim em i stap laip.”
Dispela samting em inap stiaim tingting bilong yupela, a? Nogat.
Yupela karamapim em long gol na silva, tasol em i no gat laip i stap long em.
²⁰Tasol, BIKPELA Em i stap long holi tempel bilong Em.
Na olgeta manmeri long dispela graun ol i stap long ples klia long ai bilong Em. Olsem na, ol i mas pasim maus.”