Holi Spirit i olsem diposit.

Moning.

Tingim. Long wanem as ol sampela manmeri bilong taun Efesus i harim trupela tok bilong God na ol i bilipim na trastim God long kisim bek ol long feitful wok bilong Jisas tasol, na ol i tanim bel long ol bipo bilip bilong ol na ol i bihainim Jisas? Pastaim ol i stap dip tru insait long ol kainkain rong na sin na tingting bilong ol i dai pinis long olgeta samting bilong God (Efesus 2:1-3). Olsem na, hau na ol i harim na hau na ol i tanim bel na hau na ol i bilipim na trastim?

Ol i harim na ol i tanim bel na ol i bilipim na trastim God long kisim bek ol long feitful wok bilong Jisas tasol bikos God i bin givim Holi Spirit long ol na Em i stap insait long ol. Yu save, ol dispela samting bilong harim na tanim bel na bilipim na trastim em i hanmak bilong Holi Spirit. Holi Spirit Em i Spirit bilong olgeta tok i tru. Olsem na, Em i save stiaim ol manmeri God i bin makim na pasim long Jisas i go long tok i tru tasol. Wok bilong Holi Spirit em bilong opim ai na ia na bel bilong ol manmeri God i bin makim na pasim long Jisas, bai ol i harim na bilipim na trastim trupela gutnius i tokaut long God i kisim bek sin manmeri long feitful wok bilong Jisas tasol.

Na Holi Spirit i mekim dispela wok i go yet. Em olsem na sapos yu save harim tok i tru, na yu tanim bel long ol bipo bilip bilong yu, na yu bilipim na trastim God long kisim bek yu long feitful wok bilong Jisas long diwai kros tasol, na yu bihainim Em, orait yu mas save olsem, em i Holi Spirit i bin stiaim tingting bilong yu i go long ol dispela trupela gutnius bilong God. Em i Holi Spirit i bin opim bel bilong yu na yu bilipim na trastim trupela gutnius bilong God. Ol dispela em i hanmak bilong Holi Spirit. Em i Holi Spirit i bin senisim yu, i kamapim laip long yu, na yu tanim bel na yu bilipim na trastim trupela gutnius bilong God.

Na ol dispela i gutpela tru! Tasol aposel Pol i skruim dispela tok bilong Holi Spirit i go yet. Na em i tok olsem, “Holi Spirit i olsem diposit bilong olgeta samting Krais i bin kisim bilong yumi na bihain yumi bai lukim.” Lukim Efesus 1:13-14….

¹³Na yupela tu i pas long ol dispela samting bilong Krais taim yupela i harim tok i tru tumas. Dispela tok i tru tumas em i gutnius i tokaut long wok God i mekim long Krais bilong sevim yupela. Na taim yupela bilip God i givim wanpela mak long yupela bilong soim olsem Em i bin pasim yupela long Krais. Na dispela mak em i Holi Spirit God i bin promisim. ¹⁴Holi Spirit i olsem diposit bilong olgeta samting Krais i bin kisim bilong yumi na bihain yumi bai lukim. Em olsem na Holi Spirit bai i stap wantaim yumi manmeri bilong God inap long taim God i kisim bek yumi na yumi stap fri wantaim Em. Na God i mekim ol dispela samting bilong apim nem bilong Em i bikpela na gutpela tumas.

Orait, nau yumi save long 2-pela samting bilong Holi Spirit God i bin promisim….

1. God i givim Holi Spirit long yumi na Holi Spirit i stap insait long yumi bilong soim yumi olsem, God i bin makim na pasim yumi long Krais. Na….
2. Holi Spirit Em i diposit bilong olgeta samting Krais i kisim pinis bilong yumi na bihain yumi bai lukim.

Na diposit em i wanem samting? Mi tok piksa pastaim….

Yu save long pasin bilong baim meri. Taim yupela makim wanpela meri na yupela laik baim, orait yupela bai toktok wantaim papa bilong dispela meri na yupela bai pasim toktok long pe bilong em.

