Moning.
Longpela taim tok bilong Aposel 2:1-13 i kirapim planti toktok namel long ol lotu. Na i gat 3-pela samting i gutpela long yumi tingim pastaim, na yumi skelim as bilong dispela toktok….
- Ol aposel na ol disaipel ol i no kisim Holi Spirit i kam (ol i stap tasol na wantu Holi Spirit i kam).
- Ol aposel na ol disaipel ol i spikim trupela tokples bilong ol sampela hauslain (ol i no opim maus na mekim nois nating na ol i no spikim ol sampela “tokples bilong heven”.
- Ol aposel na ol disaipel ol i no yusim pawa bilong Holi Spirit bilong apim ol yet (tingting bilong ol i go long God na ol i tokaut long ol gutpela wok God i mekim).
1Taim de Pentikos i kamap pinis ol i stap wantaim long wanpela haus. 2Na wantu tasol wanpela nois olsem krai bilong strongpela win i kamap na i pulapim tru haus ol i sindaun long em. 3Na ol i lukim samting olsem paia, na dispela paia samting em i bruk na ol liklik hap paia samting i go sindaun antap long olgeta manmeri wanwan. 4Na Holi Spirit i pulapim ol dispela manmeri na ol i stat long mekim toktok long ol narapela narapela tokples inap long Spirit inapim ol.
5Na long dispela taim ol sampela manmeri Juda, ol i bilong olgeta kantri nabaut long dispela graun na ol i trupela manmeri bilong lotuim God, ol i bin kam i stap long Jerusalem. 6Na taim ol i harim nois ol i kam bung na ol i paul, long wanem, ol i harim ol manmeri i mekim toktok long ol wanwan tok ples bilong ol. 7-8Na olgeta i kirap nogut na ol i tok, “Ol dispela manmeri ol i bilong distrik Galili tasol, na olsem wanem taim ol i toktok mipela i save harim ol wanwan tokples bilong mipela yet? 9Mipela bilong Partia na Midia na Elam, na Mesopotemia na Judia na Kapadosia na Pontus na Esia 10na Frigia na Pamfilia na Isip na ol hap bilong Libia klostu long Sairini, na bilong Rom. 11Sampela bilong mipela i bilong Juda na sampela bilong mipela i narapela lain na i bihainim lotu bilong Juda. Na sampela bilong mipela i bilong Krit na Arebia. Tasol mipela i harim ol i autim tok long olgeta tokples bilong mipela yet, na ol i tok long ol gutpela wok God i mekim.” 12Na ol i kirap nogut na ol i tanim het, na ol i tok, “Ol dispela samting i gat wanem minim bilong em i stap?” 13Tasol ol sampela manmeri i tok bilas tasol na ol i tok, “Ol i spak long nupela wain.”
Holi Spirit i wok long wok bilong Jisas bilong kisim ol lain manmeri bilong Em i kam.
Taim Holi Spirit i kam long ol aposel wantaim ol disaipel (em ol manmeri i bilipim na trastim God long kisim bek ol long feitful wok bilong Jisas long diwai kros na ol i aninit long bosim bilong Em) orait Holi Spirit i strongim ol na Em i stiaim ol na ol i autim tok long ol gutpela wok bilong God. Holi Spirit inapim ol long spikim ol wanwan tokples bilong ol wanwan longwe manmeri i kam bung long Jerusalem taun, na long tokples bilong ol yet ol i harim ol aposel wantaim ol disaipel i autim tok long ol gutpela wok bilong God.
Taim ol manmeri i kirap nogut na ol i laik save long minim bilong ol dispela samting, orait Pita i sanap na em i autim tok long ol samting bilong Jisas – em i witnisim olgeta samting bilong feitful wok bilong Jisas (Aposel 2:14-40). Na taim Pita i autim olgeta tok bilong em pinis, orait wanem samting i kamap? Lukim Aposel 2:41….
41…. Na long dispela de God i joinim 3000 manmeri wantaim ol manmeri i bilip.
God i joinim 3000 (tri tausen) manmeri long ol lain manmeri i bilip. Pastaim i gat 120 manmeri i bilipim na trastim God long kisim bek ol long feitful wok bilong Jisas long diwai kros (Aposel 1:15). Tasol God i joinim 3000 manmeri moa long dispela 120 manmeri i bilip. God i yusim Pita (wantaim ol aposel na ol disaipel) bilong joinim dispela 3000 manmeri long ol lain manmeri i bilip.
