Jenesis
Stat Bilong Olgeta Samting
God Em i wokim olgeta samting.
1
1Long stat bilong olgeta samting God Em i wokim samting bilong antap, na Em i wokim dispela graun. 2Pastaim God Em i no stretim graun na wanpela samting em i no kamap long em. Tudak i karamapim bikpela wara i stap long graun na Spirit bilong God i save go kam antap long dispela wara.
3Na God Em i tok, “Tulait i mas kamap.” Olsem na tulait em i kamap. 4God Em i lukim dispela tulait na Em i save dispela tulait em i gutpela samting tru. Na God Em i makim taim bilong tulait i ken stap na taim bilong tudak i ken stap. 5Tulait God Em i kolim “de.” Na tudak Em i kolim “nait.” Orait, nait em i kamap na bihain moning em i kamap, olsem na de namba 1 em i pinis.
6Na God Em i tok, “Wara i stap long graun em bai bruk na i stap long tupela hap. Wanpela hap wara em mas i stap antap stret, na narapela hap wara em mas i stap long graun. Na wanpela namel samting em mas i stap namel long tupela wara.” 7Olsem na God Em i brukim wara. Na wanpela hap wara God Em i putim antap stret na narapela hap wara Em i larim i stap long graun. God Em i wokim wanpela namel samting, na dispela namel samting em i stap namel long tupela wara. Olsem na ol dispela em i kamap olsem. 8Dispela namel samting God Em i kolim “skai.” Orait, nait em i kamap na bihain moning em i kamap, olsem na de namba 2 em i pinis.
9Na God Em i tok, “Dispela hap wara i stap long graun na i karamapim graun, em mas bung long hap bilong wara yet, na graun i drai em mas kamap.” Olsem na ol dispela em i kamap olsem. 10Graun i drai God Em i kolim “graun.” Na ol wara i go bung long hap bilong wara Em i kolim “solwara.” Na God Em i lukim ol dispela samting na Em i save ol dispela samting em i gutpela samting tru.
11Na God Em i tok, “Olgeta kain bus i mas kamap long graun. Olgeta kain samting i gat sit i stap, em mas kamap. Na olgeta kain diwai i gat frut na sit i stap, em tu em mas kamap. Na olgeta i mas karim sit bilong ol yet.” Olsem na ol dispela em i kamap olsem. 12Olgeta kain bus em i kamap long graun. Olgeta kain samting i gat sit na olgeta kain diwai i gat frut na sit, olgeta i kamap na karim sit bilong ol yet. Na God Em i lukim ol dispela samting na Em i save ol dispela samting em i gutpela samting tru. 13Orait, nait em i kamap na bihain moning em i kamap, olsem na de namba 3 em i pinis.
14Na God Em i tok, “Ol san mun sta samting i mas kamap na ol i mas i stap antap stret bilong makim de na nait. Ol san mun sta samting bai i stap olsem mak bilong makim ol de na ol yia na ol kain taim bilong yia. 15Na tu, ol san mun sta samting bai i stap bilong givim tulait long graun.” Olsem na ol dispela em i kamap olsem. 16God Em i wokim san bilong bosim de na Em i wokim mun bilong bosim nait. Na tu, God Em i wokim olgeta sta i stap.17-18God Em i putim san na mun antap stret bilong givim tulait long graun na bilong makim de na nait. Na God Em i lukim ol dispela samting na Em i save ol dispela samting em i gutpela samting tru. 19Orait, nait em i kamap na bihain moning em i kamap, olsem na de namba 4 em i pinis.
20Na God Em i tok, “Solwara i mas pulap long olgeta kain fis samting na skai em mas pulap long olgeta kain pisin.” 21Olsem na God Em i wokim ol bikpela bikpela fis na olgeta kain fis samting, na olgeta kain pisin. Na God Em i wokim olgeta inap long lain bilong ol yet. Na God Em i lukim ol dispela samting na Em i save ol dispela samting em i gutpela samting tru. 22God Em i blesim ol na Em i tok, “Yupela mas karim planti pikinini bilong yupela yet. Olsem na ol fis ol i mas pulap long solwara na ol pisin ol i mas pulap long graun. 23Orait, nait em i kamap na bihain moning em i kamap, olsem na de namba 5 em i pinis.
24Na God Em i tok, “Ol kainkain animal ol i mas kamap long graun inap long lain bilong ol yet. Ol animal i stap long ples, na ol liklik animal i save raun long graun, na ol animal i stap long bus, olgeta i mas kamap long graun inap long lain bilong ol yet.” Olsem na ol dispela em i kamap olsem. 25God Em i wokim ol animal i stap long bus inap long lain bilong ol yet. Na God Em i wokim ol animal i stap long ples inap long lain bilong ol yet. Na God Em i wokim ol liklik animal i save raun long graun inap long lain bilong ol yet. Na God Em i lukim ol dispela samting na Em i save ol dispela samting em i gutpela samting tru.
26Orait, nau God Em i tok, “Yumi wokim manmeri na ol bai i stap wankain olsem Yumi yet. Na ol i ken i bosim ol fis, na ol pisin, na ol animal i stap long ples, na ol animal i stap long bus, na ol liklik animal i save raun long graun.”
27Olsem na God Em i wokim man na em i stap wankain olsem Em yet,
wankain olsem God yet Em i bin wokim em,
man na meri yet God Em i bin wokim ol.
28God Em i blesim ol na Em i tokim ol olsem, “Yupela mas karim planti pikinini bilong yupela yet. Olsem na yupela mas pulap long dispela graun na yupela mas putim olgeta samting aninit long lek bilong yupela yet. Yupela mas bosim ol fis, na ol pisin, na olgeta animal samting i stap long graun.”
29Na God Em i tokim ol olsem, “Mi givim olgeta kain bus long yupela. Olgeta kain samting i gat sit, na olgeta kain diwai i gat frut na sit i stap, olgeta Mi givim long yupela bilong kaikai. 30Na bilong olgeta animal, na bilong olgeta pisin na bilong olgeta liklik animal i stap long graun, na bilong olgeta samting i gat laip i stap, Mi givim olgeta kain gras long ol bilong kaikai bilong ol.” Olsem na ol dispela em i kamap olsem.
31Na God Em i lukim olgeta samting Em i bin wokim, na Em i save olgeta dispela samting em i gutpela gutpela samting tru. Orait, nait em i kamap na bihain moning em i kamap, olsem na de namba 6 em i pinis.