Em olsem na, sapos yupela makim pe olsem K1,500, orait papa bilong meri bai tok olsem, “Yupela putim diposit pastaim na long dispela pasin mi ken i save olsem yupela no giaman.” Olsem na, yupela bai putim K200 or K300 diposit na olgeta manmeri i ken i save olsem, yupela baim pinis dispela meri, na papa i no ken i givim dispela meri i go long ol narapela lain. Yu save, taim yupela putim diposit bilong baim meri, em olsem yupela baim dispela meri pinis. Na ol lain bilong meri i ken i save olsem, yupela no giaman long baim meri, na ol i ken i save olsem, bai yupela pinisim dispela pe long bihain long sampela taim.

Na wankain olsem, Holi Spirit Em i olsem diposit. Taim God i givim Holi Spirit long yumi, i olsem God i tok, “Hap mi putim nau, na bihain bai yupela kisim olgeta blesim bilong heven.” Holi Spirit Em i diposit bilong olgeta samting Krais i bin kisim bilong yumi na bihain yumi bai lukim.

Krais i wokim olgeta samting pinis long diwai kros bai yumi ken i stap wantaim God long heven – dispela em i bikpela blesim tru bilong heven. Tasol yumi no go yet – yumi no lukim yet. Em olsem na God i givim wanpela blesim long yumi nau, Em i dipositim wanpela blesim long yumi nau bilong soim yumi olsem, olgeta blesim bilong heven em bilong yumi. God i givim Holi Spirit long yumi nau, olsem diposit, bai yumi ken i klia olsem, promis bilong God i tru tumas na bai yumi stap wantaim Em long heven – bai yumi sindaun wantaim Em long olgeta blesim bilong heven.

Long rot bilong Holi Spirit God i stap wantaim yumi nau bilong soim olsem bihain bai yumi go na sindaun wantaim Em long olgeta blesim bilong Em long heven. Olsem na, taim yumi lukim hanmak bilong Holi Spirit long laip bilong yumi, orait yumi ken i save olsem, dispela em i olsem diposit, na bihain bai yumi stap wantaim God long heven.

Na mi save olsem, sampela taim ol man bai kisim bek diposit ol i putim bilong baim meri o ol lain bilong meri i salim diposit i go bek gen bikos ol i senisim tingting bilong ol na ol i no laik ol i baim meri pikinini bilong ol. Tasol, Pol i tok long lain 14 olsem, “….Holi Spirit bai i stap wantaim yumi manmeri bilong God inap long taim God i kisim bek yumi na yumi stap fri wantaim Em.”

Harim. God i no inap kisim bek diposit bilong Em. Nogat tru. God i no inap rausim Holi Spirit long yumi. Nogat tru. God i no inap rivesim ol samting Em i bin mekim long yumi. Nogat tru. God i givim Holi Spirit long yumi bikos Em i bin makim na pasim yumi long Krais longtaim pinis. Holi Spirit Em i diposit bilong olgeta samting God i bin mekim long yumi na redim bilong yumi. Olsem na, Holi Spirit i no inap lusim yumi. Em bai stap i go i go inap long taim God i bin makim bilong kisim yumi i go long ples bilong Em.

Ol sampela manmeri i tok olsem, “Yupela mas bilipim na trastim na bihainim na lukautim ol kainkain lotu samting na God i ken i kisim bek yupela na yupela lukim heven. Tasol yumi no ken i harim dispela kain tok bilong ol. Nogat. Yumi mas harim tok God i mekim. Sapos yumi harim na bilipim na trastim na bihainim trupela gutnius bilong God, orait dispela em i hanmak bilong Holi Spirit na dispela i soim yumi olsem God i bin pasim yumi long Krais. Dispela em i diposit bilong olgeta blesim God i givim yumi i bilong Krais. Bai yumi lukim God na bai yumi sindaun long ples bilong God long olgeta blesim bilong Em.

Lukim las tok Pol i mekim long Efesus 1:14…. “Na God i mekim ol dispela samting bilong apim nem bilong Em i bikpela na gutpela tumas.” Ol dispela samting God i mekim bilong yumi em i no bilong litimapim nem bilong yumi na bilong litimapim nem bilong misin bilong yumi. Nogat! Em bilong litimapim nem bilong God! Yumi God i bin makim na pasim long Jisas – yumi i lukim hanmak bilong Holi Spirit long laip bilong yumi – orait yumi save long ol dispela gutpela gutpela samting God i wokim long yumi bilong kisim bek yumi. Olsem na yumi amamas na yumi litimapim nem bilong God tasol.

Glenn.