Na yumi holim tingting long tok Jisas i mekim long samting bilong Holi Spirit. Jisas i tokim ol aposel long Holi Spirit bai kam na ol bai kisim pawa bilong witnisim Jisas long olgeta 4-kona bilong dispela graun. (Aposel 1:8.) Jisas i dai long diwai kros – Em i kisim pe bilong sin bilong ol manmeri God i givim Em. Long dispela rot Jisas i sevim laip bilong ol. Jisas i givim Holi Spirit long ol aposel wantaim ol disaipel bilong givim strong long ol long witnisim Em, na long strong bilong Holi Spirit Jisas i kisim ol lain manmeri bilong Em i kam long Em, na ol i stap aninit long bosim bilong Em na i stap femili bilong Em.
Em olsem na, taim Holi Spirit i kam, orait ol dispela samting i kamap olsem. Holi Spirit i kam bilong helpim ol aposel witnisim Jisas – Holi Spirit i kam bilong mekim wok bilong Jisas bilong kisim ol manmeri God i bin givim Jisas i kam long Em na ol i stap wantaim aninit long bosim bilong Jisas na i stap femili bilong Em.
Wok bilong Jisas i no senis na wok bilong Holi Spirit i no senis.
Jisas i wok yet long singautim ol manmeri God i bin givim Em i kam long Em. Na Holi Spirit i wok yet long strongim ol disaipel bilong Jisas, em ol manmeri i bilipim na trastim God long kisim bek ol long feitful wok bilong Jisas, na ol i witnisim Jisas – ol i autim tok bilong feitful wok bilong Jisas long diwai kros. Long dispela rot Jisas i joinim ol sampela manmeri moa wantaim ol manmeri Jisas i kisim i kam pinis.
Ating yumi laik lukim “samting olsem win” na “samting olsem paia” olsem ol aposel i bin lukim. Ating yumi laik spikim ol kainkain tokples olsem ol aposel i bin spikim. Sampela taim yumi hangre tumas long lukim ol dispela kain samting, na yumi no tingting tumas long witnisim Jisas na autim tok bilong feitful wok bilong Jisas long diwai kros. Ating sampela taim yumi laik kisim namba long ol dispela samting, na kisim biknem long ol dispela samting.
Yumi no ken i stap olsem. Nogat. Yumi amamas long Jisas i bin singautim yumi i kam long Em. Yumi amamas na askim God long strongim yumi long Holi Spirit bai yumi ken i witnisim ol gutpela wok bilong God long feitful wok bilong Jisas long diwai kros. Askim Jisas long yusim yumi bilong singautim ol sampela manmeri bilong Em moa i kam long Jisas, na ol i stap wantaim yumi aninit long bosim bilong Jisas.
Na sapos yumi lukim “samting olsem win” na “samting olsem paia” na wantu yumi ken i spikim tokples bilong ol sampela hauslain olsem ol aposel i mekim long de Pentikos, em gutpela. Tasol, yumi lukim o yumi no lukim, em i no gat samting. Long wanem, wok bilong Jisas i no senis na wok bilong Holi Spirit i no senis. Jisas i bisi long kisim ol lain bilong Em i kam, na Holi Spirit i bisi long strongim yumi long witnisim feitful wok bilong Jisas, maski ol kainkain win paia tokples samting i kamap o nogat. Tingim. Bihain long de Pentikos ol aposel ol i no lukim dispela samting tumas. Tasol yet i klia olsem Jisas i yusim ol long singautim na kisim ol lain bilong Em i kam long Em, na ol i stap wantaim aninit long bosim bilong Em na ol i stap femili bilong God.
Jisas Em i bisi long singautim ol lain bilong Em i kam. Na Holi Spirit i bisi long strongim ol lain bilong Jisas bilong witnisim olgeta gutpela wok bilong God long feitful wok bilong Jisas. Yumi amamas long Jisas i singautim yumi i kam pinis long Em, na yumi amamas long witnisim Jisas na tokaut long God i kisim bek yumi long feitful wok bilong Jisas tasol.
Glenn.
Sapos yu laik save moa long dispela tok, orait yu lukim Aposel 2:1-13 long Autim Tok long pngbibleresources.org.
