Moning.
Las wik long Sande Baibel Toktok yumi bin tok olsem, Prea em i wanem samting? Na yumi bekim dispela tok na yumi tok, Prea em i pasin bilong toktok long God. Taim yumi prea, orait yumi toktok long God.
God i wokim yumi manmeri wankain olsem Em yet – Em i wokim yumi “man” (manmeri) olsem God yet Em i “man”. Long dispela as yumi ken i prea – long dispela as yumi ken i toktok long God. Yumi ken i yusim tingting bilong yumi na yumi ken i pilim ol sampela pilim bilong yumi na yumi ken i opim maus na toktok long God long ol kainkain tingting na pilim na toktok bilong yumi – na God i ken i harim na save, long wanem, God yet i “man” na Em i save tingting na i save pilim na i save toktok.
God Em i no wanpela diwai o wanpela wara o wanpela ston o sampela kain samting olsem. God Em i no olsem ol tewel bilong ol tumbuna, na God i no olsem ol masalai i stap long hul bilong ston o long bus o long wara. Nogat. God Em i olsem wanpela man we yumi ken i toktok long Em. God Em i “man”, olsem na, yumi ken i toktok long Em.
Orait, long rot bilong prea yumi ken i toktok long God, tasol….
Hau na bai God i toktok long yumi?
God i save toktok long yumi long rot bilong Tok bilong God – God i yusim Baibel long toktok long yumi.
Harim tok bilong God yet long Hibru 1:1-2.
1Bipo, long planti taim na long kainkain pasin God i bin tok long ol tumbuna bilong yumi long maus bilong ol profet. 2Tasol long dispela taim nau, taim bilong ol las de, God i bin tokim yumi long maus bilong Pikinini Man bilong Em.
Bipo God i bin toktok long ol profet bilong Em na ol profet i karim dispela toktok i go long ol manmeri. Long dispela wei God i bin toktok long ol. Tasol, bilong nau, Jisas yet i tokaut na soim yumi olgeta samting God i laik yumi mas save long em. Na olgeta tok bilong Jisas na olgeta pasin bilong Jisas na olgeta tisim bilong Jisas na olgeta tisim Jisas i givim ol Aposel bilong Em, olgeta i stap pinis insait long Nupela Testamen na yumi ken i lukim na save long ol dispela tok bilong God. God i save yusim Baibel bilong tokim yumi long olgeta samting Em i laik yumi save long em.
Wanpela taim mi harim stori long redio. Wanpela man i go insait long wanpela stoa na em i sutim na kilim ol sampela manmeri insait long stoa. Taim ol police i holimpas em, em i tok olsem, “Mi lukim driman na long driman God i tokim mi long mi mas sutim na kilim ol manmeri insait long stoa.”
Orait yumi skelim tupela samting. 1. God i ken i tokim yumi long driman o nogat? Na 2. Em i God i tokim manya long sutim na kilim ol manmeri insait long stoa o nogat?
Orait, 1. God i ken i tokim yumi long driman o nogat? God i ken i toktok long yumi long ene wei Em i laik tokim yumi. Tasol nambawan wei stret i olsem, Em i toktok long yumi long Baibel. Olgeta samting God i laik yumi mas save long en em i stap pinis long Baibel.
Na 2. Em i God i tokim manya long sutim na kilim ol manmeri insait long stoa o nogat? Harim gut. God Em i no tokim manya long sutim na kilim ol manmeri i stap insait long stoa. Nogat tru! Long wanem, God i no save kapsaitim na pundaunim tok bilong Em yet. Long Baibel God i tok klia pinis olsem, “Yu no ken i kilim man i dai.” Em olsem na God Em i no inap kapsaitim na pundaunim tok bilong Em yet na tokim manya long i go kilim i dai ol manmeri.
Em olsem na, manya i bin lukim driman na em i harim sampela kain tok, tasol em i no harim tok bilong God – Em i no God i bin toktok long em long driman bilong em.
Harim. Yumi mas lukaut long dispela kain samting. Ol sampela manmeri i ken i tok olsem, “God i tokim mi long driman.” Na ol i ken i tok, “God i tokim mi na mi harim nek bilong Em.” Tasol hau na bai ol i save tru olsem God i bin tokim ol o nogat? Nogut Satan i trikim ol, a? Satan em i man bilong giaman, olsem na em i ken i trikim ol manmeri na ol manmeri ol i tingim God i tokim ol long driman.
Yumi mas skelim gut. Yumi mas yusim Tok bilong God – Baibel – na yumi skelim olgeta samting. Sapos wanpela toktok i kamap na dispela toktok i no pas tru long Tok bilong God long Baibel, orait yumi ken i klia olsem dispela tok i no tok bilong God – God i no toktok – Em i no God i toktok.
Lukim 1 Jon 4:1.
1Ol prens bilong mi, yupela no ken i bilipim na trastim olgeta man i tok, “Spirit bilong God i givim tok long mi”. Nogat. Yupela mas skelim tok bilong ol – ol i autim tok bilong God o nogat. Long wanem, planti giaman profet i go nabaut pinis long dispela graun.
Dispela toktok i klia. Yumi mas skelim toktok ol man i mekim – toktok bilong ol em i tok bilong God o nogat. Yumi mas yusim Baibel long skelim toktok.
Long rot bilong prea yumi ken i toktok long God. Na long rot bilong Baibel God i save toktok long yumi. Holi Spirit bilong God i ken i stiaim yumi i go long wanem tok God i laik yumi mas lukim na harim insait long Baibel. Baibel em i tok bilong God long yumi, na dispela tok em inap long yumi. Lukim na skelim 2 Timoti 3:16-17.
16Olgeta Tok bilong God i kamaut long maus bilong God olsem win, na i gutpela bilong skulim yumi, na bilong krosim yumi, na bilong stretim yumi, na bilong trenim yumi long olgeta samting i stretpela, 17bai ol man bilong God, ol inap tru na i gat olgeta samting ol i nidim bilong mekim olgeta gutpela wok.
Glenn.
