Jenesis
Traipela haus bilong Babel.
11
1Orait, olgeta manmeri bilong dispela graun ol i gat wanpela tok ples tasol na ol i gat wanpela nek. 2Taim ol i go nabaut long sait bilong san i save kamap, ol i lukim wanpela ples we graun em i stretpela olgeta, na dispela ples em i stap long hap bilong Sinar. Olsem na ol i go sindaun long dispela hap.
3Olgeta ol i tok, “Kam, yumi wokim brik, na yumi kukim ol gutpela.” Olsem na ol i no wokim samting long ston, nogat. Ol i wokim samting long brik na simenim ol long kolta. 4Na ol i tok, “Kam, yumi wokim wanpela siti, na yumi wokim wanpela bikpela haus long em, na haus em mas i go antap stret. Olsem na long dispela samting yumi bai kisim biknem stret, na yumi no inap i go sindaun nabaut long olgeta hap bilong dispela graun.”
5Tasol, BIKPELA Em i kam daun bilong lukim dispela siti na dispela bikpela haus ol man ol i wokim. 6Na BIKPELA Em i tok olsem, “Ol dispela lain manmeri ol i pas na ol i gat wanpela tok ples, olsem na ol i stat nau long mekim ol dispela samting. Na wanem samting em i kamap long tingting bilong ol, em nau ol inap mekim tasol. 7Kam, Yumi go daun na paulim tok ples bilong ol na ol i no inap klia long tok bilong ol yet.”
8Em olsem na, BIKPELA Em i salim ol i go nabaut long olgeta hap bilong dispela graun. Em i mekim olsem na ol i no pinisim wok bilong dispela siti. 9Na long dispela as ol i kolim dispela siti Babel. Long wanem, long dispela hap BIKPELA Em i paulim tok ples bilong olgeta manmeri bilong dispela graun. Na long dispela hap BIKPELA Em i salim ol i go nabaut long olgeta hap bilong dispela graun.
Ol lain bilong Siem i go inap long Abram.
10Na dispela stori em i stori bilong Siem.
Bihain long bikpela tait, taim 2-pela yia em i kam i go pinis na Siem em i stap 100 yia pinis, em i kamap papa bilong wanpela pikinini man nem bilong em Arpaksat. 11Siem em i karim Arpaksat pinis na em i stap 500 yia moa, na em i karim ol narapela pikinini man na meri.
12Taim Arpaksat em i stap 35 yia pinis, em i kamap papa bilong wanpela pikinini man nem bilong em Sela. 13Arpaksat em i karim Sela pinis na em i stap 403 yia moa, na em i karim ol narapela pikinini man na meri.
14Taim Sela em i stap 30 yia pinis, em i kamap papa bilong wanpela pikinini man nem bilong em Eber. 15Sela em i karim Eber pinis na em i stap 403 yia moa, na em i karim ol narapela pikinini man na meri.
16Taim Eber em i stap 34 yia pinis, em i kamap papa bilong wanpela pikinini man nem bilong em Pelek. 17Eber em i karim Pelek pinis na em i stap 430 yia moa, na em i karim ol narapela pikinini man na meri.
18Taim Pelek em i stap 30 yia pinis, em i kamap papa bilong wanpela pikinini man nem bilong em Reu. 19Pelek em i karim Reu pinis na em i stap 209 yia moa, na em i karim ol narapela pikinini man na meri.
20Taim Reu em i stap 32 yia pinis, em i kamap papa bilong wanpela pikinini man nem bilong em Seruk. 21Reu em i karim Seruk pinis na em i stap 207 yia moa, na em i karim ol narapela pikinini man na meri.
22Taim Seruk em i stap 30 yia pinis, em i kamap papa bilong wanpela pikinini man nem bilong em Nahor. 23Seruk em i karim Nahor pinis na em i stap 200 yia moa, na em i karim ol narapela pikinini man na meri.
24Taim Nahor em i stap 29 yia pinis, em i kamap papa bilong wanpela pikinini man nem bilong em Tera. 25Nahor em i karim Tera pinis na em i stap 119 yia moa, na em i karim ol narapela pikinini man na meri.
26Taim Tera em i stap 70 yia pinis, em i kamap papa bilong sampela pikinini man nem bilong ol Abram, Nahor na Haran.
27Na dispela stori em i stori bilong Tera.
Tera em i kamap papa bilong Abram, Nahor na Haran. Na Haran em i kamap papa bilong wanpela pikinini man nem bilong em Lot. 28Taim Tera em i stap laip yet, Haran em i dai long ples Ur, long hap bilong ol lain Kaldia. Mama bilong em, em i karim em long dispela hap. 29Abram na Nahor, tupela i maritim meri bilong tupela yet. Nem bilong meri bilong Abram em i Sarai, na nem bilong meri bilong Nahor em i Milka. Milka em i pikinini bilong Haran. Haran em i gat 2-pela pikinini meri, Milka na Iska. 30Na bel bilong Sarai em i pas, olsem na em i no gat wanpela pikinini bilong em i stap.
31Tera em i kisim Abram pikinini man bilong em, wantaim Lot pikinini bilong Haran, na Sarai meri bilong Abram, na olgeta ol i lusim ples Ur long hap bilong ol lain Kaldia. Ol i laik go long ples Kenan, tasol taim ol i kamap long ples Haran ol i sindaun long dispela hap.
32Tera em i stap 205 yia olgeta na em i dai long ples Haran.
