Moning.
Yu gat wanem tingting. Taim God i lukluk i go daun long dispela graun bilong Em, Em save lukim wanem samting? Em i ken i lukim ol manmeri i stap gutpela aninit long Em na rispektim Em na lavim Em na bihainim tok bilong Em o nogat?
Buk Song 2 i tokaut olsem, taim God i lukluk i go daun long dispela graun bilong Em, Em save lukim ol lain manmeri i wok long egensim Em na egensim dispela Man Em i bin makim. Man BIKPELA i makim em i Jisas. Taim God i lukim ol lain manmeri Em i lukim ol i egensim Jisas. Lukim lain 1-3.
1 Long wanem as ol lain manmeri i belhat nogut tru?
Long wanem as ol i bung bilong kamapim plen i no gat strong?
2 Ol king bilong dispela graun ol i sanap redi,
na ol hetman i bung wantaim,
na ol i egensim BIKPELA na egensim dispela Man BIKPELA i bin makim.
3 Ol i tok, “Yumi brukim ol samting Tupela i yusim bilong pasim yumi,
na yumi rausim rop Tupela i yusim bilong banisim yumi.” Buk Song 2:1-3.
Ol lain manmeri, na ol king bilong dispela graun, na ol hetman, olgeta i save wok long egensim God na egensim Jisas wantaim. Ol i sanap redi, ol i bung wantaim, ol i pasim toktok, ol i wok long egensim BIKPELA na egensim dispela Man BIKPELA i bin makim, Jisas Krais.
Ol i laik brukim ol samting Tupela i yusim bilong pasim ol. Ol i laik rausim rop Tupela i yusim bilong banisim ol. Yu save, ol i no laik God i bosim na kontrolim olgeta samting bilong laip bilong ol na bilong sindaun bilong ol. Ol i no laik God i wokim banis bilong banisim pasin bilong ol.
Ol i no laik God i bosim marit bilong ol, o bisnis bilong ol, o wok bilong ol, o femili bilong ol, o sindaun bilong ol, o wokabaut bilong ol, o tingting bilong ol, o toktok bilong ol. Nogat. Ol i tingim olsem, “Tok bilong God i banisim pasin bilong mipela na i stap olsem wanpela rop bilong pasim mipela.”
Em olsem na ol i laik smasim na rausim Tok bilong God long laip bilong ol. Ol i laik i stap fri long God na fri long Jisas na ol i stap long save na laik na strong bilong ol yet. Ol i egensim God na egensim Jisas i bosim laip bilong ol. Ol i laik bihainim laik bilong ol yet, olsem na, ol i rausim tok bilong God long tingting bilong ol na ol i gohet long mekim wanem pasin ol i laik mekim.
Em olsem na, taim God i lukluk i go daun long dispela graun bilong Em, Em i lukim ol lain manmeri i wok long egensim Em na egensim Jisas Krais.
Tasol, husat bai win? Ol lain manmeri i wok long egensim God na egensim Jisas, ol bai win o nogat?
God Em i lap long ol.
God Em i stap long heven. Na Em i mekim wanem? Em i lap long ol lain manmeri, em ol lain manmeri i wok long egensim Em. Lukim lain 4-6.
4 God i sindaun long heven na Em i lap long ol;
Em i lap nogut tru long ol.
5 Tasol, Em i belhat tru na Em i mekim strongpela toktok long ol,
na bel hat bilong Em i pretim ol nogut tru na Em i tokim ol olsem,
6 “King Mi makim Mi putim Em i stap pinis long Saion, dispela holi maunten bilong Mi.” Buk Song 2:4-6.
Long wanem as God Em i lap long ol? Em i lap long ol bikos Em yet Em i BIKPELA na ol i liklik samting tumas, na long dispela as ol i no inap winim God.
Yu tingim. Sapos liklik natnat i kirap na i tokim wanpela bikpela ka long haiwe rot olsem, “Bai mi winim yu. Bai mi rausim yu long rot bilong mi. Long strong na save bilong mi bai mi kapsaitim yu i go daun long baret.” Ating yumi bai lap long liklik natnat, a? Long wanem, liklik natnat i no inap tru long winim bikpela ka bilong haiwe rot. Natnat i no inap winim bikpela ka i gat 18-pela wil. Yu lukim bamba bilong ol bikpela ka, bai yu lukim ol planti natnat i smas pinis long em. Ka i winim ol.
BIKPELA i stap long heven na Em i lukluk i go daun na Em i lap long ol lain manmeri bikos ol i tingim olsem ol i gat bikpela save na strong na ol i ken i winim God. Ol i tingim olsem ol i ken i stap long laik bilong ol yet na God i no gat pawa bilong stopim ol o long kotim ol.
Ol i rausim tok bilong God long laip bilong ol bikos ol i tingim olsem God i no stap. Ol i tingim olsem God i no trupela samting i stap. Ol i no lukim God, olsem na, ol i tingim olsem God i no trupela samting i stap. Ol i no lukim pawa bilong God, olsem na, ol i tingim olsem God i no gat pawa.
Tasol ol i rong. Ol i olsem wanpela natnat nating tasol. Hau na bai ol i winim God? Hau na bai yu winim God. Yumi no inap tru.
Taim yu dai na yu sanap long ai bilong God, bai yu pret nogut tru. Lukim lain 5. Yu bai pret bikos taim yu lukim God yu bai save olsem yu no inap winim Em. Bel hat bilong Em bai smasim yu olsem bikpela ka i smasim natnat. God Em i bikpela bikpela God tumas na yu samting nating tumas long han bilong Em. Yu no inap winim God.
Ol prens plis harim. Yumi no ken i egensim God na egensim Jisas moa. Mobeta yumi lusim pasin bilong yumi yet na yumi kam i stap aninit long God na aninit long Jisas. God Em i gutpela God na Em i mekim wok long dai bilong Jisas bilong tekewe pe bilong ol dispela sin bilong yumi, bai God i fogivim yumi na kisim bek yumi. Em olsem na, taim yumi daunim yumi yet na yumi bilipim na trastim God long fogivim yumi na kisim bek yumi long feitful wok bilong Jisas long diwai kros, orait yumi kam pinis long God na bai yumi lukim amamas bilong God tasol.
Glenn.
