Jenesis
Stori bilong pundaun bilong ol manmeri.
3
1Orait na, BIKPELA God Em i wokim olgeta animal, tasol save bilong snek i winim save bilong olgeta narapela animal. Na snek em i tokim meri olsem, “Tru a? God Em i tokim yu olsem, ‘Yu no ken i kaikaim frut bilong ol diwai i stap long ples.’ Em i tok olsem, a?”
2Na meri em i bekim tok bilong snek na em i tok, “Mipela i ken kaikaim frut bilong ol diwai long ples. 3Tasol, God Em i tokim mipela long wanpela diwai tasol, na Em i tok, ‘Dispela diwai i stap namel long ples yu no ken kaikai, na yu no ken putim han bilong yu long em. Na sapos yu mekim olsem, tru, yu bai dai.’”
4Na snek em i tokim meri, “Yu no inap i dai, nogat tru. 5Taim yu kaikaim dispela frut, tingting bilong yu bai klia olgeta, na yu bai kisim save long ol gutpela samting na ol samting nogut. Olsem na yu bai kamap olsem God yet. Na God Em i save long dispela na long dispela as Em i tambuim yu.”
6Orait na, meri em i lukim frut bilong dispela diwai, na em i tingim olsem dispela frut em i gutpela kaikai na em i gutpela frut tru. Na tu, em i tingim olsem dispela frut em i gutpela samting bilong kisim ol gutpela gutpela save. Olsem na meri em i kisim sampela frut na em i kaikai. Man bilong em i stap, na meri em i givim sampela frut long em, na em tu em i kaikai. 7Na taim tupela i kaikai, tupela i kisim tingting na tupela i klia olsem tupela i stap skin nating. Olsem na tupela i kisim lip bilong wanpela diwai fik, na tupela i wokim klos bilong karamapim skin bilong tupela yet.
8Long apinun, taim san em i no strong tumas, man na meri tupela i harim BIKPELA God Em i wokabaut long ples, na tupela i go hait long bus. 9Tasol, BIKPELA God Em i singautim man na Em i tok, “Yu stap we?”
10Na man em i bekim tok bilong BIKPELA God, na em i tok, “Mi stap skin nating, olsem na taim mi harim Yu wokabaut i kam, mi pret nogut tru na mi hait.”
11Na BIKPELA God Em i tok, “Husat i tokim yu na yu klia olsem yu stap skin nating? Dispela frut Mi bin tambuim yu long kaikai, yu kaikaim pinis, a?”
12Na man em i tok, “Dispela meri Yu kamapim long ples na em i stap wantaim mi, em i givim dispela frut long mi na mi kaikai.”
13Na BIKPELA God Em i askim meri na Em i tok, “Yu bin mekim wanem samting?”
Na meri em i tok, “Snek em i giamanim mi na mi kaikaim dispela frut.”
14Orait, BIKPELA God Em i tokim snek na Em i tok, “Yu giamanim meri pinis, olsem na nau Mi bai kotim yu.
Planti kainkain animal ol i stap, tasol yu, Mi bai bagarapim yu olgeta,
na Mi bai daunim yu nogut tru!
Olgeta taim yu bai raun long bel bilong yu,
na olgeta taim yu bai stap olsem samting nating.
15Na Mi bai mekim yu i stap birua bilong meri na meri em bai stap birua bilong yu,
na lain bilong yu bai stap birua bilong lain bilong meri.
Em bai brukim het bilong yu,
na yu bai sutim lek bilong em.”
16Na BIKPELA God Em i tokim meri na Em i tok,
Mi bai givim bikpela pen long yu na bai yu kamapim ol femili bilong yu,
na taim yu laik karim pikinini bai yu pilim pen nogut tru.
Yu bai tingting planti long man bilong yu,
na em bai bosim na winim yu.
17Na BIKPELA God Em i tokim Adam na Em i tok, “Mi tokim yu pinis, ‘Yu no ken i kaikaim frut bilong dispela diwai.’ Tasol, yu bin harim tok bilong meri bilong yu na yu kaikaim frut pinis. Olsem na,
Long rong bilong yu graun bai kisim bagarap.
Long olgeta de long laip bilong yu
yu bai hat wok nogut tru na yu kaikai.
18Na graun em bai kamapim ol kainkain rop i gat nil na ol gras nogut,
na yu bai kaikai long sampela kaikai bilong bus.
19Yu bai hat wok na pilim tuhat nogut tru na yu bai kaikai,
na yu bai mekim i go i go inap long yu go bek gen long graun.
Mi bin wokim yu long graun,
na yu bai go bek gen long graun.”
20Adam em i givim nem long meri bilong em na em i kolim em “Ivi.” Long wanem, Ivi bai kamap mama bilong olgeta lain i gat laip i stap.
21BIKPELA God Em i wokim klos long skin bilong animal na Em i givim tupela. 22Na BIKPELA God Em i tokaut na Em i tok, “Em nau, man em i klia pinis long ol gutpela samting na ol samting nogut, na em i kamap olsem Mipela. Olsem na nogut em i go long diwai bilong givim laip na kaikaim frut bilong dispela diwai na em i stap laip i go i go i go.” 23Olsem na BIKPELA God Em i rausim man long ples Iden. Em i salim man i go bilong wokim gaden long graun. 24Taim BIKPELA God Em i rausim man pinis, Em i sanapim ol narapela kain samting long ples Iden, nem bilong dispela samting em i “serabem.” Em i sanapim ol long sait bilong san i kamap. Na tu, Em i putim wanpela naip i gat paia na naip em i save tanim tanim i go i kam. Em i mekim olsem bilong pasim rot i go long diwai bilong givim laip.
