Moning.
Ating sampela manmeri i skul long taun na i skul long yunivesiti na i wok long bikpela kampani nabaut ol i tingim olsem ol i save manmeri na ol manmeri bilong ples ol i no save manmeri. Ating sampela bilong ol i tingim olsem ol manmeri bilong ples ol i kanaka manmeri, long wanem, ol i no gat save olsem ol.
Tasol, husat i save manmeri trutru? Ol save manmeri em ol manmeri i skul tasol, a? Ol save manmeri em ol manmeri i go pinis long yunivesiti, a? Ol save manmeri em ol manmeri i wok long bikpela kampani long Mosipi na Lae, a? Ol save manmeri em ol manmeri i gat save long yusim komputa na Internet, a?
Aposel Pol i tok olsem, manmeri i gat save ol i manmeri i klia long laik bilong BIKPELA. Lukim Efesus 5:15-21.
15Olsem na, yupela mas was gut long hau yupela stap long laip bilong yupela. Yupela no ken i wokabaut olsem manmeri i no gat save. Nogat. Yupela mas wokabaut olsem manmeri i gat save. 16Na yupela mas yusim taim bilong yupela long gutpela wei bikos dispela taim nau yumi stap long em, em i taim nogut. 17Olsem na, yupela no ken i longlong i stap. Nogat. Yupela mas klia long laik bilong BIKPELA. 18Yupela no ken i dring planti na spak. Nogat. Dispela kain pasin i save kamapim pasin nogut. Tasol, mobeta yupela pulap long Holi Spirit. 19Taim yupela toktok wantaim, orait yusim ol song bilong Buk Song na ol lotu song na ol song Holi Spirit i kamapim. Singim ol song na amamas long BIKPELA long bel bilong yupela. 20Olgeta taim yupela tok tenkyu long Papa God long olgeta samting. Mekim olsem long nem bilong Jisas Krais, BIKPELA bilong yumi. 21Na yupela mas daunim yupela yet na stap isi wantaim ol manmeri bilong God. Yu mas mekim olsem bilong rispektim Krais.
Manmeri i gat save ol i wanem kain manmeri? Manmeri i gat trupela save ol i stap olsem wanem?
Manmeri i save manmeri ol bai lukaut gut long hau ol i stap long laip bilong ol.
Lukim lain 15. Manmeri i gat het na i save yusim het ol bai lukaut gut long hau ol i wokabaut na hau ol i sindaun. Ol i no inap pasim tingting na bihainim olgeta pasin bilong ples na olgeta kastem pasin bilong tumbuna bilong ol. Nogat. Ol bai tingting gut na skelim gut olgeta samting bilong wokabaut na sindaun bilong ol. (Skelim gen ol toktok aposel Pol i mekim long Efesus 4:17 – Efesus 5:14.)
Manmeri i gat save ol i no inap westim taim bilong ol.
Lukim lain 16. Manmeri i mekim pasin pamuk na olgeta kain pasin i doti na ol i mangalim marit meri na yangpela meri na ol i mekim doti toktok na stupit toktok na pilai toktok i doti – ol manmeri i mekim ol dispela kain pasin ol i westim laip bilong ol. Dispela pasin bilong ol em i no helpim wanpela manmeri. Dispela pasin bilong ol em i no kamapim wanpela gutpela kaikai long laip bilong ol na long laip bilong ol narapela manmeri. Dispela pasin bilong ol em i rabis pasin tasol. Ol i westim laip bilong ol.
Manmeri i gat save ol bai yusim taim bilong ol long gutpela wei. Nau i gat planti pasin nogut i stap long ples – i gat planti tudak pasin i stap. Tasol ol save manmeri bilong God ol i no inap i go insait long ol dispela pasin nogut. Nogat tru. Ol bai i stap separet na yusim taim bilong ol long ol gutpela samting.
Manmeri i gat save ol bai skelim gut olgeta laik bilong God.
