Jenesis
Stori bilong ol grup nabaut.
10
1Dispela em i stori bilong ol lain bilong Siem na Ham na Jafet, 3-pela pikinini bilong Noa. Bihain long bikpela tait ol i karim sampela pikinini man bilong ol yet.
Ol lain bilong Jafet.
2Ol pikinini man bilong Jafet em i olsem:
Gomer, Magok, Madai, Javan, Tubal, Mesek na Tiras.
3Ol pikinini man bilong Gomer em i olsem:
Askenas, Rifat na Togarma.
4Ol pikinini man bilong Javan em i olsem:
Elisa, Tarsis, Kitem na Rodanem. 5Ol dispela lain ol i save go nabaut long solwara na ol i sindaun long kantri bilong ol yet. Ol i sindaun inap long lain na grup bilong ol yet, na ol dispela wan wan lain ol i gat tok ples bilong ol yet i stap.
Ol lain bilong Ham.
6Ol pikinini man bilong Ham em i olsem:
Kus, Misarim, Put na Kenan.
7Ol pikinini man bilong Kus em i olsem:
Seba, Havila, Sapta, Rama na Sapteka.
Ol pikinini man bilong Rama em i olsem:
Seba na Dedan.
8Na Kus em i papa bilong Nimrot. Nimrot em i wanpela save man stret bilong mekim pait long dispela graun. 9Na BIKPELA Em i mekim Nimrot i kamap wanpela save man stret bilong painim ol animal long bus. Olsem na planti manmeri i tok olsem, “Wankain olsem Nimrot, BIKPELA i mekim em i kamap save man stret bilong painim ol animal long bus.” 10Na stat bilong kingdom bilong Nimrot em i Babilon, Erek, Akat na Kalne, na ol dispela taun i stap long hap Sinar. 11Orait, em i go long Asiria na long dispela hap em i wokim Ninive, Rehobotir, Kala 12 na Resen. Resen em i namel long Ninive na Kala. Dispela taun Ninive em i gat biknem stret.
13Misarim em i papa bilong ol lain
Lud, Anam, Lehap, Naptu, 14Patrus, Kaslu, na Kaptor. Ol lain Kaslu ol i kamapim ol lain Filistia.
15Kenan em i papa bilong Saidon, em i namba wan pikinini bilong Kenan.
Na Kenan em i papa bilong ol lain Hit, 16Jebus, Amor, Girgas, 17Hivi, Arka, Sini, 18Arvat, Semar na Hamat.
Bihain ol lain Kenan ol i go nabaut 19 na mak bilong graun bilong ol em i go inap long Saidon, Gerar, Gasa, Sodom, Gomora, Atma, Seboim na Lasa.
20Dispela em i ol pikinini man bilong Ham inap long ol lain bilong ol yet na tok ples bilong ol, na long kantri na long grup bilong ol.
Ol lain bilong Siem.
21Siem tu em i karim sampela pikinini man na em i tumbuna bilong ol lain Eber. Siem em i bikpela brata bilong Jafet.
22Ol pikinini man bilong Siem em i olsem:
Elam, Asur, Arpaksat, Lud na Aram.
23Ol pikinini man bilong Aram em i olsem:
Us, Hul, Geter na Mas.
24Arpaksat em i papa bilong Sela,
na Sela em i papa bilong Eber.
25Eber em i karim 2-pela pikinini man:
Nem bilong wanpela em i Pelek. Taim Pelek em i stap, ol lain bilong dispela graun ol i bruk nabaut, na olsem ol i givim dispela nem long em. Brata bilong Pelek em i Joktan.
26Joktan em i papa bilong
Almodat, Selep, Hasarmavet, Jera, 27Hadoram, Usal, Dikla, 28Obal, Abimael, Seba, 29Ofir, Havila na Jobap. Ol dispela lain ol i pikinini man bilong Joktan.
30Ol dispela lain ol i sindaun long wanpela hap, na dispela hap em i stat long Mesa na em i go inap long Sefar. Sefar em i stap long ol maunten long hap we san i kamap.
31Dispela em i ol pikinini man bilong Siem inap long ol lain bilong ol yet na tok ples bilong ol, na long kantri na long grup bilong ol.
32Dispela em i femili bilong ol pikinini man bilong Noa inap long ol wan wan lain bilong ol yet na long grup bilong ol. Bihain long bikpela tait olgeta manmeri long olgeta hap ol i kamap long dispela lain femili tasol.