Lukim lain 17. Sapos yumi laik save long olgeta laik bilong God, orait yumi mas skelim gut olgeta Tok bilong God. Long Baibel God i putim Em yet long ples klia bai yumi ken i save long Em. God i no laik yumi longlong long Em. Nogat. Em i laik yumi save gut long Em na save gut long olgeta samting bilong Em. Long dispela as yumi save skelim Tok bilong God.
God i opim ai na ia na bel bilong yumi, bai yumi save long olgeta pasin bilong Em, bai yumi save God Em i wanem kain God, bai yumi klia long olgeta samting Em i bin mekim bilong sevim yumi ol manmeri Em i bin makim. Em olsem na, manmeri i gat save ol bai skelim gut olgeta Tok bilong God, na ol bai bihainim gut olgeta Tok bilong God.
Manmeri i gat save, bai pulimapim ol yet long olgeta gutpela wei bilong Holi Spirit.
Lukim lain 18. Ol manmeri i gat trupela save ol i no inap hamarim ol bia botol na pulap long bia na spak. Nogat. Ol bai pulimapim laip bilong ol long olgeta samting bilong God. Ol bai wanbel olgeta long Holi Spirit i stiaim tingting na laip bilong ol. Ol i laik pulap long olgeta gutpela pasin Holi Spirit i wok long kamapim long laip bilong ol manmeri bilong God.
God i givim Holi Spirit long yumi bilong opim ai na ia na bel bilong yumi na yumi luksave long olgeta wei bilong God na yumi harim gut olgeta tok bilong God. Olsem na, yumi mas pulap long dispela. Yumi mas wanbel long Holi Spirit i mekim wok insait long laip bilong yumi. Yumi no ken i egensim dispela wok. Nogat. Yumi mas wanbel long wok bilong Em na wok wantaim. Larim tingting na pasin bilong God i pulap olgeta long yu.
Em olsem na, sapos yu laik “spak”, orait yu “spak” long Tok bilong God – mi minim olsem, yu amamas moa na moa long God na tok tenkyu long Em na litimapim nem bilong Em.
Ol save manmeri bilong God ol bai lotu long rait wei.
Lukim lain 19-20. Litimapim nem bilong God em i pasin we yumi amamas long God na yumi wanbel long God na wanbel long rot bilong God i kisim bek yumi, na yumi tokaut na putim olgeta gutpela bilong God long ples klia – yumi soim amamas na wanbel bilong yumi long toktok bilong yumi. Skelim dispela nek….
“Mi no gutpela man. Mi no fit long stretim laip bilong mi yet bai God i kisim bek mi. Nogat. Tasol God i bin makim mi na pasim mi long Krais na Krais i mekim wok long diwai kros bilong mekim mi klin long ai bilong God na God i kisim bek mi na adoptim mi na Holi Spirit i opim ai na ia na bel bilong mi na Em i givim bilip long mi. God yet i mekim olgeta wok bilong kisim bek mi na bikpela tenkyu bilong mi i go long God tasol.”
….taim yumi mekim kain tok olsem na yumi mekim bilong apim God yet, orait yumi lotu trutru long God. Dispela kain pasin em i lotu pasin. Manmeri i gat save ol bai yusim ol song bilong Buk Song na ol lotu song na ol song Holi Spirit i kamapim bilong litimapim nem bilong gutpela gutpela God bilong ol.
Ol save manmeri bilong God i no inap yusim save bilong ol bilong apim ol yet.
Lukim lain 21. Dispela tok i no hat tumas. Pol i minim olsem, yumi i gat save, yumi no ken i bikhet long dispela save. Nogat. Yumi mas daunim yumi yet na stap isi wantaim. Long wanem? Krais i bin mekim wok bilong bringim yumi i kam insait long wanpela nupela femili bilong God, bai yumi litimapim nem bilong God tasol – Em i no mekim wok bai yumi litimapim nem bilong yumi yet – taim yumi litimapim nem bilong yumi yet, orait yumi daunim brata bilong yumi na yumi no rispektim wok Krais i bin mekim bilong bringim yumi i kam insait long femili bilong God.
Orait, yu skelim. Yu gat trupela save o nogat?
Glenn.
